11
Ki jiin parmaasir digbann na po
1 Defid naan ŋaateeb na tee nan tiik nba ki bi chɔɔ lu-u nae; yiinu nba tuu tuk tigbir paak biaŋinba na, nnae ki kpanbar paaŋ saa nyi Defid yaaboona na ni.
2 Yennu Seeke saa turɔ yanfoon nan bannu nan minu
nba ki u sii dia u niib.
U sii mi Yennu loomm ki baakitɔ,
3 ki sii mɔk parpeenn nan Yennu mɔsaku.
U kii gorii numpo koo ki gbia bi yaa kaa ki bu buuti.
4 U saa bu tarii buut fanu, ki kɔn talas damm paak.
U tuu saa tur mɔbe ki bin dat niib tuba, ki nibiit na saa kpo.
5 U saa dia u niib nan mamɔmm nan binbenŋaŋ.
6 Kinkata nan pei tan saa lakin be nan parmaasir,
ki naamuut nan bupanii tan saa lakin dɔɔr.
Ki naabis nan yanbɔrbis tan saa lakin di, ki waas kpaarib.
7 Ki nei nan naamuut tan saa lakin di,
ki bi waas lakint dɔɔ nan parmaasir.
Ki yanbɔra saa ŋman mɔɔt nan nei nba ŋman mɔɔt biaŋinba na.
8 Bonbuna tan sii jerin waalabirii, ŋaan kan la daŋi.
9 Siar sii kaa Yennu kasii kunkonn Sayɔnn paak ki tee daŋ,
koo biiti.
Tiŋ na tan saa gbee nan Yennu bannu,
nan mɔkgbeŋir nba gbee nan nyun nae.
Ki jiin binba be boorganu tinii ni jenu po
10 Daar baate ki kpanbar paaŋ tan saa nyi kpanbar Defid naan naakuuk ni ki tee nyinn ki tur booru kur. Bi tan saa lakin u naan digbann na ni, ki turɔ baakir.
11 Li daar-i baar, Yennu saa ŋamm jii u paŋ na ki jen nan u niib nba biar Asiria nan Ijipt nan Patros nan Sudann nan Elam nan Babilonn nan Hamaf tinii ni, nan mɔkgbiant nan nyun ni kunkona paak na, bi doi ni.
12 Yennu saa donn u nyinn fariŋ ki wann digbana nan u bia lakint Israel nan Juda niib nba yat nae, ki nyi namm durinya loka ŋanna kur po, ki jent namm.
13 Israel tingbouŋ ji kan fumm nan Juda tingbouŋ, ki Juda teeb mun ji kii tee Israel teeb dataaki.
14 Bi saa taan ki lek Filistia teeb nba be yonbaa po, ki fat niib nba kar yondo po na bona. Bi saa nyann Edom nan Moab teeb, ki Amonn teeb saa sak bi mɔb.
15 Yennu saa te ki Sues mɔkgbeŋir n fɔɔr, ki bia baar nan wontouŋ ki lin fɔɔr Yufrates mɔkir, ki kpenbis ŋanlore-e saa tenn, ki sɔɔ kur saa fit somm poot.
16 Sɔnjar saa nyi Asiria ki tur u niib nba tee Israel teeb ki tinn leŋ na, nan laa din tun biaŋinba ki tur bi yeejamm, yoo nba ki bi din nyii Ijipt na.