HƖNKARƐ CI
Hɩnkarɛ Ci bɩ
gasʊʊrɛ
N y'a gɩngarɛ n ʊ, Zaan kʊ Yeezuu karɩndanyɩ m an Yeezuu Krista lemim nyɩnta ci ba an ciro kaakʊrɔ wɔɔ ba b'ɩ Hɩnkarɛ Ci bɩ ba sɔ.
A ɩ gɔɔta Kristazibəəzannɔ bueerehɩɩyɔɔ wɔɔ barla an gusi. N n a nyasʊ Krista kasɛtɩ bɩ karɛ tɔ ma n nɩ ta m kʊ k'a nɩ hi bire ma n n'a birm Patmɔs ʊ b'ʊ. Woso n hɔ k'an ta ʊ an nɩ zɛm bɩ bʊr bɩ hɩnka m k'a n a da ci ʊ, an a nyɔɔ sɩrakənno sokʊmarɔ kʊ ŋ nɩ fɩr yɩm Krista tɔ ma am a hɔ bɩ m nɔ wɔɔ ma, kʊ ŋ nɩ gɔɔta ŋnɩ jɩm kɔɔkɔɔ ŋn'a tɔ ʊ, bala, kristagʊɔɔ kʊ ŋ nɩ kʊrɔ kʊ Rɔm a ga m, an a so ʊ ŋ rɔ wɔɔ haay ɩ fɩr yɩm gʊta Krista tɔ ma. Nyɩnta Zaan ʊ Azii minɛɛr ʊ. Kristagʊɔɔ sokʊmarɔ k'a ci bɩ nyɔɔ ŋ ma rɔ wɔɔ saanhɩna, nyɩnta ŋ y'a ʊ kʊ bɩ do ʊ sɔ.
Ci bɩ, Krista k'a paŋŋa bʊr a jɩnnɔ ra an nɩ zɛm bɩ ŋ da an a ka a sɩrakənno wɔɔ m mɛnyɔɔ yɩ, ŋnɩ cirbəə bɩ kan a kɩ heernyɔɔ kan laafɩɩ kɩ nɔ ʊ bɩ mim an a dɩndam makrarɔ nɔ ʊ.
N n ci bɩ ba k'a nyibəə da sɩrakənno wɔɔ ma y, bɩ k'a ŋ heer yo durnya bɩ dɔmɩnnɔ kʊsɩrɔ nɔ ʊ. Hɩnkarɛ Ci bɩ makrarɔ wɔɔ, a da ŋ nawʊm wɔɔ han kʊ Krista zɛ bɩ kan a mɩmbɔʊrɛ kɩ zibəə bɩ nyɔɔdʊ k'an ta ʊ her kan booti kɩ bɩ dɔ mɩŋŋa.
Ⅰ
Gasʊʊrɛ
Ⅰ Yeezuu Krista bɩ, Woso y'a ka ʊ, k'an hɔ k'a nɩ zɛm bɩ nyɩnta ʊ dɩɩtaa bɩ hɩnka a zibəənyɩnɔ m. A malɛɛka a nyɔɔ k'an b'a hɩ a zibəənyɩ Zaan m.
Ⅱ A n nɩ Woso lemim bɩ hɩrɛ, an Yeezuu Krista kasɛtɩ ka kan hɔ haay k'a a yɩ bɩ kɩ.
Ⅲ Mimbirenyɩntazaa m gʊaa k'a nɩ karɩnda bam, kan gʊɔɔ kʊ ŋ n'a tʊr kam wosolɛsinnɩsora meerbaa ma rɔ wɔɔ kɩ, ŋn'ɩ zum hɔ kʊ ŋ y'a gʊrsɩra ba b'ʊ. Bala, wakatɩ b'a zɔ.
Yaadarɛ kristagʊɔɔ kʊ ŋ nɩ Azii ʊ
Ⅳ Mɔɔ mɩŋŋa Zaan m nɩ gʊrsɩra naa do bam kristagʊɔɔ sokʊmarɔ saanhɩnarɔ kʊ ŋ nɩ Azii kʊ ʊ rɔ wɔɔ ma:
K'a barka kan laafɩɩ kɩ yɩ, gʊaa k'an ta ʊ, an nyɩnta ʊ, an nɩ zɛm bɩ zi, kan ɛspri saanhɩnarɔ kʊ ŋ n a duu jɩr ʊ rɔ wɔɔ kɩ zi,
Ⅴ kan Yeezuu Krista, kasɛtɩzaa paan…, k'a lɛɛ ka an a mɩm bɔ ʊ gəəno bire ʊ, a m durnya cinno wɔɔ cir bɩ kɩ zi.
Bɔ nɩ wɔɔ ŋʊam, an wɔɔ mimbʊnyaarɔ sʊrgɔ a ma m,
Ⅵ an a ka, wɔɔ n ʊ ba a cirbəə mannɩbənno a Zɩ Woso zibəə minto. A y'a ga lɛbɔʊrɛ m kan paŋŋa kɩ dɔmɩm k'a nyarɛ ba ʊ. Amina!
