46
1 “Babilonn yennii na joontue na.
Bi din jiantir Bel nan Nebo,
ŋaan mɔtana, boniie jii yennii maŋ,
ki bi tee jika ki teen bonkobit nba baka na.
2 Pata na kan fit tinn bi mɔŋ. Bi nyannibe ki jiib yaat.
Babilonn yennii na joontue na.
3 “Jakɔb yaaboona, gbiintir turin man,
yimm n niib nba tenn na kur. Mine dia-i bisin niŋa.
4 Mine tee i Yennu, ki sii dia-i nan yaa tan saa kpet,
ki i yut n penn.
Mine nami ki sii gorii-i. N saa turi sommir ki tinni.”
5 Ki min Yennu yet a, “I saa bikinin nan ŋmee?
Sɔɔ be ki tee nan min na-a?
6 Niib tuu sat bi likbɔɔrii ki nyinn salimmɔna,
ki bikii salimpeena churu paak.
Bi tuu jii saauk daanɔe, wun nan patir,
ki bi gbaa ki jiantirir.
7 Bi tuu wokitire ki buk ki saan sennir,
ki li see, ki kan fit chat baa sennir siaminba na.
Nirɔ-i miar siar, li kan fit jiin, koo ki tinnɔ biiru ni.
8 “Yimm yanbɔndamm, ii tian linba na man.
Ii dukin maa tun linba.
9 Ii tiar linba din tun sian yoowa na.
Ii sak nan min kuukɔɔe tee Yennu,
ki sɔɔ ji kaa ki tee nan min na.
10 Pinpiik ni, n din yet linba tan saa tumewa,
ki wann linba tan saa teen,
ki yet nan n lora kan ban gbar tumu;
n saa tun linba kur ki n dukin nan man tuma.
11 N yi jasɔɔe, maa wun nyii yondo po ki baar.
U saa baar nan kanbiɔk nba tuu sik nae, ki n lor na n gbee.
Mine pak na, ki li lek saa tuma.
12 “Gbiintir turin man, yimm tubkangbata nba dukii
nan nyannu boor fɔkewa na.
13 N chari nan nyannu daar nae, ki nakint, li ki fɔk nan waama.
N nyannu na kan wei nan baaru.
N saa tinn Jerusalem-e, ki Israel teeb n la baakir leŋ.”