ⅩⅨ
Ⅰ A anyã puor, n wõn gɔ̃mɔ̃ fɩka nɩyɔɔ na tãna be a saaju 'yɛrɛ nɩ, “Dãnfʊ wʊ ta Nãaŋmɩn! Faafʊ nɩ tɩɩr nɩ kpɛ̃ɔ ɩ naa a wʊ tʊɔr,
Ⅱ bojũu a wʊ 'yɛr tɔɔrfʊ ɩn yelmãɛ tɩ mɩ tor. Wʊ 'yɔ̃ɔn a pɔɔ baa na 'yɛr, 'lɔ lɛ sɔ̃ɔ a wɛr nɩbɛ nɩ a wʊ sɛ̃sɛ̃yele. A wʊ gbãgbaar wʊn kʊ, wʊ yab wʊn a sãn.”
Ⅲ Ba lɛ tãna na go, “Dãnfʊ wʊ ta Nãaŋmɩn. A wʊ jʊʊr na uro duoro ba tara ŋmaafʊ ɛ.”
Ⅳ Ka a nɩbɛrɛ lɩjɛr nɩ anaar nɩ a bʊ̃nɩbie anaar bala gãn kpa tẽe puor a Nãaŋmɩn na jãnɛ a nãa dakɔɔ ju pɛɛrɛ wʊ 'yɛrɛ nɩ, “A ɩ a lɛ. Dãnfʊ wʊ ta a Nãaŋmɩn.”
Ⅴ Be lɛ ka a kɔkɔr yi be a nãa dakɔɔ par 'yɛrɛ, “A yɩn na ɩ a Nãaŋmɩn gbãgbaar na yɩ joro wʊ dãbãɛ. Ka bil bɩɩ bɛrɛ lɛ, yɩ pɛɛrɛ a sɩ Nãaŋmɩn!”
Ⅵ N pãa lɛ wõn dɔ̃ɔn fɩka nɩyɔɔ na gɔ̃nɔ̃, bɩɩ fɩka kɔ̃kpɛ̃ɛ na joro, bɩɩ saa na tãna kpɛ̃ɔ jaa, “Dãnfʊ wʊ ta Nãaŋmɩn! Bojũu a sɩ Soro Nãaŋmɩn na ɩ a Tʊ̃ɔfʊ Sʊɔ, lɛ di a nãa.
Ⅶ Yɩ ɩ a sɩ chɩlɛ ka sɩ ãgãn 'maa a sɩ kʊ a Nãaŋmɩn tɩɩr an ɩ a wʊ Pɛraabile pɔɔ kulfʊ bɩbir vɩɛ naa, ka a pɔɔ mɩ chɔɔr a wʊ mãɛ baar.
Ⅷ Wʊ sun bʊ̃pɩɛl na vɩɛlɛ tɩ nyɩlɛ.” A bʊ̃pɩɛl anyãna lɛ a Nãaŋmɩn nɩbɛ yeltorsɩ.
Ⅸ Ka a malaka 'yɛr kʊ ma, “Sɛb a anyãna, ‘An ɩn pʊpɛl kʊ a bala ban bʊɔl a Pɛraabile pɔɔ kulfʊ lɔ̃ɔ di jie.’ ” Ka a malaka mɩ 'yɛr pʊɔ, “A Nãaŋmɩn 'yɛr anyãna ɩn yelmãɛ.”
Ⅹ Ka n gã kpa tẽe ɩka n puor wʊ, tɩchɛ ka wʊ 'yɛr kʊ ma, “Ta maal a lɛ ɛ. N mɩ ɩ naa a gbãgbaa nɩtãa a fʊ̃ʊ nɩ a fʊ yɛɛr kaar, bala lɛ tara Yesu dãasɩɛ. Puor Nãaŋmɩn! Bojũu, a Yesu dãasɩɛ lɛ ɩ a Sɩɛ 'yɛr.”
Ⅺ N nyɛn a saaju na yuo, ka a ɩ wii pɩla lɛ, ka a nɩrɛ 'lɔ na do yuor di, yelmãɛ sʊɔ nɩ nɩtor. Yeltorsɩ lɛ wʊ ma tɔɔr a wʊ 'yɛr tɩ ŋmaan wʊ jɛɛr.
Ⅻ A wʊ nɩbie 'lɩrɛ naa fɩka bũu, ka a nãjupil yɔɔ su a wʊ ju pɔ. Yuor sɛb mar wʊ nɩrɛ jaa na ba bɔ̃ɔ ɛ, ka 'lɔ tɛɛ ba lɛ ɛ.
ⅩⅢ A fuu wõo wʊn su ɩn jãɩ wʊ jaa ka a yuor di, “Nãaŋmɩn 'Yɛr.”
ⅩⅣ A saaju sojasɩ sun bʊ̃pɩɛl don wii pɩɛl turo nɩ wʊ.
ⅩⅤ Ka a sɔkpɛ̃ɛ diir yi a wʊ nɛɛ pɔ, 'lɔ lɛ wʊ de chɩɛrɛ nɩ a paalsɩ ba jaa, “Wʊn kaara ba jaa nɩ a kpɛ̃ɔ 'lɔ na kaara a kur dãgbal kaar.” (Yiel Gãn 2:9) Wʊn nɛɛrɛ ban ŋmɛrɛ be a tɩɛ wɔ̃mɔ̃ nɛŋmɛrfʊ jie nɩ a Nãaŋmɩn na ɩ a Tʊ̃ɔfʊ Sʊɔ suur.
ⅩⅥ Yuor nyãna lɛ be a wʊ fuu wõo na suu a gbɛkpɛ̃ɛ pɔ ɩka, A NÃMƖNE BA JAA NÃA, NƖ A SORBO BA JAA SORO.
ⅩⅦ N nyɛn malaka na ara a mɔ̃tɔ̃ɔ ju tɩ bʊɔl a lubil a jaa na ɔɔrɔ be a saaju nɩ kɔkɔkpɛ̃ɛ, “Yɩ lɔ̃ɔ taa wa a Nãaŋmɩn lɔ̃ɔ di jie.
ⅩⅧ Lɛ lɛ, yɩ wa dire a nãmɩne ãgãma nɩ a fɔ̃n dẽme nɩ a kpãɛn dẽme, a wiisɩ nɩ a ba duorbo, gbãgbaar nɩ sumɩne, a bil nɩ a bɛrɛ, a nɩbɛ banyãna ba jaa ãgãma.”
ⅩⅨ Ka n nyɛ a mɔdʊ̃ɔ nɩ a wɛr nãmɩne nɩ a ba sojasɩ lɔ̃ɔn taa ŋmaan a 'lɔ na do a wii nɩ a wʊ sojasɩ jɛɛr.
ⅩⅩ Tɩchɛ ba nyɔɔn a mɔdʊ̃ɔ lɔ̃ɔn a jir ŋmara 'yɛ'yɛrɛ na tʊ̃ a nɛ'maa tʊ̃mɔ̃ a mɔdʊ̃ɔ niem. A nɛ'maa tʊ̃mɔ̃ anyãna lɛ wʊ de bɛlʊ̃ a bala na tara a mɔdʊ̃ɔ jãnɛ tɩ puor a bʊtɩɩ. Ba lɔb ba jaa ayi bʊ̃nɩbie 'yɔ̃ɔ a jerbɩ bũu na dire pɔ.
ⅩⅪ A bala na chɛ, a 'lɔ na jãnɛ a wii ju kʊ ba naa nɩ a sɔkpɛ̃ɛ diir 'lɔ na yi a wʊ nɛɛ pɔ, ka a lubil pãa di a ba ãgãma tɩɩ.