1 Ki Elifas, wunba nyii Temann doo ni na jiin a: 2 Job, li-i tee ki n pak, a saa donn wutoora-a? N ji kan fit ŋmini. 3 A tumii niib bonchiann, ki bia tur binba ki bi nii baŋ na paŋ. 4 Nirɔ-i jat baantir kimaan waa bak ki baŋ na, ŋaan a mɔmaame tuu kpaŋɔ ki wun set fanu. 5 Ŋaan mɔtana li baar a paaka nan fii be daamii ni, ki a mantik baŋ nan fin gaarira. 6 A tuu jiantir Yennu, ki a binbeŋ ki mɔk bisiati. Li paak, a chee par kii mɔk dindann. 7 Dukint mɔtana ki jiin poor, ki laan li mi biir niŋanɔ-ɔ. 8 N ban la niib tuun toonbiit nan bi ko kpaant na, ki buur tonu nan bonboorii na, ki tan jaan tont nan biit. 9 Yennu saa donn wutoor ki biirib nan wonpaaruk nae. 10 Tondamm na sii duun ki beet nan yanbɔra nae, ŋaan Yennu saa te ki bin ŋmin ki saa kɔnn bi nyana. 11 Bi sii tee nan yanbɔra nba be ki ki mɔk siar nan bin di nae, ki bi saa kpo, ki bi waas kur saa yat.

12 Bi turin bunbɔri maan, ki li gbatu paar. 13 N gɔɔn gɔchiɔŋ, ŋaan ki damiit daamiin. 14 Ki jaŋmaanii nan jijekit kɔɔn, ki n gbanant kur jekir. 15 Ki seek* gar n numpo, ki wajeerii fiir n paak. 16 Ki n la siar see n boor, ki n got sirrr, ŋaan ki bann laa tee linba. Tɔn, ki li ŋmin soon, ki n tan gbat kunkɔr yet a, 17 “Sɔɔ kaa ki sii fit be fanu Yennu tɔɔnn, koo ki yeen u naamii daanɔ boori. 18 Yennu ki teen yada nan u Yendɔuŋ ni toontunna na, u laat u malakanba na toonkpeta gbaa. 19 A dukin nan u saa teen yada nan nisaarik nba tee nɔɔnn, bont nba tee tant, ki saa mat nan wobmaann nawa-a? 20 Nisaarik sii fit mɔk manfoor sanyiɔk ni, ki daajoouk tan baat na ki u kpowa, ŋaan bo ki mi li po. 21 Ki waa mɔk linba kur, bin jii yaat nann. U tuu kpoe, ki daa ki mɔk yanfoon.”