12
परमेशर आसा रा पिता
1 आसा रे चऊँ कनारे बऊत सारे लोका री जिन्दगिया रे एड़े उदारण ए जो आसा खे बताओ कि विश्वास क्या ए। इजी खे आओ, हर एक रोकणे वाल़ी चीज और उल़जाणे वाल़े पापो खे दूर करी की से दौड़ जो आसा खे दौड़नी, सब्रो साथे दौड़ो।
2 आसे विश्वासो रे कर्ता और सिद्ध करने वाल़े प्रभु यीशुए री तरफा खे ताकदे रईए। यीशुए तेसा खुशिया खे जो तेसते आगे थी राखी री, शर्मा री कुछ चिन्ता ना करी की, क्रूसो रा दु:ख सईन कित्तेया और स्वर्गो रे परमेशरो रे दाँणे कनारे बैठेया।
3 यीशुए रे उदारणो पाँदे सोचो, जिने पापिया रे जरिए दित्ते रे डराऊणे कष्ट इजी खे सईन कित्ते कि तुसे दुःखी ऊई की इम्मत नि छाडी देओ।
4 तुसे पापो रे खलाफ लड़दे ऊए एबुए तक तेस साथे एड़ी लड़ाई नि कित्ती कि तुसा रा खून बया ओ।
5 पर तुसे तिना इम्मती उपदेशा खे पूली चुकी रे जो परमेशरे तुसा खे पाऊ मानी कि देई राखे थे,
“ओ मेरे पाऊ, प्रभुए री ताड़ना खे अल़की गल्ल नि जाण
और जेबे से ताखे थिड़को, तो इम्मत नि छाड।
6 कऊँकि प्रभु जेसखे प्यार करोआ, तेसखे डांटो बी आ
और जेसखे आपणा पाऊ बणाई लओआ, तेसखे सजा बी देओआ।”
7 तुसे दु:खो खे पिते री डांट समजी की सयी लो। परमेशर तुसा खे पाऊ समजी की तुसा साथे बर्ताओ करोआ। से कुण जा पाऊ ए जेसरी ताड़ना पिता नि करदा?
8 से ताड़ना जो सबी खे मिलोई, जे तेसखे नि मिली री ओ, तो तुसे परमेशरो रे असली पाऊ निए।
9 तेबे जबकि म्हारे शारीरिक पिता बी म्हारी ताड़ना करो था और आसे तिना री इज्जत कित्ती। ये आसा खे ओर बी जरूरी ए कि जेबे आसा रा आत्मिक पिता आसा खे ताड़ना देओ तो आसे ओर बी बढ़ी की तिना रे वशो रे रईए ताकि आसा खे अनन्तकालो री जिन्दगी मिलो।
10 आसा रा संसारिक पिता तो आपणी-आपणी समजा रे मुताबिक थोड़े दिना तक आसा री ताड़ना करो थे। पर परमेशर आसा री पलाईया खे ताड़ना करोआ ताकि आसे बी तेसरी पवित्रता रे इस्सेदार ऊई जाईए।
11 जेस बखते ताड़ना देई जाओई तेस बखते ताड़ना खरी नि लगदी बल्कि से दुःख देणे वाल़ी लगोई। पर जो ताड़ना रे जरिए शिक्षा पाओए बादो ते तिना खे चैनी साथे धार्मिकता रा फल मिलोआ।
औंसला और चेतावणी
12 इजी री खातर उठो और चुस्त ऊई जाओ।
13 सीदिया बाटा रिये चलदे रओ। ताकि जो लोक तुसा पीछे चलोए कमजोर और लंगड़े ऊणे रे बावजूद बी सेयो नाश नि ओ पर बची जाओ।
14 सबी साथे मेल-जोल राखो और पवित्र जिन्दगी जिऊणे खे हर तरअ ते कोशिश करदे रओ। जेतेरे बिना कोई बी प्रभुए खे कदी नि देखी सकदा।
15 तुसे चौकस रओ कि कोई बी लोक परमेशरो री कृपा ते बिना रई नि जाओ। त्यान देओ कि तुसा बीचे अविश्वासो री कोई बी कऊड़ी जड़ निकल़ी की कष्ट नि देओ तिजी साथे बऊत लोक अशुद्ध ऊई जाओ।
