Ⅲ
Wosolɛsinnɩsorazaa Zaan-Batiisi
(Matiyee 3.1-12; Markɩ 1.1-8; Zaan 1.19-28)
Ⅰ Rɔm cir Tibɛɛr cirbəə bɩrɛ dɔɔraa bueeresoor hɔ ma bɩ, Pɔns Pɩlatɩ nyɩnta an a so Zidee gʊrga ʊ, cir Hɩrɔɔdɩ n a so Galilee ʊ, a danyɩ cir Filipi n a so Itiree kʊ ʊ kan Trakonitɩ kʊ kɩ, cir Lizaniyas n a so Abɩlɛnnɩ kʊ ʊ.
Ⅱ Hannɩ kan *Kayiifʊ k'ɩ nyɩnta wosocɛmannɩbənno jɩtannɔ. Dɔmɩm bɩ do ʊ bɩ, Woso a lemim ka Zakarii nyɩ Zaan ʊ poohɔɔn ʊ.
Ⅲ Bɩ Zaan ta Zʊrdɛn gʊrga haay ʊ, an nɩ heerlʊrlɛ kan batɛm kɩ mim pa dam gʊɔɔ m, ŋ mimbʊnyaarɔ sugur yɩrɛ minto,
Ⅳ amba n y'a gʊrsɩra ba wosolɛsinnɩsorazaa Ezayii ci nɔ ʊ bɩ m:
Gʊaa leer nɩ bɔm poohɔɔn ʊ:
K'a Zuuba zaa banka, k'a zaafɔɔrɛrɔ wɔɔ bɩmbanka kʊ ŋ nɩ yɩ tɩrga.
Ⅴ K'a hɔ zar toko haay ʊ, k'a ciro kan dimbirlɔ kɩ zɛ a wʊta, k'a zaarɔ kʊ ŋ y'a tʊntɔ rɔ wɔɔ hʊnhʊr, bɔɔ ɩ bɩ mɩŋŋa rɔ wɔɔ, k'a ŋ banka a ŋ lʊnlɔ.
Ⅵ Bʊmbɔrɛzaa k'a a to Woso zi bɩ, a gʊɔɔ bʊmbɔm do haay nɔ ʊ.
Ⅶ Zamaa gʊta nɩ zɛm Zaan zi, k'a bɩ batɛm si. A n n'a hɩrɛ ŋ nɩ, a ʊ: «Awɔɔ naa, cɩrka do n'awɔɔ m. Nka y'a hɩ awɔɔ m, a ʊ, a a si a bɔ lɛm Woso heerbusu k'a nɩ zɛm booti m bɩ lɛɛ?
Ⅷ K'a zi mɩŋŋa ba amba gɔ nɩ nyɩ dam bɩ m, k'an zu kʊ ʊ kan awɔɔ heerlʊrlɛ bɩ kɩ, b'a b'a hɔɔn da a ʊ, awɔɔ yaaba m Abraham nɩ y. Bala, mɔɔ y'a hɩrɛ awɔɔ m, mɔɔ ʊ, Woso a da ma, an jaarɔ nɔɔn duro wusigə an ŋ ba Abraham nyɩnɔ.
Ⅸ Bala, n sɩga banka an nɩ cɩntam k'an gɔrɔ zɩnzɛ ra ŋ məsi ma. Gɔ niŋŋə k'a bɩr nyɩ mɩŋŋa dam bɩ, n y'a zɛm la, n a da sɛ ʊ.»
Ⅹ Zamaa bɩ barla gʊɔɔ gɔsɩnnɔ n laaka da, ŋ ʊ: «K'a maam, k'ʊ a ba lɔ?»
Ⅺ A n a nyɩ bɔ ŋ nʊ, a ʊ: «Kʊ gʊaa ɩ huu m hɩɩya, k'an a jir kan gʊaa k'a ba m bɩ kɩ. Gʊaa k'an ta hɔbɩrɛ m bɩ, k'an a ba maam sɔ.»
