Ⅴ
Ⅰ Kʊ wɔɔ dɩga a, wosocɛmannɩbər jɩtaarɛ biyəə bɩ, Woso n'a bɔŋ ʊ gʊɔɔ gaa ma, an n'a darɛ a zibəə ʊ gʊɔɔ wɔɔ daahan tɔ ma. A zibəə bɩ, ganwʊrɛrɔ kan mannɩrɔ kɩ an nɩ ŋ kam Woso ʊ, mimbʊnyaarɔ sugur yɩrɛ tɔ ma.
Ⅱ K'a mɩŋŋa ɩ paŋŋawar minno nɔ ʊ bɩ, a a da ma, an gʊɔɔ kʊ ŋ n hɔsɩ dɔ rɔ wɔɔ, kan gʊɔɔ kʊ ŋ nɩ kʊrɔm ma rɔ wɔɔ kɩ mim jɩ ma, an a da ŋ han.
Ⅲ Kʊ paŋŋawarzaa n a mɩŋŋa m bɩ, pakra m k'an mannɩ ba a mɩŋŋa mimbʊnyaarɔ tɔ ma sɔ, amba an n'a bam Israyɛl gʊɔɔ wɔɔ tɔ ma bɩ m.
Ⅳ Gɔsɩ b'a dam ma an a mɩŋŋa gore da ʊ, an a ba mannɩbər jɩtaarɛ a zim nɩ y. Woso mɩŋŋa nɩ gʊaa birm an n'a dam zibəə bɩ do ʊ, amba a a ba kan Aarɔn kɩ bɩ m.
Ⅴ Maam bɩ, Krista bɛɛ y'a mɩŋŋa gore da ʊ, k'a yɩ mannɩbər jɩtaarɛ y. Bɩ, Woso mɩŋŋa y'a hɩ, a ʊ:
Ɩbɩɩ m mɔɔ Nyɩ,
an a sa her ma bɩ,
mɔɔ n'ɩbɩɩ Zɩ.
Ⅵ Wosoci bɩ lɛɛ vanta ʊ, a a hɩ sɔ, a ʊ:
Ɩbɩɩ yɩm mannɩbər dɔmɩm haay nɔ ʊ, amba Mɛlkisedɛkkɩ m.
Ⅶ Yeezuu k'a nyɩnta tara burə ʊ bɩ, a yaa da Woso m gʊta, an a wɔ zɩnzɛ m gʊta, an nyi ka kan zee gʊta kɩ. A n a yɛ Woso k'a a da ma an a yɔ zɛ wɔ ʊ bɩ han k'an a yɔ zɛ wɔ ʊ. Bɩ, Woso a yaa bɩ si, k'a nɩ yɛm Woso hɔɔnhɔ ma bɩ tɔ ma.
Ⅷ Baa kʊ Woso Nyɩ m bɩ, yɛ Woso hɔɔnhɔ ma bɩ dɔ a ʊ, a fɩryɩrɛrɔ haay nɔ ʊ.
Ⅸ Ncɩnaaʊ m, Woso a ka an yɩ amba a a ga m bɩ m fasɩ k'an yɩ bʊmbɔrɛzaa. Maam m, an a ba gʊɔɔ kʊ ŋ nɩ yɛm ma rɔ wɔɔ bʊmbɔrɛ k'a nyarɛ ba ʊ zaa.
Ⅹ Bɩ Woso a hɩ sɔ, a ʊ, a m mannɩbər jɩtaarɛ amba Mɛlkisedɛkkɩ m.
K'a dundo a zi, k'a bɩ sɩrakarɛ to y
Ⅺ Wɔɔ ɩ hɔ m gʊta, k'ʊ a hɩ mim naa do nɔ ʊ, bɩ k'awɔɔ bɩr mim jɩ mam zɔɔ-zɔɔ bɩ, a jɩ dɩnda awɔɔ m wer ta ʊ.
Ⅻ A ga a ʊ m hɔɔ tee… k'awɔɔ n a ba karɩnsaambɔɔ, kan bɩ kɩ, awɔɔ gɔɔta an n'a ŋʊam kʊ n n'a ya n nɩ Woso lemim bɩ minno k'awɔɔ ma a sɩrakarɛ sɩŋŋɩda ʊ bɩ dɩnda a m. Kʊ hɔ m, k'awɔɔ ɩ hɔbɩrɛ gorezaa bɩm, bɩ ayy…, awɔɔ gɔɔta an n'a ŋʊam kʊ n nɩ nyonhi ka a ʊ.
ⅩⅢ Nyɩ ɩ tɩr nyonhi mi, a n hɔ k'an tɩrga gɛɛ bʊnyaa dɔ kʊ nɩ y.
ⅩⅣ Bɩ, hɔbɩrɛ gorezaa bɩ, gʊɔɔ burgurɔ hɔ m, brɔɔ mim ka hɔ mɩŋŋa kan hɔ bʊnyaa kɩ dɔ n n'a bɔ kʊ zi m.