16 तुसा बीचे कोई जणा व्याभिचारी नि ओ या अब्राहमो रे पोते एसावो जेड़ा अधर्मी नि ओ, जिने एक बारा री रोटिया रे बदले आपणे जेठे ऊणे रा पद बेची ता।
17 तुसे जाणोए कि बादो ते जेबे तिने आपणे पिते इसहाको ते आशीष पाणी चायी, तो तेसखे नि दित्ती और आसू बाह्ई-बाह्ई की आशीष मांगणे पाँदे बी मन फेरने रा मौका तेसखे नि मिलेया।
18 तुसे सीनै पाह्ड़ो रे नेड़े नि पऊँछे, जेतेखे देखी सको थे और छुँईं सको थे। एती ना तो लूपिया जेड़ी बल़ी री आग ए और ना काल़े बादल़, ना बऊत न्हेरा और ना तूफान ए।
19 एती ना तो तुरहिया री आवाज और ना बोलणे वाल़े रे एड़े शब्दो ए, जेतेखे सुणी की इस्राएली लोक बिनती करो थे कि, “एबे आसा साथे ओर गल्ला नि करो।”
20 तिने लोके एड़ा इजी खे बोलेया कऊँकि सेयो तेसा आज्ञा खे नि सयी सके जो परमेशरे तिना खे बोली थी, “जे कोई डांगर बी पाह्ड़ो खे छूँओ, तो पात्थर बाए जाओ।”
21 और से दर्शन एड़ा डराऊणा था कि मूसे बोलेया, “आऊँ बऊत डरूँआ और थरथराऊँआ।”
22 तुसे लोक सिय्योनो रे पाह्ड़ो रे नेड़े जो जिऊँदे परमेशरो रा नगर ए पऊँछी रे। ये सेई स्वर्गिय यरूशलेम ए जेती लाखो स्वर्गदूत खुशिया रा त्योआर मनाओए।
23 तुसे परमेशरो रे जेठे री सभा रे आई रे, जिना रे नाओं स्वर्गो रे लिखे रे ए। तुसे आपू परमेशरो रे नेड़े आयी रे जो सबी रा न्याय करने वाल़ा ए। तुसे स्वर्गो रे तर्मी लोका री आत्मा गे आयी रे जिना खे सिद्ध बणाई राखेया।
24 तुसे यीशुए गे आयी रे जो आसा साथे नई वाचा रा बचोलापण करोआ और छड़काओ रे तेस खूनो रे नेड़े आयी रे, जो हाबिलो रे खूनो ते बी जादा खरिया गल्ला बोलोआ।
25 सावधान रओ, और परमेशरो री आज्ञा खे नि टाल़ो जो तुसा के बोलणे लगी रा। कऊँकि जेबे मूसे इस्राएलो रे लोका खे चेतावणी दित्ती थी और तिने आज्ञा नि मानी तो सेयो लोक बी परमेशरो री सजा ते बची नि सके। तेबे आसे बी सजा ते नि बची सकदे, जे आसे बी तेसरी आज्ञा नि मानिए जो आसा खे स्वर्गो ते चेतावणी देओआ।
26 जेबे परमेशरे सीनै पाह्ड़ो ते गल्ल कित्ती थी तेस बखते तेसरे शब्दे तरती इलाई ती, पर एबे तिने ये वादा करी राखेया कि, “एक बार फेर मां बस तरती ई नि, बल्कि स्वर्ग बी इलाई देणा।”
27 और ये वाक्य, “एक बार फेर” इना गल्ला खे दखाओआ कि बणाई रिया सारी चीजा इल्ली जाणिया और टाई देणियां, ताकि जो चीजा इलाईया नि जांदिया, सेयो अटल बणिया री रओ।
28 आसा खे जो राज्य मिली रा तिजी खे ईलाया नि जाई सकदा। तेबेई आसे परमेशरो खे धन्यवाद देंदे रईए और तेसरी इच्छा रे मुताबिक भग्ति और आदरो साथे तेसरी आराधना करदे रईए जेते कि से खुश ओआ।
29 कऊँकि म्हारा परमेशर स्वा करने वाल़ी आग ए।