53
1 Ki niib na jiin a,
“Ŋmee din saa sak linba ki ti tan piak mɔtana na.
Ŋmee din saa fit la Yennu yiikoo bont na ni?
2 Li din tee Yennu lomme nan u toontunnɔ n kpaat
nan bonpipiɔk na, ki baa jiina tinkooŋ ni.
U din ki mɔk sanjaann koo fant nba saa te ki ti niɔŋ n kɔɔu.
Fant siar din kaa u paak. Siar din kaa ki saa te tin nakinɔ.
3 Ti din yisimɔe ki yêtɔ, ki u gubin gaar biak nan tont,
sɔɔ din ki loon wun gotɔ.
Ki ti yêtɔ, ki li naan nan u ki tee siar na.
4 “Ŋaan u din gubin gaar biak nba bo sii tee ti yare,
nan tont nba ki ti bo saa di.
Li kura na, ŋaan ki ti bia dukii nan u biak na tee tubdatue
ki nyii Yennu boor.
5 Ŋaan ti biit paake ki bi paanu daŋ,
ki boou ti yanbɔmm paak.
Ti la laafia u biak nba ki u dii na paake.
Waa gaar tanpakii na paak, ki ti la laafia.
6 Ti kur din tee nan pei nba tuu bot nae,
ki sɔɔ kur tɔk u sɔnu.
Ŋaan ki Yennu te ki ti tubdatu na baa u paak,
tubdatu nba bo kpaa ti kur na.
7 “Bi din diau ninmɔnne,
ŋaan ki u gubin gaar nan sikin-n-mɔŋ;
u din ki pak nan mɔbonna,
ki tee nan pegann nba ki bi tuu yaa bin kɔtɔ na,
ki bia tee nan peeuk nba ki bi tuu yaa bin koor u kobit na,
u din ki pak nan mɔbonna.
8 Bi din soorɔ ki bu u buut, ki saan nanɔ a bin kpiu,
ki sɔɔ baka kaa u po. Bi din kpiiu, ti niib biit paake.
9 Bi din kpab ŋɔɔ nan biit damme ki sikin kaauk ni,
ki piiu nan mɔkita, ŋaan ki u lek ki ban biir siar,
koo ki faar faaki.”
10 Ki Yennu yet a, “Li din tee n loomme nan wun di biak.
U kuun din tee maruŋo a lin baar nan nyikinchab biit paak;
ki linba na paak ki u saa la yaaboona.
U manfoor saa yukir, ki u niŋe ki n mɔlor saa gbee.
11 U biak dinu poor po ki u saa la parmaasir,
ki bann nan u ki dii biak yann kaa.
N toontunmɔnɔ nba ki n par mei u paak na
saa gaar nisaarii bonchiann tubdatu,
ki u paak n saa nyik chabib.
12 Li paak, n saa turɔ binbeboor nba mɔk baakir,
ki li tee nijaana nan yiikoo damm sinsuuk ni.
U yanbɔɔte ki u chab u manfoor,
ki gaar yanbɔndamm bonchiann paak ki dii biak,
ki miar Yennu a wun nyik chabib.”