108
Yenmiaru nba loon sommir ki jiin datai biiru po
(Yaŋ 57.7-11; 60.5-12)
1 Yennu, n mɔk dindann nba yab.
N saa yin yaŋ ki donta.
2 N seek, fiit. N kɔnn nan n yerik, fiit man.
N saa fiir sanyafaare.
3 Yennu, n saa tura niipoouk digbana sinsuuk ni.
N saa dont a sann nisaarii sinsuuk ni.
4 A lomm nba kaa gbennu na do ki baat sanpaak;
ki a mamɔmm na siit sanpagbant.
5 Yennu, want a yabint sanpagbant niŋ
nan a paŋ tingbouŋ na kur po.
6 Jiin a paŋ na ki tinnit, ki gat n miaru na,
ki niib nba ki a loomm na n nyi bi daamii ni.
7 Yennu be u kasii boor ŋaan yet a, “N saa jii yiikooe
ki bɔkit Sekem doo, ki bia chent Sukof baauk ki tur n niib.
8 Gilead yent tee n yare, ki kpab nan Manase yent,
Efraim yent tee n kut fokirike,
ki Juda yent mun tee n naan dammir.
9 Ŋaan n saa jii Moab yente ki teen n nyunnitŋmaŋ,
ki Edom yent sii tee n taasaat binbir boor,
ki lii tee nyinn ki want nan n yenir.
N saa hoot nan nyannu kunkɔre, Filistia teeb paak.”
10 Yennu, ŋmee saa jiin ki saan nanin digbanpaarir na ni?
Ŋmee saa gar tɔɔnn ki saan nanin Edom-i?
11 A set kpan yêtime-e?
A kan tɔk nan ti kunkɔnkɔnna na-a?
12 Sommitit, ki nyinnit ti datai nuu ni;
nisaarik sommir ki mɔk siara nyɔɔti.
13 Yennu-i taa ti po, ti saa nyanna;
ŋɔɔe saa nyann ti datai.