Ⅳ
Ⅰ Nãaŋmɩn Sɩɛ 'yɛr ka a gã chãa pɔ ɩka a baaraa, bamɩne na bar a ba sɔɔfʊ tɩ chɛlɛ a sɩdɛbɛ bɛlfʊ, nɩ a lɛ a sɩdɛbɛ na wile.
Ⅱ A wiilfʊ nyã yi naa a nɛɛr ayi dẽme na ma ŋmara a jirsɩ ka a sɔ̃ɔ a ba tɩɛr fɩka kur tʊl ban 'mon bon 'yɔ̃ɔ jãnɛ.
Ⅲ Ba wile na nɩbɛ ɩka ba ta kultaar ɛ, na ba wile ba ɩka ba chire bʊ̃diir amɩne. Tɩchɛ Nãaŋmɩn na maal a kultaa nɩ a bʊ̃diir a jaa ɩka a bala na sɔɔ tɩ bɔ̃ɔ a yelmãɛ, ba ma de tɩ puor wʊ yãan.
Ⅳ Bojũu Nãaŋmɩn bʊ̃maalaa jaa vɩɛlɛ na, ka a ba sɛɛ ɩka nɩrɛ wʊ tɔr bon jaa bar ɛ, ala ɩ sɩ ma den nɩ yãan puorfʊ.
Ⅴ Bojũu Nãaŋmɩn 'yɛrbir nɩ a Nãaŋmɩn sʊɔrfʊ maal yaa naa ka a ɩ bʊ̃sʊ̃.
Ⅵ Ala ɩ fʊ den a kpãafʊ nyã na fʊ wiil a yɛɛr, fʊn ɩn a Yesu Kɩrɩsɩto tʊ̃tʊ̃vɩla sʊɔ, na fʊn guolo a fʊ mãɛ nɩ a Nãaŋmɩn 'yɛr nɩ a sɔɔfʊ wiil vɩla 'lɔ fʊn turo.
Ⅶ Tɔr a jirsɩ ala ban ma ŋmara nɩ a pɔɔnyɔ̃n fuolsɩ, tɩ na fʊ wile a fʊ mãɛ a Nãaŋmɩn sɔr pɔ.
Ⅷ Bojũu fʊ̃ʊ jãn a fʊ ãgãn ka wʊ kpɛ̃mɛ, a vɩla na, tɩ wʊ kʊ̃ kor ɛ, tɩchɛ a Nãaŋmɩn sɔr tufʊ vɩla na a sɔɩ a jaa pɔ, bojũu wʊ tɩr nɛɛ kʊ sɩ a nyɛvʊr nyã sɩn tara a dɩna nɩ a nyɛvʊr 'lɔ na waara daar kɔ̃ɔ.
Ⅸ A 'yɛr nyã ɩn yelmãɛ ɩka, nɩrɛ jaa wʊ sɔɔ de.
Ⅹ A lɛ jũu lɛ sɩ mʊɔrɔ tʊ̃nɔ̃ nɩ tʊ̃kpãɛn, bojũu a sɩ tɩɛrtɔ ben a Nãaŋmɩn nyã na ɩ vʊr pɔ. 'Lɔ lɛ ɩ a nɩbɛ bala jaa na sɔɔ wʊ Fafaara.
Ⅺ Kpãkpãana na fʊ wile ba a yelsɩ anyãna a jaa.
Ⅻ Ta vɛ̃ ka nɩrɛ jaa kaa fʊ pɔrɔ fʊn chɛnɛ ɩ pɔlbile jũu ɛ, tɩchɛ fʊ ɩ wiilfʊ kʊ a bala na tara sɔɔfʊ, nɩ a fʊ 'yɛr, nɩ a fʊ maalfʊ, nɩ a fʊ nʊ̃fʊ, nɩ a fʊ sɔɔfʊ, nɩ a fʊ chɛchɛ ɩfʊ pɔ.
ⅩⅢ Sɛrɛ tɩchɛ ka n wa, mʊ̃ɔ nɩbir kara a Nãaŋmɩn gãn a nɩyɔɔ pɔ, na fʊ mʊɔlɔ tɩ wile nɩ ba.
ⅩⅣ Ta mel a Nãaŋmɩn Sɩɛ 'lɔ wʊn kʊ fʊ ɛ, a daar 'lɔ̃nɔ̃ a nɩdierbe na dɔ̃ɔ 'yɛr tɩ dɔɔl fʊ a ba nuur.
ⅩⅤ De a yelsɩ a nyã tʊ̃nɔ̃ nɩ tʊ̃mɔ̃, na fʊ de fʊ mãɛ 'yɔ̃ɔ a tʊ̃mɔ̃ pɔ, ka nɩrɛ jaa nyɛ lɛ a fʊ tʊ̃mɔ̃ na chiine niem.
ⅩⅥ Bɔ̃ɔ nyɔɔ a fʊ mãɛ nɩ a wiilfʊ ɩrɛ a lɛ nɛ, na fʊ tara kãnyir. Fʊn faan a fʊ mãɛ nɩ a bala na chɛlɛ a fʊ 'yɛr.