55
Ki jiin Yennu ninkpabauŋ po
1 Ki Yennu yet a, “Wunba kur nyunnyukuru mɔkɔ,
wun baar, nyun be nna.
Yimm nba kur kaa likirii, ii baar man ki daa jeet ki di.
Baat man ki daa tilɔɔna daan nan naabiin.
I kan pa siar li paak.
2 Bee ki i biir likirii linba ki gboot paaki?
Bee ki i di i paauk ŋaan bia be komi?
Gbiintir turin man, ki tun maa wanni linba;
ki i saa di jeet nba man ki gar jeet kur ki lin maŋi.
3 “N niib, gbiintir turin man, ki baar n boor.
Baat n boor, ki i saa la manfoor.
N saa lor mɔlor kangbennuk nani,
ki turi piisin nba ki n din senn mɔsonn ki tur Defid na.
4 N teenɔ digbana tɔɔndaanɔe nan ŋmakit-tɔɔ,
ki u paake ki n wannib n paŋ.
5 I tan saa yiin digbangana niib;
sianyoowa bi din ki mi-ini,
ŋaan mɔtana bi saa tine baar ki pukini.
Min i Yomdaanɔ Yennu nba tee yimm Israel teeb kasii Yennu na
saa te linba na kur n tun.
N saa te ki yin la baakir nan chɔruŋ.”
6 Jenin Yennu boor, ki miarɔ yoo nba ki u naak na.
7 Nitont n nyik binbeŋ nba ki bi be na,
ki bia lebit dudukit nba ki bi dukii na.
Ŋaant ki bin jen ti Yomdaanɔ Yennu boor.
U mɔk ninbatinu, ki nyik chabit yian yian.
8 Yennu yet a, “N dudukit ki tee nan i yara na,
ki n sɔnii bia mɔk bɔkitu nan i yara.
9 Sanpagbouŋ nba fɔk nan tiŋ biaŋinba na,
nnae mun ki n sɔnii nan dudukit ŋan ki gar i yar.
10 “N mɔmaan tee nan saak nan sakaana
nba tuu nyi sanpagbant ni ki baa maant tiŋ nae.
Ŋanne tuu te ki bonbuburit kpaatir, ki bia te li naan,
ki bi jikit ki buur, ki bia tee jeet ki di.
11 Nnae mun ki mɔmaan nba ki n saa pak na sii tee,
ki linba ki n lor maa lin tun na kan gbar tumu.
Ki li saa tun linba kur ki n tumir a lin tun.
12 “I tan saa nyi Babilonn nan kpinkpammuko;
ki nyi doo na ni nan parmaasir.
Jɔɔt nan kunkona na tan sii yiin yanii,
ki tiinii tan sii hoot nan kpinkpammuk.
13 Tiŋanii tan saa pia siaminba ki jagotuk be mɔtana na,
ki tulaarii tiinii n pia kunkonii sinsetboa.
Linba na sii tee nyinn nba sii yɔɔ be-e, ki tee tiaru
ki jiin linba ki min Yennu tun na po.”