Ⅹ
Zɩɩfʊrɔ kan do vantɔɔ gʊɔɔ kɩ Zuuba deem
Ⅰ M danyɩnɔ, hɔ kʊ mɔɔ lɛ n taa, m n'a yɛm Woso han bɩ, a yɛ mɔɔ nawʊm kʊ zɩɩfʊrɔ wɔɔ n bʊmbɔrɛ yɩ.
Ⅱ Bala, mɔɔ m da ma, m a hɩ, m ʊ, ŋ y'a tʊntɔŋ ʊ Woso kama nɔ ʊ, bɩ hɔdɔrɛ ɩ jɩra tʊntɔʊrɛ bɩ do nɔ ʊ.
Ⅲ Kʊ ŋ n Woso k'a nɩ gʊaa bam tɩrga bɩ zaa jɩ dɔ bɩ, a mɩŋŋɔɔ m tɩrgabaa zaa ŋ y'a cɩnta, naa do a ka ŋ n zu zaa kʊ Woso nɩ gʊaa bam tɩrga b'ʊ y.
Ⅳ Bala, Krista hɔ kʊ Moyiisi lɛrɔ wɔɔ a cɩnta bɩ ba haay an a nya, kɛɛrɛ naa, gʊaa haay k'a sɩra ka Yeezuu Krista ʊ bɩ, Woso ɩ bɩ zaa bam tɩrga.
Ⅴ Moyiisi tɩrgabaa k'a n'a tom lɛrɔ nɔ ʊ bɩ mim hɩ, a ʊ: ‹Gʊaa k'a nɩ zum lɛrɔ wɔɔ haay ʊ bɩ mɩsɩrbaa bam lɛrɔ wɔɔ tɔ ma.›
Ⅵ Tɩrgabaa kʊ sɩrakarɛ n'a kam bɩ mim ba n nɩ: ‹Ɩ b'a hɩ ɩ heer ʊ, ɩ ʊ, nka n nɩ tam brama?› Naa do naa, a hɩ ɩbɩɩ ʊ, k'ɩ ʊ, nka n nɩ tam brama an a ka Krista m zer?
Ⅶ Ɩ b'a hɩ sɔ, ɩ ʊ, ‹nka n nɩ zerm tara noom ʊ?› Ncɩnaaʊ naa, a hɩ ɩbɩɩ ʊ, k'ɩ ʊ, nka n nɩ zerm an a ka Krista m bɔ gəəno bire ʊ?
Ⅷ Lemim nyɩnta bɩ y'a hɩrɛ a ʊ lɔ kɛɛrɛ? A y'a hɩrɛ, a ʊ: ‹Lemim bɩ y'ɩ jɩr ʊ, ɩbɩɩ lɛ kan ɩ heer kɩ an ta ʊ.› A n bɔkarɛ, sɩrakarɛ lemim bɩ do wɔɔ n n'a pa dam naa.
Ⅸ K'ɩbɩɩ bɔ ɩ lɛ ma gʊaa haay lɛɛ, ɩ ʊ, Yeezuu Krista m Zuuba, k'ɩbɩɩ sɩra ka ɩ heer ʊ, ɩ ʊ, Woso a mɩm bɔ ʊ gəəno bire ʊ, ɩbɩɩ bʊmbɔrɛ yɩrɛ.
Ⅹ Bala, kʊ gʊaa sɩra ka a heer ʊ, bɩ Woso a ba tɩrga. Kʊ gʊaa a sɩrakarɛ bɔ a lɛ ma gʊaa haay lɛɛ, bɩ Woso a zaa bʊmbɔ.
Ⅺ Bala, Wosoci a hɩ, a ʊ: ‹Kʊ gʊaa sɩra ka ʊ, a bɩ nyannɩ bɩrɛ y.›
Ⅻ Naa minto bɩ, zɩɩfʊ kan do vanta gʊaa kɩ b'a hʊnhɔ y, ŋ haay Zuuba deem, an nɩ hɔ mɩŋŋa bam gʊɔɔ haay kʊ ŋ nɩ yaa dam nɩ rɔ wɔɔ m.
ⅩⅢ Bala,
gʊaa biyəə k'a nɩ Zuuba tɔ birm bɩ, a bʊmbɔrɛ yɩm.
ⅩⅣ Bɩ, ŋ y'a bam lɔ ŋn'a bir, kʊ ŋ n sɩra ka ʊ? Ŋ y'a bam lɔ ŋnɩ sɩra ka ʊ, kʊ ŋ n a mim ma? Ŋ y'a bam lɔ ŋn'a mim ma, kʊ gʊaa n a pa da ŋ nɩ?
ⅩⅤ Bɩ, gʊaa y'a bam lɔ k'a mim pa da, kʊ n n'a nyɔɔ? Amba n y'a gʊrsɩra ba Wosoci ʊ, n ʊ: ‹Gʊɔɔ kʊ ŋ nɩ zɛm k'a bɩ lemim nyɩnta bɩ pa da rɔ wɔɔ leekure ɩ heernyɩnta kam.›
ⅩⅥ Bɩ, gʊɔɔ wɔɔ haay bɛɛ lemim nyɩnta bɩ si y. Amba wosolɛsinnɩsorazaa Ezayii a hɩ, a ʊ: ‹Zuuba, nka ɩ sɩra ka lemim kʊ wɔɔ pa da b'ʊ?›
ⅩⅦ Naa minto bɩ, bɔ sɩrakarɛ n nawʊm lemim kʊ gʊaa n'a tʊr kam ma bɩ nɔ ʊ, bɩ lemim bɩ do k'a n'a mam bɩ, Krista lemim m.
ⅩⅧ Bɩ, mɔɔ laaka dam kɛɛrɛ wa, Israyɛl do bɩ n lemim bɩ ma ra? Ŋ y'a ma sɩɩn! Bala, n y'a da Wosoci ʊ, n ʊ: ‹Ŋ leer lee ku tara burə haay ra, ŋ meerbaarɔ m ta durnya lɛzojɩ ʊ.›
ⅩⅨ Mɔɔ yɩ m yarɛ m laaka da sɔ, Israyɛl do bɩ, an lemim bɩ jɩ ma ra? A lɛɛkarɛ hɔ, Moyiisi a hɩ, a ʊ: ‹Mɔɔ y'a karɛ awɔɔ m jɩm ba do kʊ mɔɔ do paan… bɛɛ m bɩ minto, mɔɔ y'a karɛ awɔɔ nɔ n ma ʊ, do k'a hɔɔn ba ʊ tɔ ma.›
ⅩⅩ Ezayii n a ya, an a hɩ, a ʊ: ‹Gʊɔɔ kʊ ŋ bɩr a kam mɔɔ ma rɔ wɔɔ ɩ mɔɔ yɩ, mɔɔ m hɩnka gʊɔɔ kʊ ŋ n hɔsɩ yɛ mɔɔ han rɔ wɔɔ m.›
ⅩⅪ Kʊ Israyɛl mim nɩ, Woso a hɩ, a ʊ: ‹Dɔmɩm haay, mɔɔ m wɔ nyɔɔ do k'a bɩr yɛrɛ y, an nɩ bɩsɩ kam bɩ zi.›