Fatuul u e Leta
ke Jon
Orek famu
Leta igii Jon i siit ta u. I siit u usuf nenge tom unune asa e Gaius. I fotrokap lo, wara i lupes ta foron tom foim ae ri la ta ini Rokap na Fafas. I use nenge kaltu sabin asa e Diotrefes, ae sinangu biil i rokap.
Fatuul u e Leta ke Jon i aragii:
1:1-4 Tanwara na leta igii
1:5-8 Jon i laes ini Gaius
1:9-10 Sinangu Diotrefes i laulau
1:11-12 Sinangu Demetrius i rokap
1:13-15 Farfarop na orek
1
1 Ia nenge famfamu na lotu, ia sisiit usuf o Gaius, rokap na talang ma ia ier tekentu isi wo.
2 Rokap na talang, ia sising le foron tier tikii in rokap usuf o ma on liu ini rokap na liu, arae sabin ia usum le tanwam i rokap.
3 Ia laes kanaka aunbiing fale tualikrer ri la ma ri ka fas iau le o misuut la tom na tekentu na fafausum ma igii o tongon mi tom lo.
4 Biil ti laes i liu ufu laes kiak aunbiing ia ongen u le berberat kiak na asa Iesu ri mi la tom na tekentu.
On Lupes foron Tualikrer ae ri La ini Rokap na Fafas
5 Rokap na talang, o tel fasuut foron foim la una lupes foron tualikrah, taftawa le ri arae foron ses usuf o.
6 Ri ka fas ta foron tom unune igii ini famais kiam unaisri. Ma i rokap le on tule ufu ri ini matngan sinang ae in falaes God.
7 Ri la, wara na asa Karisito ma biil ri kep falupes la sing fanu tina kabarais, biil.
8 Pesu, i rokap le keren lupes matngan fanu arae, isi kerek fapose turim na fasarara orek tekentu.
Sinangu Diotrefes ru e Demetrius
9 Ia siit ta nenge leta usuf foron tom unune na maleh kiam, isau le Diotrefes ae i ier le in tapiek famfamu kimi, biil i ongen pes foron tier ae keme use ta u.
10 Ma aunbiing ian tapiek awii, ian famalal gam ini foron tier ae i tel u la ke foron orek laulau i use ta u ulo kemem. Ma biil sabin i somangat pes foron tualikrer la ae ri la ini Rokap na Fafas, ke ka tikale fanu kia sabin ae ri ier isi rin somangat pes ri. Male se i somangat pes ri, ke Diotrefes i tel ufu la tina lotu.
11 Rokap na talang, gong o mi na matngan sinang ae i laulau, on mi sau na sinang i rokap. Se i tel sani i rokap, i ke God. Ma se i tel sani ae i laulau, biil i to usum lo God.
12 Fanu tikii ri use u le Demetrius i rokap na kaltu. Ma sinangu sabin i famalal u le i rokap na kaltu, aunbiing i mi la na tekentu. Kemem sabin keme use u le i kaltu rokap ma o usum le orek kimem i tekentu.
Farfarop na Orek an Famais ke Jon
13 Ifuun e tier le ian siit u usuf o, isau le biil ia to ier le ian sisiit ini pen.
14 Ia unune le biil in sawin ke iak par o sabin, isi karak faparia.
15 Siaroh usuf o. Foron talrer igii ri tule orek an famais kiri usuf o. O sabin on ta orek an famais kiak usuf foron talrer tikii ae naisam.