Galesia Enembodu
Pol Unda Ingiso Galesia Enembodu Gefiria, Aná Evere.
Galesia aná frovensida ragaro re. Pol undufa Galesia frovensiva deĩ urota, minono ririeta, Galesia Frovensiva enembo Iesu da Gaga Taubana niningigea gaabee egeguturie.
Anada ambova Frovensi Galesia da rova irugari kakato dumenimi deĩ urota, irugari akokogo egegutueta tanana ea, Pol ená ingiso aghajora ghaeko* 48-49 Iesu siroruturia-da ambova gefirie. Ená irugari kakato rera-mi, irugari eghá egegeta urie: “Namonde amó Keriso gaabee urota, Jiusi enemboda kiki, kotú Agho Dari seinu ambo-ambo egegadora, God da jebuga tatambugaita rosore.” Tago, Pol na ená ingiso rova rei-irugutua mo, namonde amó Iesu nuenembo gaabee egegadora, jebuga tumanadu irari tambua baita rosore.
Pol Ená Buka Gefiria Gagada Mendó Mane, Aná Evere:
1:1-5 Pol na Jojabeeda ragarova Galesia enembo ghanena urie.
1:6-2:21 Pol na Galesia enembo irugari kakato akokogoda gaga injigha egeguturota, unda gaga nuenembo niningigari-du iruguturie.
3:1-4:31 God da jebuga jo gurimi utua bari, kotú namonde anda anomi bari aghago irambi re. Namonde amó Iesu gaabee urota-gea, unda jebuga tefo utota bubugaita rosore.
5:1-6:10 Namonde amó Keriso da sonembami jebugea, Asisi Kakarada gaganu niningurota iririgari-du reirie.
6:11-18 Pol unda gaga rea sidara urota, númane ghanena urie.
1
1 Ariee, anda ikoko mendi, ariri gharovu, amó Pol re. Jo enembomi rata, amó númanda aghi kato ambi re. Tago, God Afa na Iesu amburarivareta ririeta jebugea eroruria-mi, umó unda mendi Iesu Keriso ungá unona ririeta, númanda aghi kato ea vitere.
2 Amó gaabee ari kakato eve namonde vitera-de dano, nímane Galesia Frovensiva vitera ekaresia* dano ghanena rosore. Yata bua gigige!
3 Namonde anda God Afa, kotú Jojabee Iesu Keriso da sonembade siriri aride nímandu utota bubugadi!
4 Namonde amó ená endava vitera enemboda ari-bari akokogo seghota jebugari-du rea, Iesu unda tamo undufa vesa utua, God da unonu ambo-ambo ea, namonde anda ari-bari akokogodu ambubuturie.
5 Amindu rea, namonde amó God da duroghanu gerurota, tumanadu undú raga rirota iririgore! Ai, gaa bee re.
1:6-10 God Da Gaga Taubanada Ruru, Aná Dabako Re.
6 Amó nímanda bingá ningia, duduku utare. Keriso nímane mino tefo sonembuturota, ambubuturia-mi, God na nímane aghi uta. Tago, nímane gaimbo ambi unda Gaga Taubana doa, enembo einida gagadu “Gaga Taubana” gaa rirota, ambo-ambo rosoravore.
7 Amó gaa bee rere. Gaga Taubana jo ungagha irambi re, dabako re. Anda aghá rera-da bee mo, enembo dumenida reta rousua gaga, aná jo Keriso da Gaga Taubana irambi re. Tago, númanena God da Gaga Taubana righia, biruru eaveta, nímane mana-mana egegeta rosoravore.
8 Ananu ningia, amó nímandu eghá rere. Enembo eini, o uutuva anera eini o amó andufa kaverea ya, Gaga Taubana doa, gaga eininu rasira mo, God na undú bouvu utasueta, tumanadu mema itatama urota irasue!
9 Seibe ritara, dabako ananu nundubadi rea, rekago raita rore. Enembo avona ya, námanena Gaga Taubana nímandu ritata rurara-nu doa, eininu rasua, ambova umó ambua, unda sembagoda mema tumanadu itatama urota irasue!
10 Amó ená gaga gembera, jo enembomi irugea gia, “avore” regegari-du, gembambi re. Aghagonu amó jo enembomi ená gaga irugea, gangoro egegari-du gembambi re. Amó enembo gangoro egegari-du uno asira mo, amó jo God da sabua* kato ambi asire.
1:11-24 Pol Umó Daiyagha Ea, God Da Buro Kato Uria Re.
11 Anda kokomana, amó nímandu eghá rere. Anda minono ritara Gaga Taubana, aná jo enemboda gaga irambi re.
12 Ená gaga jo enembo einimi andú utambi, kotú irugambi re. Aná Iesu Keriso na undufako andava isagha urieta gerurere.
13 Amó Jiusi enemboda rorova sirorea, númanda evovo kiki ambo-ambo urera-de, kotú amó God da ekaresia* daiyagha manjasua-nu nundubuturota, númandava mema bouvu jojabe utuaveta, númane itatama egegeta uria-de dano ritata niningigutaravore.
14 Amó anda kokomanede Jiusi enembodava siroruturera-da rorova anda irari eini re. Enembo eini jo amogo irambi re. Námane Jiusi enemboda abua maneda gaga, kotú kiki dano ningia, ambo-ambo ea goghó urere.
15-16 Tago, amó jo sirorambi irieta, God na unda neno barimi andú kavevera ea, amó unda buro ari-du gateguturie. Ea, unda uno ea gateguturia fefera furia, buburiturieta, unda Mendimi andava isagha urieta gerurere. Aghá uria-da bee mo, anona ya, námane Jiusi enemboda gitofodava unda Mendida Gaga Taubananu minono rari-du rea, amonu gateguturie. Tago, amó jo enembo dumenidava nghaĩ itari gaga bambi re.
17 Aghagonu, amó jo anda dibe kena Jojabeeda ambo nimbi ea vitiria enembo gaita rea, Jerusalem yambi re. Amó dibe dambu Arebia Frovensiva arere. Kotú, ambova amó anavareta kaverea furera, rekago bogu naa Damaskus buburiturere.
18 Ghaeko bakode sidara uria-da ambova, amó Pita dava gaga dumeni ningaita rea, Jerusalem arera, angá fefera dano 15 vitirere.
19 Aghade, Pita da kasava God da aghi kakato dumeni avo jo gambi re. Amó Jojabeeda ikoko Jems nuenembo gerurere.
20 God gerueta, amó gaa bee rere. Anda minono reta rora gaga aná Iesu Keriso na iruguturieta, amó gerurere. Amó jo gavera rambi re.
21 Anada ambova, amó Jerusalem doa arera, Siria Frovensi kotú Silisia Frovensi anava irirota, deĩ eta urere.
22 Fefera aghade, Keriso gaabee eta egeguturia enembomi Judia Frovensi anava amó jo gia tanana ambi re.
23 Númane enembo dumenimi anda ragarova gaga eghá riria-nu ningia vitirie: “Aná embó sei namonde andava mema kotú bouvu ututurota, Iesu du goitu fotari-du buregeta urie. Tago, oreki unona enembo Iesu Keriso gaabee egegari-du minono reta rouvie.”
24 Amindu rea, númane amonu nundubuturota, God du raga regegeta urie.