4
Ki jiin Jerusalem biiru poor po
1 Ti salinnyinyira na ji biire;
ki Yenjiantu ŋasaakak na tana yat ki dɔɔ sɔnjot ni.
2 Sayɔnn naasimm na tuu mɔk nyɔɔt nan salima nae ki turit,
ki mɔtana ki bi ji diab nan yɔkboba na.
3 Naamunaaŋ gbaa, u tuu mɔɔnt u bonbis,
ŋaan ki n niib na ŋarin tee nan naamiɔŋ na
ki ton nan bi bonbis.
4 Ki bi te bi sanpantii kpenn kon nan nyunnyukuru;
ki bi waas na mei jeet, ŋaan ki sɔɔ ki teemm.
5 Ki niib nba tuu di jeŋant na ji kpenn kon sɔnjot ni;
binba tuu be bi yamani na ji ŋakitir
ki kpaan jebura tanpena paak.
6 Ki n niib na la tubdatu,
ki li gar Sodom teeb nba din la biiru nba nyii Yennu boor yiama na.
7 Tɔɔndamm na din yeen, ki ki mɔk jakint nan wunn na,
ki bia peen ki gar naabiin,
ki bi gbanant mɔk laafia nan fant nan paŋ bonchiann,
8 ŋaan mɔtana ki bi ji dɔɔ sɔnjot ni ki kpo,
ki bi numpo wob bɔnn, ki bi gbanant koor ki tee nan dakoonn na,
ki tab bi kpaba paak, ki sɔɔ kan fit bannibi.
9 Binba din kpo tɔb ni na yar din sɔ
ki gar binba din ki laat jeet ki fɔi,
ki tan kpenn kon li poor po na.
10 Biiru nba din baar n niib paak na mɔk jaŋmaansooruk,
ki bi naanba tan tat ŋaa bi waas ki ŋman.
11 Yennu wutoor mantik doo Sayɔnn doo paake,
ki u joor muu ki li dii boont.
12 Nirɔ din ki be siar boor, koo li boorganu doi diara na gbaa,
ki teen yada nan datai saa fit kɔɔ Jerusalem tammɔkɔɔka na ni.
13 Ŋaan li din tan tume,
kimaan Yennu sɔkiniinba nan mannteeb na din tun yanbɔmm,
ki kpii binba ki tun toonbiit nawa.
14 Ki doo na tɔɔndamm lin yirib sɔnjot ni,
nan bi tee jɔɔniie na, ki mantik gbar sɔn,
ki sɔɔ kaa ki saa fit siibi.
15 Ki niib na tantir a, “Seetir man. I biir i mɔŋa; i daa siitit.”
Ki bi ji lin yirib, ki nyi digban-yenn ni ki saa leer po,
ŋaan sɔɔ ki gaamm saauŋu.
16 Yennu ji ki fiin bi po, ŋɔɔe yatib u tiɔŋ,
ki u baka ji kaa mannteeb nan tɔɔndamm na po.
17 Ki ti guu sommir nba saa baar tee-e, ŋaan ki li tan ki baari,
ki bia guu sommir nba saa nyi digbann nba kan fit sommit na boor.
18 Ki datai na goriit, ki ti lek ji kan fit somm sɔnjot ni.
Ki ti daa gbenn, ki ti yoo nakin ki biiru baar ti paak.
19 Ki ti datai na tiin kakii
ki gar baakir nba tuu tiantir sanpaapo biaŋinba nawa,
ki wei berit, ki tɔkii ti sɔnbuka, jɔɔt ni,
ki bɔr kunkoouk paak a bin soorit.
20 Ki bi soor wunba ki ti manfoor dindann gaa u paak na,
ŋɔɔe tee kpanbar nba ki Yennu gann,
ki tee daanɔ nba ki ti teenɔ yada nan u saa guurit
ki tin nyi binba saa lekit na nuu ni.
21 Ii laa man, yimm Edom teeb nan Us teeb.
Ii mɔk parpeenn man, nan yaa daa mɔk yaak na.
Biiru mun bia baatie, ki i mun bia tan sii daŋit ki be payana,
ki di fei.
22 Yennu dat Sayɔnn teeb tubawa,
u kan te ki ti ji tee yommii boorganu tiŋ ni;
ŋaan yimm Edom teeb, Yennu saa dat i tubawa;
u saa fiit i toonbiit na ki nyinnir paanu.