1 तीमुथियुस
तीमुथियुसो खे प्रेरित पौलुसो री पईली चिट्ठी
भूमिका
तीमुथियुस एक जवान मसीह था, जो एशिया रा रणे वाल़ा और यहूदणी माए और यूनानी पिते रा पाऊ था। से पौलुसो रे प्रचार करने रे कामो रे तेसरा साथी और तेसरा मददगार बणीगा था। तीमुथियुसो रे नाओं पौलुस प्रेरितों री पईली चिट्ठी तीन खास गल्ला पाँदे बिचार करने खे लिखी राखी थी।
सबी ते पईले, ये चिट्ठी मण्डल़िया रे चूठी शिक्षा रे बिरोदो रे एक चेतावणी ए। से शिक्षा, जो कि यहूदी और गैर-यहूदी बिचारो रा मिश्रण थी, एते तारणा पाँदे आधारित थी कि भौतिक दुनिया ई बुरी ए और एक मांणू खास गुप्त ज्ञान और कुछ रीति-रवाज, जिंयाँ-कई खाणे रिया चीजा नि खाणिया और ब्या नि करना बगैरा, खे मानणे रे जरिए ई उद्धार मिली सकोआ। एसा चिट्ठिया रे मण्डल़िया रे प्रबंद और आराधना ते जुड़े रे निर्देश बीए और साथे-साथे तेस चरित्रो रा बी वर्णन ए जो मण्डल़िया रे अगुवे और मददगारा खे जरूरी ए। आखरी रे तीमुथियुसो खे ये सला देई राखी कि से किंयाँ यीशु मसीह रा सेवक बणी सकोआ और कई विश्वासिया रे चूण्डो रे प्रति तेसरी क्या-क्या जिम्मेवारिया ए।
रूप-रेखा
भूमिका 1:1, 2
मण्डल़िया और इजी रे अगुवे ते जुड़े रे निर्देश 1:3-3:16
तीमुथियुसो खे तेसरे कामो ते जुड़े रे निर्देश 4:1-6:21
1
अभिवादन
1 ये चिट्ठी मां पौलुसो री तरफा ते ए। आँऊ आपणे उद्धारकर्ता परमेशर और यीशु मसीह री आज्ञा ते यीशु मसीह रा प्रेरित ए, जिदे आसा सबी खे उम्मीद ए।
2 आँऊ ये चिट्ठी तीमुथियुसो खे लिखणे लगी रा जो विश्वासो रे मेरे सच्चे पाऊए जेड़ा ए। आँऊ प्रार्थना करूँआ कि पिता परमेशर और म्हारे प्रभु यीशु मसीह री तरफा ते ताखे कृपा, दया और शान्ति मिलदी रओ।
चूठे शिक्षका रे खलाफ चेतावणी
3 आँऊ तांते फेर बिनती करूँआ कि जेड़ा मैं तूँ मकिदुनिया प्रदेशो खे जांदे बखते समजयाया था कि तूँ इफिसुस नगरो रे रई की तिना चूठे उपदेश देणे वाल़े लोका खे आज्ञा दे कि सेयो गल़त शिक्षा नि देओ।
4 और तिना मनकड़न्त काणियां पाँदे और अनन्त वंशाबलिया पाँदे मन लगाई की बखत बर्बाद नि करो। जिने कि बईस ओई और तेस परमेशरो री योजना रा ज्ञान नि मिलदा जो विश्वासो साथे रिश्ता राखोआ।
5 एसा आज्ञा रा मकसद से प्यार ए जो साफ दिल, खरे विवेक और बिना कपटो ते पैदा ओआ।
6 चूठे उपदेश देणे वाल़ेया इना सबी खरे कामा खे करने ते रोकी ता रा और सिर्फ बेकार गल्ला करेया करोए।
7 सेयो चूठे शिक्षक मूसे रा बिधानो रे शिक्षक बणना तो चाओए पर जो गल्ला सेयो बोलोए और जेतेरे बारे रे सेयो मजबूतिया ते बोलोए, सेयो आपू ई तिजी खे समजदे ई नि।
8 आसे सब जाणूंए कि मूसे रा बिधान पली ए बशर्ते इजी रा इस्तेमाल सई टंगो रे कित्तेया जाओ।
9 आसे जाणूंए कि मूसे रा बिधान तर्मी मांणूए खे नि, पर अधर्मी, निरकुंशो, भक्ति ना करने वाल़े, पापी अपवित्र, और अशुद्ध, माया-बाओ खे काणे वाल़े, अत्यारे,
10 व्याभिचारी, समलैंगिक, मांणूआ खे बेचणे वाल़े, चूठे और चूठी कसम खाणे वाल़े और इना खे छाडी कि खरे उपदेशो रे सबी बिरोदिया खे ठराई राखी।
11 येई परमधन्य परमेशरो री महिमा रे तेस सुसमाचारो रे मुताबिक ए, जो मांगे सम्बाल़ी राखेया।
कृपा खे धन्यवाद
12 आऊँ आपणे प्रभु यीशु मसीह रा जिने माखे सामर्थ दित्ती, धन्यवाद करूँआ कि तिने माखे विश्वासो जोगा समजी की आपणी सेवा खे ठराई राखेया।
13 आऊँ तो पईले निन्दा करने वाल़ा, सताणे वाल़ा और अन्देर करने वाल़ा था, तेबे बी मां पाँदे कृपा ऊई, कऊँकि मैं अविश्वासो री दशा रे बिना समजी-बुजी की, यो काम कित्ते थे।
14 और म्हारे प्रभुए री कृपा, तेस विश्वास और प्यारो साथे, जो यीशु मसीह रे ए, बऊत जादा ऊई।
15 ये गल्ल सच और हर प्रकारो ते मानणे जोगी ए कि यीशु मसीह पापिया खे बचाणे दुनिया रे आयी रा और जिना बीचे सबी ते बड़ा पापी आऊँ ए।
16 पर मां पाँदे इजी खे कृपा ऊई ताकि मां सबी ते बड़े पापिए रे मसीह आपणी पूरी सईन शीलता दखाओ ताकि जो लोक तिना पाँदे अनन्त जीवनो खे विश्वास करोगे, तिना खे आऊँ एक आदर्श बणूँ।
17 एबे सनातन राजा अविनाशी, बिना देखे, एक मात्र परमेशरो रा आदर और महिमा जुगो-जुगो तक ऊँदी रओ। आमीन्।
18 ओ पुत्र तीमुथियुस, तिना भविष्यबाणिया रे मुताबिक, जो पईले तेरे बारे रे कित्ती थी, आऊँ ये आज्ञा सम्बाल़ूँआ कि तूँ तिना रे मुताबिक अच्छी लड़ाईया खे लड़दा रओ।
19 और विश्वास और तेस खरे विवेको खे पकड़ी कि राख, जेतेखे दूर करने री बजअ ते बऊत जणेया रा विश्वासो रूपी जाह्ज डूबी गा
20 तिना बीचा तेई हुमिनयुस और सिकन्दर ए, जो मैं शैतानो गे सम्बाल़ी ते कि सेयो परमेशरो री निन्दा करना नि सीखो।