Ⅶ Ba n nɩ, a ɩ zɛm warkʊ nɔ ʊ, bɩ gʊaa haay y'a yɩm, baa gʊɔɔ kʊ ŋ y'a zɛ rɔ wɔɔ y'a yɩm sɔ. Tara burə gʊɔɔ heerzarlɛ nyi karɛ a minto. Ɩɩn…, k'an yɩ maam!
Ⅷ Zuuba Woso a hɩ, a ʊ: Mɔɔ m lɛɛkarɛzaa, mɔɔ m jɛzaa. Mɔɔ n ta ʊ, m nyɩnta ʊ, m n nɩ nyɩntaŋ ʊ, hɔ haay Zuuba.
Zaan Gʊaanyɩ bɩ makra yɩ
Ⅸ Mɔɔ mɩŋŋa Zaan, awɔɔ danyɩ awɔɔ zukuuzaa, fɩryɩrɛ, cirbəə kan tʊntɔʊrɛ kɩ Yeezuu zuure nɔ ʊ, nyɩnta mɔɔ ʊ, m nɩ tara deem kʊ hi bɩr ma, n n'a hɩm ma Patmɔs ʊ, Woso lemim kan Krista kasɛtɩ karɛ kɩ minto.
Ⅹ *Sɛnt-Ɛspri zer mɔɔ ra Zuuba dɔmɩm deem hinni ʊ, mɔɔ n leer paŋŋazaa ma m jɛ ʊ, ɩ ʊ, huure n n'a hɛm, an n'a hɩrɛ, a ʊ:
Ⅺ Hɔ k'ɩbɩɩ n'a yɩm bɩ gʊrsɩra ba ci ʊ, ɩ nyɔɔ kristagʊɔɔ sokʊmarɔ saanhɩnarɔ wɔɔ ma: Efɛɛzɩ ʊ, Simɩrnɩ ʊ, Pɛrgam ʊ, Tɩyatɩɩr ʊ, Sardɩ ʊ, Filadɛlfii ʊ, kan Lawodisee kɩ ʊ.
Ⅻ Mɔɔ n bɔ kʊ m dɩga gʊaa k'a nɩ meer bam kan mɔɔ kɩ bɩ ma. Bɩ kʊ mɔɔ m wusigə bɩ, mɔɔ sarma fɩtɩrɛrɔ yɩ saanhɩna.
ⅩⅢ Fɩtɩrɛrɔ wɔɔ bire ʊ bɩ, mɔɔ gʊaa yɩ, an bɔ kʊ ʊ ɩ ʊ, Gʊaanyɩ m, an huu jintə da a ra, an sarma hɔsoaʊ so a cɩ ʊ.
ⅩⅣ A mim bɩ kan a minkə bɩ kɩ nyɩnta fu fɩtɩtɩ ɩ ʊ, ser ka m, gɛɛ lajaa m, a mɩnyaarɔ wɔɔ nɩ yɩrɛ ʊ, sɛwurə m.
ⅩⅤ A gannɔ bɔ kʊ ʊ kan zaan kʊ n y'a sʊr, an nɩ yɔm bɩ kɩ. A leer nɩ yɩrɛ ʊ hiro gʊtɔɔ susur m,
ⅩⅥ an nɩ monyaa saanhɩna m a bɩsɩ ʊ. Kargʊ lɛ hɩɩya nɩ bɔrɛ a lɛ ʊ. A meer nɩ yɔrɛ ɩ ʊ, woso nɩ gum kan paŋŋa kɩ.
ⅩⅦ Kʊ mɔɔ yɩ bɩ, mɔɔ m do a taa ɩ ʊ ga mɔɔ ʊ. A n a bɩsɩ wɔ ka mɔɔ ra, an a hɩ, a ʊ: Ɩ da bɩ bɔ ʊ y, mɔɔ m lɛɛkarɛzaa, mɔɔ m jɛzaa,
ⅩⅧ mɔɔ n mɩsɩr. Mɔɔ nyɩnta, m ga, bɩ ba n nɩ, mɔɔ mɩsɩr dɔmɩm k'a nyarɛ ba ʊ nɔ ʊ, bɩ mɔɔ ɩ zɛ cɛlɛnyɩnɔ m kan gəənokʊ hɔɔ kɩ.
ⅩⅨ Hɔ k'ɩbɩɩ yɩ bɩ gʊrsɩra ba, kan hɔ kan ta ʊ kɩ, kan hɔ k'a nɩ zɛm bɩ bʊr bɩ kɩ.
ⅩⅩ Ba monyaa saanhɩnarɔ k'ɩbɩɩ ŋ yɩ mɔɔ bɩsɩ wɔ ʊ kan sarma fɩtɩrɛrɔ saanhɩnarɔ wɔɔ kɩ jɩ n na: Monyaa saanhɩnarɔ wɔɔ, kristagʊɔɔ sokʊmarɔ saanhɩnarɔ wɔɔ malɛɛkarɔ m. Fɩtɩrɛrɔ saanhɩnarɔ wɔɔ kristagʊɔɔ sokʊmarɔ saanhɩnarɔ wɔɔ m.