Ⅻ Yawʊrsinno n bʊr sɔ k'a bɩ batɛm si, ŋnɩ laaka da Zaan han, ŋ ʊ: «Karɩnsaamba, bɔ wɔɔ ʊ ga m, ʊ a ba?»
ⅩⅢ A n a hɩ ŋ nɩ, a ʊ: «A bɩ busoo si an lɛ da lɛ kʊ n y'a ka bɩ ra y.»
ⅩⅣ Yarbənno n a lar sɔ, ŋ ʊ: «Bɩ wɔɔ, bɔ wɔɔ ʊ ga m, ʊ a ba?» A n a nyɩ bɔ ŋ nʊ, a ʊ: «A bɩ paŋŋa ba gʊaa ma y, b'a bɩ ŋʊaar ba a ka gʊaa lɛ m k'a busoo yɩ y. Bɩ k'a zerga a yawʊra bɩ rɛ.»
ⅩⅤ Zamaa bɩ nɩ dɔm hɔ k'a nɩ zɛm bɩ nyɩnta ʊ bɩ ma. N n'a hɔɔn dam. N nɩ laaka darɛ a mɩŋŋa han a heer ʊ, ŋ ʊ: «Krista bɛɛ m Zaan bɩ m na?»
ⅩⅥ Zaan n a hɩ ŋ haay m, a ʊ: «Mɔɔ naa, batɛm mɔɔ n'a karɛ awɔɔ ʊ hi ʊ. Bɩ, gʊaa ɩ zɛm, a paŋŋa n lɛ da mɔɔ ra, bɩ mɔɔ n m ga m, m a kʊsɔrɔ bar tɔkkɛ hʊr y. A batɛm karɛ awɔɔ ʊ Sɛnt-Ɛspri m kan sɛ kɩ m.
ⅩⅦ A gʊr sa a wɔ ʊ, k'a tʊyaa kʊnkɔ m, k'a hɔyaa zo m. A hɔyaa bɩ zarlɛ a sɩ ʊ, a sɛ k'a bɩr lihim bɩ nyam puur b'ʊ.»
ⅩⅧ Ncɩnaaʊ bɩ, Zaan a ya, an minno gɔsɩnnɔ hɩ gʊɔɔ wɔɔ m, an nɩ lemim nyɩnta bɩ hɩm Israyɛl gʊɔɔ wɔɔ m.
ⅩⅨ Bɩ kur bɩ, Zaan nyaa ba kan cir Hɩrɔɔdɩ kɩ, a cɛmba lʊ Hɩrɔdɩyaadɩ k'a yɔm, kan a hɔbaa bʊnyaarɔ vantɔɔ wɔɔ haay kɩ minto.
ⅩⅩ Kɛɛrɛ bɩ, Hɩrɔɔdɩ a ya, an mimbʊnyaa ba an a na ma: a a ka n nɩ Zaan du lɔnnɔcɛ ʊ.
Yeezuu batɛm sire
(Matiyee 3.13-17; Markɩ 1.9-11)
ⅩⅪ Dɔmɩm kʊ zamaa bɩ haay nɩ batɛm siŋ ʊ bɩ, Yeezuu batɛm si sɔ. K'a nɩ yaa dam bɩ, brama a gʊ,
ⅩⅫ *Sɛnt-Ɛspri n cirpʊʊrɛ mɛ sa, an zer a mim ʊ. Leer n a to brama an n'a hɩrɛ, a ʊ: «Mɔɔ Nyɩ n'ɩbɩɩ m, mɔɔ ɩbɩɩ ŋʊa gʊta, mɔɔ nɔ yɩ ɩbɩɩ ra.»
Yeezuu yaabɔɔ
(Matiyee 1.1-17)
ⅩⅩⅢ Yeezuu dɔɔraa bɩ, a ga kʊ ʊ a ba kan bukərku kɩ, an bɔkarɛ an a zibəə sa. Ŋ y'a hɔɔn darɛ, ŋ ʊ Zozɛf nyɩ m.
