Ⅵ
Ⅰ Kʊ zi wɔɔ n'a bam kan Woso kɩ bɩ, wɔɔ y'a yɛrɛ awɔɔ han, ʊ ʊ, a b'a to Woso barka k'a yɩ bɩ n ta vam y.
Ⅱ Bala, Woso a hɩ, a ʊ:
Dɔmɩm kʊ mɔɔ nɩ barka kam bɩ, mɔɔ ɩbɩɩ yaadarɛ si,
hinni k'ɩbɩɩ nɩ bʊmbɔrɛ ŋʊaŋ ʊ bɩ, mɔɔ bʊr m bɩ m da ɩ han.
Dɔmɩm kʊ Woso n'a barka kam bɩ n naa. Dɔmɩm k'a n'a bʊmbɔrɛ kam bɩ n naa sɔ.
Pol zibəə
Ⅲ Wɔɔ lɛ baa k'ʊ hɔsɩ ba k'an yɩ gʊaa ma bʊnyaa y, bala, wɔɔ lɛ baa kʊ gɔsɩ n wɔɔ zibəə bɩ sʊnsɔ wʊ y.
Ⅳ A n ta ʊ bɩ, hɔ haay kʊ wɔɔ n'a bam bɩ, a ba wɔɔ nawʊm ʊ n'a hɩnkam ʊ ʊ, Woso zibəənyɩnɔ m wɔɔ m. Bɩ tɔ ma bɩ,
wɔɔ ɩ jɩnɩm kɔɔkɔɔ fɩr do y'a hʊnhɔ nɔ ʊ,
mim kʊsɩrɔ kʊ ŋ n'ɩ wɔɔ yɩm nɔ ʊ, cicir nɔ ʊ, dabɔʊ nɔ ʊ.
Ⅴ Gʊɔɔ wɔɔ zɛ madɩr m gʊta,
ŋnɩ wɔɔ du,
ŋn'a zɛ kʊ ra ŋnɩ zee da wɔɔ ma,
wɔɔ nyɩnta kɔrɛrɔ nɔ ʊ,
hinceem bɩr bam wɔɔ nɩ y,
hɔbɩrɛ bɩr bɩm wɔɔ nɩ y.
Ⅵ Wɔɔ ɩ heer fu zi bam,
Woso hɔdɔrɛ zi wɔɔ n'a bam,
ʊ nɩ bʊraama zi bam.
Ʊ nɩ mɩŋŋabaa bam,
ʊ nɩ tam Sɛnt-Ɛspri paŋŋa m,
ʊ nɩ ŋʊarɛ zi bam noom fu m.
Ⅶ Ʊ nɩ sɩra lemim hɩm,
ʊ nɩ tam Woso paŋŋa nɔ ʊ,
ʊ nɩ tɩrgabaa yar mɔrlɔ sam ʊ nɩ yar barɛ ŋ nɩ,
k'ʊ jɩm kɔɔkɔɔ.
Ⅷ Gʊɔɔ gɔsɩnnɔ ɩ wɔɔ daŋ ʊ,
niŋŋoo nɩ wɔɔ bɔŋ ʊ,
nɔɔrɔ y'a lɛ bɔm wɔɔ ʊ,
nɔɔm nɩ wɔɔ sʊnsɔ wʊm.
N yɩ dɩgam wɔɔ ma ŋʊaarbənno,
an bɔkarɛ sɩrazannɔ m wɔɔ m.
Ⅸ Gʊɔɔ ɩ dɩgam wɔɔ ma,
ɩ ʊ, gɔsɩ n wɔɔ dɔ y,
an bɔkarɛ gʊɔɔ wɔɔ dɔ.
N y'a gɩngarɛ n ʊ,
gɩnga wɔɔ nawʊm,
bɩ wɔɔ gɔɔta ʊ m mɩsɩr,
n yɩ fɩr kam wɔɔ ma gʊta,
bɩ wɔɔ n gɩnga y.
Ⅹ N yɩ wɔɔ heer zaar barɛ,
bɩ wɔɔ gɔɔta ʊ nɩ heernyɔɔ m,
n yɩ dɩgam wɔɔ ma ŋʊazannɔ,
an bɔkarɛ wɔɔ y'a kam gʊɔɔ n'a bam hɔzannɔ,
n yɩ dɩgam wɔɔ ma ɩ ʊ,
hɔsɩ ba wɔɔ ʊ y,
an bɔkarɛ wɔɔ nɩ hɔ haay m.
Ⅺ Awɔɔ Korɛntɩ zannɔ, wɔɔ ʊ heer gʊ ʊ meer ba kan awɔɔ kɩ fasɩ, ʊ ʊ ŋʊarɛ hɩnka awɔɔ m.
Ⅻ Wɔɔ awɔɔ si ʊ heer ʊ, awɔɔ n wɔɔ si a heer ʊ y.
ⅩⅢ Awɔɔ ba mɔɔ ʊ m nyɩnɔ, m nɩ meer bɩ bam kan awɔɔ kɩ, k'a a heer gʊ wɔɔ m, a wɔɔ ŋʊa sɔ, amba wɔɔ n'awɔɔ ŋʊam bɩ m.
Lɛɛgure kan monsigə kɩ b'a dam ma ŋ n a zɛ kʊ ra y
ⅩⅣ A bɩ yɛ a a zɛ kʊ ra kan basɩrakənno kɩ y. A n a ga m, awɔɔ n a ba deem kan ŋ kɩ y. Hɔ tɩrga y'a dam ma an a zɛ kʊ ra kan hɔ bʊnyaa kɩ ra? Lɛɛgure y'a dam ma an a war kʊ ma kan monsigə kɩ ra? A n a ga nɩ y.
ⅩⅤ Krista y'a dam ma an kʊ ma kan Sʊtaana kɩ ra? Gɛɛ sɩrakarɛzaa y'a dam ma an a ba deem kan basɩrakarɛzaa kɩ ra?
ⅩⅥ Wosocɛ b'a dam ma an kʊ ma kan *wosobaawɔnnɔ kɩ y. Bɩ, wɔɔ m Woso k'an mɩsɩr bɩ cɛ, amba a mɩŋŋa a hɩ bɩ m, a a hɩ, a ʊ:
Mɔɔ mɩsɩrbaa barɛ ŋ bire ʊ,
m bɩr kan ŋ kɩ,
mɔɔ nɩ yɩrɛ ŋ Woso,
ŋnɩ yɩ mɔɔ gʊɔɔ.»
ⅩⅦ Naa tɔ ma bɩ, Zuuba a ya, a ʊ:
K'a bɔ gʊɔɔ bʊnyaarɔ wɔɔ bire ʊ, a a gʊ a hɔ.
A b'a wɔ da dintim hɔ ma y,
maam bɩ, mɔɔ y'awɔɔ sire m zi.
ⅩⅧ Mɔɔ yɩrɛ awɔɔ zɩ,
awɔɔ n yɩ mɔɔ nyɩnɔ yaarɔ kan mɔɔ nyɩmbɔnnɔ kɩ,
Zuuba k'a paŋŋa jirə ba ʊ y'a hɩ.