Ⅴ
Ci kan sinnyɛɛm kɩ
Ⅰ Mɔɔ ci yɩ gʊaa k'a nɩ nyɩntam duu bɩ ra bɩ bɩsɩ wɔ ʊ, n n a gʊrsɩra ba a nɔ ʊ kan a burə kɩ, n n a kʊsɩ kʊsɩrɛ saanhɩna m.
Ⅱ Mɔɔ malɛɛka paŋŋazaa yɩ, an n'a hɩm kan paŋŋa kɩ, a ʊ:
Nka y'a ga m, an ci bɩ gʊ, an a kʊsɩrɛrɔ wɔɔ cincer?
Ⅲ Bɩ gʊaa ba ʊ an nɩ brama gɛɛ, tara burə ʊ gɛɛ, tara noom ʊ, an n'a dam ma, an ci bɩ gʊ, gɛɛ an dɩga a y.
Ⅳ Bɩ, mɔɔ heer a zar kʊ n n gʊaa yɩ an a ga m an ci bɩ gʊ, gɛɛ, an dɩga a bɩ tɔ ma.
Ⅴ Gʊɔɔgusinno wɔɔ gʊaa deem n a hɩ mɔɔ m, a ʊ:
Ɩ b'ɩ heer zar y. Ba n nɩ, Ziida do poozaa k'an Davɩd yaŋŋa bɩ, k'a yɩ damazaa bɩ, an nɩ ci bɩ gʊm kan a kʊsɩrɛrɔ saanhɩnarɔ wɔɔ kɩ.
Ⅵ Kɛɛrɛ bɩ, mɔɔ sinnyɛɛm yɩ an jɩm, ɩ ʊ, a zɛ n y'a ʊ, duu bɩ bire ʊ, hɔɔmɩsɩɩrɔ wɔɔ kan gʊɔɔgusinno wɔɔ kɩ m bɩr ma. A mɩnnɔ saanhɩna kan a mɩnyaarɔ kɩ saanhɩna, ŋ mɩŋŋɔɔ n Woso ɛspri saanhɩnarɔ k'a ŋ nyɔɔ tara burə ʊ rɔ wɔɔ.
Ⅶ A a zɔ k'a ci bɩ si bɔ nɩ nyɩntam duu bɩ burə ʊ bɩ bɩsɩ wɔ ʊ.
Ⅷ K'a ci bɩ si bɩ, hɔɔmɩsɩɩrɔ si rɔ wɔɔ kan gʊɔɔgusinno buhɩra yaa si rɔ wɔɔ kɩ kukurə zɛ sinnyɛɛm bɩ taa. Gʊaa biyəə nɩ kɔnnɩ m kan sarma laagarɔ kɩ, tidəər nyisi nɩ ŋ hɩnhan. Wosogʊɔɔ yaadarɛ m.
Ⅸ Ŋ nɩ laa daa lɔrɛ, ŋ ʊ:
«Ɩbɩɩ y'ɩ ga m ɩ ci bɩ si,
ɩ kʊsɩrɛrɔ wɔɔ cincer,
bala, n y'ɩbɩɩ zɛ ɩbɩɩ n gʊɔɔ bʊmbɔ do haay nɔ ʊ,
lemim biyəə nɔ ʊ,
kʊrɔ y'a hʊnhɔ kɩ nɔ ʊ,
tara y'a hʊnhɔ ɩ ma bɩ m,
ɩ ŋ ka Woso ʊ.
Ⅹ Ɩbɩɩ ŋ ba cinno,
mannɩbənno wɔɔ Woso minto,
bɩ ŋ cirbəə bɩm tara burə ʊ.»
Ⅺ Mɔɔ dɩga, m malɛɛkarɔ cir leer ma, ŋ lɛ tisi-tisi kan tisi-tisi k'a lɛ ba ʊ y, ŋnɩ bɩr duu bɩ ma kan hɔɔmɩsɩɩrɔ kɩ, gʊɔɔgusinno kɩ.
Ⅻ Ŋ n a leer busu kan paŋŋa kɩ, ŋn'a hɩrɛ, ŋ ʊ:
«Sinnyɛɛm kʊ ŋ y'a zɛ b'a ga m an paŋŋa yɩ kan arzaka kɩ, mindɔrɛ kɩ, kan dama kɩ, daʊrɛ kɩ, cirbəə kɩ, lɛbɔʊrɛ kɩ.»
ⅩⅢ Hɔɔdarɛ haay k'a nɩ brama, an nɩ tara burə ʊ, tara noom ʊ kan hi burə kɩ hɔɔmɩsɩɩrɔ haay kʊ ŋ nɩ ta ŋ ʊ rɔ wɔɔ, mɔɔ ma ŋn'a hɩrɛ, ŋ ʊ:
«Bɔ nɩ duu burə ʊ kan sinnyɛɛm bɩ kɩ m lɛbɔʊrɛ, daʊrɛ, cirbəə kan paŋŋa kɩ yɩ dɔɔraa k'a nyarɛ ba ʊ nɔ ʊ.»
ⅩⅣ Hɔɔmɩsɩɩrɔ siro wɔɔ n'a hɩrɛ, ŋ ʊ: «Amina!» Gʊɔɔgusinno wɔɔ n kukurə zɛ, ŋn'a daŋ ʊ.