Zozɛf zɩ m Helii m,
ⅩⅩⅣ Helii zɩ m Mataat m,
Mataat zɩ m Levii m,
Levii zɩ m Mɛlkii m,
Mɛlkii zɩ m Yanayɩ m,
Yanayɩ zɩ m Zozɛf m,
ⅩⅩⅤ Zozɛf zɩ m Matatɩyas m,
Matatɩyas zɩ m Amɔs m,
Amɔs zɩ m Nahum m,
Nahum zɩ m Hɛslii m,
Hɛslii zɩ m Nagayɩ m,
ⅩⅩⅥ Nagayɩ zɩ m Maatɩ m,
Maatɩ zɩ m Matatɩyas m,
Matatɩyas zɩ m Semeyini m,
Semeyini zɩ m Yosɛkɩ m,
Yosɛkɩ zɩ m Yooda m,
ⅩⅩⅦ Yooda zɩ m Yohanam m,
Yohanam zɩ m Reeza m,
Reeza zɩ m Zorobabɛl m,
Zorobabɛl zɩ m Salatɩyɛl m,
Salatɩyɛl zɩ m Neerii m,
ⅩⅩⅧ Neerii zɩ m Mɛlkii m,
Mɛlkii zɩ m Adii m,
Adii zɩ m Kozam m,
Kozam zɩ m Ɛlmadam m,
Ɛlmadam zɩ m Ɛɛr m,
ⅩⅩⅨ Ɛɛr zɩ m Yeezuu m,
Yeezuu zɩ m Eliyezɛɛr m,
Eliyezɛɛr zɩ m Yoorim m,
Yoorim zɩ m Mataat m,
Mataat zɩ m Levii m,
ⅩⅩⅩ Levii zɩ m Sɩmɩnyɔɔ m,
Sɩmɩnyɔɔ zɩ m Ziida m,
Ziida zɩ m Zozɛf m,
Zozɛf zɩ m Yoonam m,
Yoonam zɩ m Eliyakim m,
ⅩⅩⅪ Eliyakim zɩ m Meleyaa m,
Meleyaa zɩ m Menaa m,
Menaa zɩ m Matataa m,
Matataa zɩ m Natan m,
Natan zɩ m Davɩd m,
Davɩd zɩ m Yesee m,
ⅩⅩⅫ Yesee zɩ m Yobɛdɩ m,
Yobɛdɩ zɩ m Boozɩ m,
Boozɩ zɩ m Salaa m,
Salaa zɩ m Naasɔɔn m,
ⅩⅩⅩⅢ Naasɔɔn zɩ m Aminadaab m,
Aminadaab zɩ m Admɩnɩ m,
Admɩnɩ zɩ m Arnii m,
Arnii zɩ m Ɛsrɔm m,
Ɛsrɔm zɩ m Farɛɛs m,
Farɛɛs zɩ m Ziida m,
ⅩⅩⅩⅣ Ziida zɩ m Zakɔɔb m,
Zakɔɔb zɩ m Izakkɩ m,
Izakkɩ zɩ m Abraham m,
Abraham zɩ m Taaraa m,
Taaraa zɩ m Nahɔɔr m,
ⅩⅩⅩⅤ Nahɔɔr zɩ m Seruki m,
Seruki zɩ m Ragoo m,
Ragoo zɩ m Falɛkɩ m,
Falɛkɩ zɩ m Ebɛɛr m,
Ebɛɛr zɩ m Salaa m,
ⅩⅩⅩⅥ Salaa zɩ m Kayɩnam m,
Kayɩnam zɩ m Arfasatɩ m,
Arfasatɩ zɩ m Sɛm m,
Sɛm zɩ m Nowee m,
Nowee zɩ m Lamɛk m,
ⅩⅩⅩⅦ Lamɛk zɩ m Matusalam m,
Matusalam zɩ m Enɔk m,
Enɔk zɩ m Yarɛtɩ m,
Yarɛtɩ zɩ m Maleleyɛl m,
Maleleyɛl zɩ m Kayɩnam m,
ⅩⅩⅩⅧ Kayɩnam zɩ m Enɔs m,
Enɔs zɩ m Sɛt m,
Sɛt zɩ m Adam m,
Adam zɩ m Woso m.