19
Ususefages Buuii na Kukulii
1 Nami na foron tier ae, ia ka ongen nenge tier arae kinen motrong bae na kukulii ri perek aragii,
“Aleluia!
Ke God kirer e fafaliu,
memeh turan rakrakai,
2 wara le i tekentu ma i tortores
e foron nagogon kia.
God ka nagogon ta tara tamfaes ae isi in fiu.
Ka falaulau ta piklinbat ini sinangun puur kia.
God ka nagogon ta u
kunan daun foron fafauun kia.”
3 Ke ri ka perek sabin aragii,
“Aleluia!
Bau na yiif ae i sok lo
i fen una mawe
ma biil ti farfarop lo.”
4 Ke iwu e sangful ini fet e famfamu turan ifet e fakfakiis ae ri liu ri ka ilepul ma ri ka lotu unaisa God ae i kiis ta na nian kiiskiis ken king. Ri ka tarah,
“Amen! Aleluia!”
5 Ke kinen tikas tina nian kiiskiis ken king ka tara aragii,
“Usefages God kirer,
gam foron fafauun kia,
gam ae gam bulat la lo,
gam fanu foes turan fanu sabin ae imel e asri.”
6 Namih, ia ka ongen nenge tier arae kinen motrong, arae kinen dan ae i nor ke arae kinen tara pah, ri perek aragii,
“Aleluia!
Wara le Kumguui God kirer
ae Rakrakai kia i liuliu kulkulef, i King.
7 Keren laes ma kerek gesges
ma kerek ta memeh usuf i!
Wara le biingen fakekel ken Natun Sipsip
ka tapiek mang
ma fifin ae in telpes u
ka geges tah.
8 Ri ka ta rokap na kaen pos usuf i
ae i barang ma i fuuh,
isi in ges ini.”
Rokap na kaen pos i fakileng tortores na sinangun fanu kalkaluu.
9 Ke angelo ae ka fas iau aragii, “Siit orek igii: Fanu ae ri sising ta ri isi rin la una inen na fakekel fuuh ken Natun Sipsip, ri kalok.” Ke ka tara sabin aragii, “Foron orek igii, i e orek tekentu ke God.”
10 Ke ia ka luut uf na iun keke isi ian lotu unaisa, isau le ka tara sing iau aragii, “Gong o tel u! Ia tikiin foim sau kiam turan foron tuamlik ae ri posefat na orek an fafamalal ke Iesu! On lotu unaisa God! Wara le fafamalal ke Iesu i e konon orek profet.”
Ier ae i Kiis na olon Os Pos
11 Ia ka par kukulii i sapeng ke ia ka par nenge os pos awii na famu lo iau. Ier ae i kiis lo, iwun asa e “Tom Tel Fasuut” ke “Tom Orek Tekentu” ma i tortores e nagogon kia turan fapaket kia.
12 Ma iun kolson mata i arae karfian yiif ma ifuun e bangbang ken king na paklu. Nenge asa ae ri siit ta u lo, biil tikas i usum lo, i keskes sau i usum lo.
13 I kilkiliis ini nenge dolon kaen ae ri falum ta u na dah. Ma asa e “Orek ke God.”
14 Ma foron tom fapaket tinbae na kukulii ri kiis na foron os pos ma ri ka mimi pes u la. Ri kilkiliis ini foron rokap na kaen ae i pos ma i fuuh.
15 Nenge popok una fapaket ae i ien kanaka i suu tina ngusu una fapu rakrakai ken foron mat tikii. Ma in nagogon ri ini bis ae ri tel u ini aen. I fosfose fuan wain na falifu ae ri bing turim wain la lo, ae i fakileng ngaliaf ke God ae Rakrakai kia i liuliu kulkulef.
16 Na dolon kaen kia ma awii isi pawa, ri siit ta asa aragii:
KING KEN FORON KING
KE KUMGUUI KEN FORON KUMGUUI.
17 Ke ia ka par nenge angelo i soti bae na matan pisiih ke ka tautau usuf foron man tikii ae ri wof na mua aragii, “Gam la turim ugapiek una tara inen ke God,
18 isi gamek ien pinsan foron king, foron kabisit, fanu rakrakai, ke pinsan foron os turan fanu ae ri kiis la lo, ke pinsan fanu tikii arae foron fafauun foes turan fanu ae biil ri fafauun, ke fanu foes turan fanu ae imel e asri.”
19 Namih, ia ka par muruuw aka turan foron king tina piklinbat ke foron tom fapaket kiri, ri ka tapiek turim isi fapaket tura ier ae i kiis na olon os pos turan foron tom fapaket kia.
20 Isau le ri ka luse muruuw aka ae turan profet famfabal ae i fatapiek ta foron rakrakai na fakileng ini asan muruuw aka ae. I fatapiek ta foron fakileng ae una fabal fanu ae ri ka kep ta fakileng ken muruuw aka ke ri ka lotu ta unaisan tantanwa. Ma ri ka lin ru turim aunbiing ru liu biitom una tara kalpong ae i soksok la ini salfa.
21 Fanu tikii kiruh, ri ka met na popok una fapaket ae i suu tina ngusu ier ae i kiis na olon os pos, ma foron man tikii ri ka mas na pinsa ri.