7
Ki jiin saakab Yenpiinii po
1 Daar nba ki Moses chaan Yennu lanbouŋ ki gbenn na, ki u jii kpan ki ŋammir, nan linba kur be li ni, nan maruŋ binbintir, nan bona nba kur kpiin nann, ki jii tur Yennu.
2 Ki naakuut saakab nba tee Israel booru ni tɔɔndamm, ki bia bo tee saakab nikant yoo na,
3 ki bi baar nan bi piinii ki tur Yennu, ki li tee naatorit ŋanloob nan naajai piik nan banlee, ki saakab banlee kur tur naatoruk yenn, ki saakɔɔ kur tur naajak. Baa tur bi Yenpiinii maŋ ki gbenn na,
4 ki Yennu yet Moses a,
5 “Gaat piinii na bi boor, kii dia kii tuun lanbouŋ na ni toona. Jiin bona maŋ ki tur Liifai teeb na, ki bi saa tun nann, nan sɔɔ kur toonn nba tee.”
6 Ki Moses jii naatorit nan naajai na ki tur Liifai teeb na;
7 ki u jii naatorit ŋanlee nan naajai banna ki tur Gersonn naakuuk,
8 ki jii naatorit ŋanna nan naajai banniin ki tur Merari naakuuk. Aarɔnn bija Itamar-e din tuu ŋmakitir sɔɔ kur ki bi tuun bi toona.
9 Ŋaan Moses din ki tur Kohaf naakuuk naatorit koo naajai, kimaan kasii bona nba ki bi din gorii na tee bii tuu kii bukin bi bɔpiat paake.
10 Baa ŋamm maruŋ binbintir na ki gbenn yoo nba, ki saakab na baar nan bi Yenpiinii a bin mann maruŋ, binbintir na paak. Baa teen siir nan bin tur bi piinii yoo nba,
11 ki Yennu yet Moses a, “Betir saakab na nan daar kur ni, saakɔɔ yenɔ n tuu baar nan u piinii ki turin, ki saa tuu daapiik nan ŋanlee, ki lin ŋamm maruŋ binbintir na.”
12-83 Baa din tur bi Yenpiinii ki wei leeb paak daar daar biaŋinbae na:
Sinsinn daar, Juda booru, ki bi saakɔɔ tee Nasonn,
ki u tee Aminadab bija.
Daaŋanlee daar, Isakar booru, ki bi saakɔɔ tee Netanel,
ki u tee Suar bija.
Daaŋantaa daar, Sebulunn booru, ki bi saakɔɔ tee Eliab,
ki u tee Helonn bija.
Daaŋanna daar, Rubenn booru, ki bi saakɔɔ tee Elisur,
ki u tee Sedeur bija.
Daaŋanŋmu daar, Simeonn booru, ki bi saakɔɔ tee Selumiel,
ki u tee Surisadai bija.
Daaŋanloob daar, Gaad booru, ki bi saakɔɔ tee Eliasaf,
ki u tee Dewel bija.
Daaŋanlore daar, Efraim booru, ki bi saakɔɔ tee Elisama,
ki u tee Amihud bija.
Daaŋanniin daar, Manase booru, ki bi saakɔɔ tee Gamaliel,
ki u tee Pedasur bija.
Daaŋanyia daar, Benjaminn booru, ki bi saakɔɔ tee Abidann,
ki u tee Gideoni bija.
Daapiik daar, Dann booru, ki bi saakɔɔ tee Ahieser,
ki u tee Amisadai bija.
Daapiik nan yenn daar, Aser booru, ki bi saakɔɔ tee Pagiel,
ki u tee Okrann bija.
Daapiik nan ŋanlee daar, Naftali booru, ki bi saakɔɔ tee Ahira,
ki u tee Enann bija.
Saakab na kur nba din tur bi piinii biaŋinbae na: Salimpeena kut sɔnt, ki li kpaiu tee nan simpeenii bɔrik-gbinn na, nan salimpeena tatilabik, ki li kpaiu tee nan simpeenii bɔrik-gbinjinn na, ki tee biaŋinba ki bi senn; ki li kur gbee nan yon ki ŋmat kpama, ki tee jeet Yenpiinii; nan salima senii, ki li kpiau tee nan janii bɔrik-gbinjinn na, ki bonnunubit gbee li ni; nan naajabir nan pejak nan pegann nba dii binn, ki li tee mujoonu Yenpiinii; nan buuk, ki li tee yanbɔmm Yenpiinii; nan naajai banlee nan pejai banŋmu nan buunii banŋmu nan pei banŋmu, binba dii binn binn, ki li tee weinanleeb Yenpiinii.
84-88 Yenpiinii nba ki saakab piik nan banlee na din taan ki baar nann a bin jii ki ŋamm maruŋ binbintir na, ki tur Yennu din tee:
salimpeena kutsɔnii piik nan ŋanlee, nan salimpeena tatilaat piik nan ŋanlee, ki li kur kpiasu taan ki tee nan simpeenii bɔrik-gbina piinlee nan ŋanlore na;
nan salima senii piik nan ŋanlee ki li kpiasu taan ki tee nan simpeenii bɔrik-gbinn na, ki gbee nan bonnunubit,
nan naajai piik nan banlee, nan pejai piik nan banlee, nan pegana piik nan banlee nba di binn binn, nan jeet Yenpiinii, ki li kura tee mujoonu Yenpiinii,
nan buunii piik nan banlee, ki li tee yanbɔmm Yenpiinii;
nan naajai piinlee nan banna, nan pejai piinloob, nan buunii piinloob, nan pegana piinloob nba dii binn binn, ki li tee weinanleeb Yenpiinii.
89 Moses nba kɔɔ lanbouŋ na ni a wun pak nan Yennu yoo nba, ki u gbat ki Yennu pak nanɔ mɔlor lakir na biitir paapo, ki be bonninnant ŋanlee nba mɔk kpinkpant na sinsuuk ni.