Ⅸ
Busoo zɩnzɛkʊra bɩ bankarɛ
Ⅰ Pakra bɛɛ m kʊ mɔɔ nɩ m ya m ci ba awɔɔ ma, kʊ m daahan kʊ wɔɔ ʊ k'ʊ a ka Zidee gʊɔɔ wɔɔ ʊ bɩ mim hɩ y.
Ⅱ A ŋʊa k'awɔɔ nawʊm paan… k'a a da ŋ han bɩ, mɔɔ dɔ, bɩ y'a ka mɔɔ nɩ m lɛ bɔ awɔɔ ʊ Masedʊan gʊɔɔ wɔɔ lɛɛ, m a hɩ ŋ nɩ, m ʊ: «Akayii kʊ wosogʊɔɔ wɔɔ a banka zu ʊ kara, k'a a da Zidee kʊ wosogʊɔɔ wɔɔ han.» Naa kʊ mɔɔ hɩ ŋ nɩ bɩ, a a ka ŋ gʊɔɔ gʊta nɩ lɛtaama m, k'a a da Zidee gʊɔɔ wɔɔ han sɔ.
Ⅲ Bɩ wɔɔ danyɩnɔ kʊ mɔɔ ŋ nyɔɔ awɔɔ ma rɔ nɔɔm, ŋ nyɔɔ mɔɔ ʊ k'awɔɔ n busoo k'awɔɔ lɛ n taa k'a ka bɩ zɛ kʊ ra, amba mɔɔ hɩ gʊɔɔ gɔsɩnnɔ m mɔɔ ʊ, awɔɔ a banka a nya bɩ m. K'awɔɔ ba ncɩnaaʊ kʊ wɔɔ bɩ lee ku, gʊaa woo… y'a dɔrɛ a ʊ, hɔ kʊ mɔɔ hɩ awɔɔ mim bɩncɛ ʊ bɩ, sɩra m.
Ⅳ Bɩ kʊ wɔɔ bɩ lee ku awɔɔ zi b'ʊ kan Masedʊan gʊɔɔ wɔɔ kɩ, ʊ bɩ dɩga a awɔɔ n a banka a nya y, nyannɩ gʊta wɔɔ nyasʊm, bala, wɔɔ sɩra ka awɔɔ ʊ b'a n yɩ maam y. Bɩ, nyannɩ y'awɔɔ nyasʊm sɔ gʊta an lɛ da.
Ⅴ Naa tɔ ma m mɔɔ n a gɩnga mɔɔ ʊ, a a ga m kʊ m a yɛ wɔɔ danyɩnɔ wɔɔ han kʊ ŋ nɩ lɛɛ ka mɔɔ m awɔɔ zi b'ʊ. K'awɔɔ n busoo k'awɔɔ ʊ k'a ka kan a heer kɩ haay bɩ zɩnzɛ kʊ ra a nya. Awɔɔ busoo bɩ do ler bɔ kara. Ncɩnaaʊ bɩ mɔɔ zɛm bɩ dɩga a awɔɔ busoo bɩ zɩnzɛ kʊ ra a nya, naa y'a hɩnkam sɔ a ʊ, a ka awɔɔ nawʊm kan a heer kɩ haay, awɔɔ bɩr a kam pakra nɩ y.
Ⅵ K'a mim naa do tɔ da a nɔ ʊ:
Gʊaa k'a hɔ duu poore bɩ,
hɔ poore an n'a yɩm sɔ,
gʊaa k'a duu gʊta bɩ,
hɔ gʊta an n'a yɩm sɔ.
Ⅶ Naa tɔ ma bɩ, a a ga m kʊ gʊaa biyəə n hɔ k'a gɩnga k'a ka bɩ ka, a b'a ka pakra nɩ, gɛɛ paŋŋa n y'a ba a ma tɔ ma y. Bala, gʊaa k'a nɩ hɔ kam kan heernyɩnta kɩ bɩ, Woso ɩ bɩ zaa ŋʊam.
Ⅷ Bɩ, Woso a da ma an hɔ mɩŋŋa do y'a hʊnhɔ ka awɔɔ ʊ gʊta, kʊ hɔsɩ bɩ jɩra awɔɔ ma y, bɩ kʊ hɔ n bɩr ta awɔɔ ʊ gʊta, k'a zi mɩŋŋɔɔ do haay ba m.
Ⅸ Yɩ a nawʊrɛ ncɩnaaʊ, amba n y'a gʊrsɩra ba Wosoci b'ʊ bɩ m, n ʊ:
A ɩ hɔ kam ŋʊazannɔ ʊ gʊta,
a ba k'a nawʊm gʊɔɔ m mɩŋŋa
bɩ nyarɛ ba ʊ y.
Ⅹ Woso nɩ hɔ kam hɔduurezaa ʊ an n'a duum, an nɩ hɔbɩrɛ kaŋ ʊ an n'a bɩm. Woso bɩ do nɩ hɔ karɛ awɔɔ ʊ gʊta amba awɔɔ lɛ n taa bɩ m, an a ka an pasɩ yɔɔgʊ, k'awɔɔ n wɔ ʊ a ba gʊɔɔ m mɩŋŋa gʊta.
Ⅺ A y'a kam awɔɔ n hɔ yɩ gʊta dɔmɩm haay, k'awɔɔ n bɩr a bam gʊɔɔ m mɩŋŋa tee…. K'a yɩ ncɩnaaʊ, gʊɔɔ cir gʊta y'a lɛ bɔm Woso ʊ, awɔɔ ganwʊrɛrɔ wɔɔ kʊ wɔɔ n'a karɛ ŋ ʊ tɔ ma.
Ⅻ Bala, busoo zɩnzɛkʊra bɩ zibəə bɩ, a da bɛɛ a nawʊm wosogʊɔɔ wɔɔ han bala y, a ka a nawʊm sɔ gʊɔɔ nɩ Woso barka dam gʊta maam-maam.
ⅩⅢ Zi naa do barɛ n'awɔɔ taalɛra zaa bɩ zuure nɔ ʊ bɩ hɩnkam. A a hɩnka a ʊ, awɔɔ sɩra ka Krista lemim nyɩnta b'ʊ denter, an nɩ yɛm ma karɛ. Gʊɔɔ gʊta y'a lɛ bɔm Woso ʊ naa tɔ ma, ŋ y'a lɛ bɔŋ ʊ sɔ k'awɔɔ n'a barɛ ŋ nɩ mɩŋŋa, an n'a hɔnyɩ jirm kan ŋ kɩ kan gʊaa haay kɩ bɩ tɔ ma.
ⅩⅣ Ŋ yaa darɛ awɔɔ tɔ ma, ŋ n'awɔɔ ŋʊa gʊta, kʊ Woso a barka ka awɔɔ ʊ gʊta ncɩnaaʊ bɩ minto.
ⅩⅤ Bɩ kʊ Woso tɔ n lɛbɔʊrɛ yɩ, a ganwʊrɛ gʊta k'a lɔɔ ba ʊ bɩ tɔ ma.