62
1 N saa pake ki maan Jerusalem par.
N kii ŋmin see ki u tan tinn,
ki u nyannu yeen nan nyiɔk muu na.
2 Jerusalem, digbana saa la a popeensin,
ki bi kpanbara kur saa la a yabint nba tee biaŋinba.
Bi saa pura sanpaanne, sann nba ki Yennu tiɔŋ pura na.
3 A sii tee nan naan fokirik nba fan biaŋinba nae ki tur Yennu.
4 Sɔɔ ji kan yiina, “Kaadɔuŋ,” koo ki yiin a tiŋ “Pooluukir.”
A sanpaanne sii tee “Yennu par mei u paak.”
Ki bi sii yi a tiŋ na, “Jakunŋant,”
kimaan Yennu par mei a paak,
ki u sii tee nan sɔrɔ na ki tur a tiŋ.
5 Naasimɔ nba tuu ji sapaanmunn ki teenɔ u poo biaŋinba na,
nnae ki a naamiidaanɔ saa kɔɔna.
Naasimɔ par nba tuu mei u poo paak biaŋinba na,
nnae ki Yennu par sii mei a paak.
6 Jerusalem, n kaan guuteebe a joonjouk na paak.
Yonnu nan nyiɔk kur bi ki tee saa ŋmini.
Li tee bii tian Yennu u mɔsona na poe, ki daa te ki u tammiti.
7 Bi daa teenɔ yaak, see ki u tan fiin Jerusalem,
ki teenir doo nba ki durinya kur saa pak dont.
8 Yennu senn mɔsonjaanne,
ki saa jii u yiikoo ki gbeen u mɔsonn maŋ a:
“I dii ji kii tee i datai jeeti, ki nigamm ji kan nyu i tilɔɔna daan.
9 Ŋaan yimm nba bur ki bia jaan dii maŋ nae
saa di li jeet, ki pak dont Yennu.
Yimm nba ŋamm ki bia pɔɔr li lɔɔna nae
saa nyu li daan, n jiantu ŋasaakak dindouŋ ni.”
10 Jerusalem teeb, nyimin doo na ni man,
ki faa sɔnu ki tur i niib nba jent na.
Faan sɔnjar ki gbab tana. Ii teen dɔk ki digbana na n bann
11 nan Yennu mɔɔntir teen tingbouŋ kure a,
“Pakin Jerusalem teeb a, ‘Yennu baat a wun tinni,
ki tɔk nan niib nba ki u tinnib na.’ ”
12 I sann sii tee “Yennu kasii niib,”
nan “Niib nba ki Yennu tinnib.”
Jerusalem sann sii tee “Doo nba ki Yennu loon,”
nan “Doo nba ki Yennu ki yêtir.”