कुलुस्सियों
कुलुस्स नगरो री विश्वासी मण्डल़िया खे प्रेरित पौलुसो री चिट्ठी
भूमिका
कुलुस्सियों रे नाओं पौलुस प्रेरितों री चिट्ठी एशिया रे कुलुस्से नाओं रे नगरो री मण्डल़िया खे लिखी थी, जो इफिसुस नगरो रे पूर्वो रे था। एसा मण्डल़िया री स्थापना पौलुसे नि कित्ती थी, पर ये तेस जगा रे थी जेतेरी जिम्मेवारी पौलुस आपणे कान्दा पाँदे मेहसुस करो था, जेड़ा कि आसे पौलुसो खे रोमी साम्राज्य रे एक राज्य, अखाया री राजधानी इफिसुसो ते मसीही सेवका खे पेजदे ऊए पाऊँए। पौलुसो खे ये पता लगेया था कि कुलुस्से री मण्डल़िया रे कुछ गल़त शिक्षक थे जो एते गल्ला पाँदे जोर देओए थे कि परमेशरो खे जाणने और पूरा उद्धार पाणे रिया खातर एक मांणूए खे कुछ खास “आत्मिक प्रधान और अधिकारिया” री उपासना करना जरूरी था।
इजी साथे-साथे यो शिक्षक बोलो थे कि मांणूआ खे कुछ खास तर्म-बिधिया जिंयाँ-खतने खे मानणा और रोटी और कई और गल्ला ते जुड़ी री सख्त नियमो खे मानणा जरूरी ए। पौलुस इना शिक्षा रा बिरोद करने रिया खातर, सच्चे मसीही संदेशो साथे ये चिट्ठी लिखोआ। तेसरे उत्तरो रा मर्म ये कि यीशु मसीह पूरा उद्धार देणे रे समर्थ ए और ये कि यो बाकि विश्वास और बिधिया सच्चो रे मांणूए खे दूर करी देओईया। मसीह रे जरिए ई परमेशरे एसा सृष्टिया री रचना कित्ती और एबे तेसरे जरिए ई से इजी खे आपू गे वापस ल्याऊणे लगी रा। बस मसीह रेई दुनिया रे उद्धारो री उम्मीद ए। तेबे पौलुस विश्वासिया री जिन्दगिया री खातर एसा महान् शिक्षा रा मतलब बताओआ।
ये त्यान देणे जोगी गल्ल ए कि तुखिकुस, जो पौलुसो री ये चिट्ठी कुलुस्से लयी गा था, तेस साथे उनेसिमुस बी था-से गुलाम जेसरे पक्षो रे पौलुसे फिलेमोनो री चिट्ठी लिखी थी।
रूप-रेखा
भूमिका 1:1-8
मसीह रा सबाओ और काम 1:9-2:19
मसीह रे नयी जिन्दगी 2:20-4:6
निचोड़ 4:7-18
1
अभिवादन
1 ये चिट्ठी पौलुस और आसा रा पाई तीमुथियुसो री तरफा ते ए। आँऊ पौलुस परमेशरो री इच्छा ते यीशु मसीह रा प्रेरित ए।
2 आऊँ ये चिट्ठी मसीह रे परमेशरो रे तिना पवित्र लोका खे और विश्वास जोगे पाईया खे लिखणे लगी रा जो कुलुस्से नगरो रे रओए। म्हारे पिता परमेशरो री तरफा ते तुसा खे कृपा और शान्ति मिलदी रओ।
धन्यवादो री प्रार्थना
3 जेबे आसे तुसा खे प्रार्थना करूँए तो आसे आपणे प्रभु यीशु मसीह रे पिता, परमेशरो रा सदा धन्यवाद करूँए।
4 कऊँकि आसे सुणी राखेया कि यीशु मसीह पाँदे तुसा रा विश्वास ए और सब परमेशरो रे लोका साथे प्यार राखोए।
5 तुसा रा विश्वास और प्यार तेसा उम्मीदा रे मुताबिक ए, जो स्वर्गो रे परमेशरे तुसा खे राखी री ए। तुसे तिजी रे बारे रे तेस सुसमाचारो रे सच्चे वचनो रे पईले ई सुणी चुकी रे, जो तुसा गे पऊँछी रा।
6 ये सुसमाचार सारी दुनिया रे लगातार फैलणे लगी रा और बऊत सारे लोक विश्वासी बणने लगी रे। तुसा रे बी तेसी दिनो ते ये फल़ने-फूल़ने लगी रा जेस दिनो ते तुसे सुणेया और सच्चाईया ते परमेशरो री कृपा पछयाणी।
7 तिजी री ई शिक्षा तुसे म्हारे प्यारे और साथे काम करने वाल़े इपफ्रासो ते सीखी, जो आसा खे मसीह रे विश्वासो जोगा सेवक ए।
8 तिने ई आसा खे बताया कि पवित्र आत्मे तुसा लोका रे मनो रे ओरी री खातर बऊत प्यार परी ता।
9 जेस दिनो ते आसे ये सुणेया, आसे तुसा लोका खे लगातार प्रार्थना करदे रऊँए। आसे ये बिनती करूँए कि पवित्र आत्मा तुसा खे आत्मिक बुद्धि और समज देओ ताकि तुसे परमेशरो री इच्छा पूरिया तरअ ते समजी सको।
10 ताकि तुसा रा चाल-चलण प्रभुए खे महिमा देणे जोगा ओ और सदा सेई काम करो जेते की प्रभु खुश ओ। तुसा री जिन्दगिया रे हर प्रकारो रे खरे कामो रा फल लगो और तुसे परमेशरो री पछयाणा रे बड़दे जाओ।
11 आऊँ प्रार्थना करूँआ कि परमेशर आपणी महिमा री शक्तिया रा इस्तेमाल करी कि तुसा खे सब प्रकारो री सामर्था ते तागतबर करो। जेते कि तुसे खुशिया साथे हर प्रकारो ते सब्र और सईन शीलता दखाई सको।
12 तुसे लोक पिता परमेशरो रा धन्यवाद करदे रओ, जिने आसे एते जोगे बणाए कि स्वर्गो रे राज्य रे परमेशरो रे लोका साथे जायदाता रे बराबर इस्सेदार ओऊँ।
13 कऊँकि परमेशरे ई आसे शैतानो रे वशो ते छुड़ाई कि आपणे प्यारे पुत्रो रे राज्य रे प्रवेश करवाया।
14 आसा खे तिदे ई छुटकारा मतलब पापो री माफी मिलोई।
मसीह री प्रदानता और तिना रे काम
15 मसीह ना दिशणे वाल़े परमेशरो रा दिशणे वाल़ा प्रतिरूप ए। से सब चीजा बणने ते पईले ई मौजूद ए और से परमेशरो री बणाई री सारी सृष्टिया पाँदे प्रदान अधिकारी ए।
16 कऊँकि तेसदे ई सारिया चीजा री सृष्टि ऊई। सब कुछ चाए से स्वर्गो री ओ या तरतिया री, देखी री या बिना देखी री, क्या सिंहासन, क्या राज करने वाल़े, क्या प्रदानगिरी, क्या अक्क, सारी चीजा तेसरे ई जरिए और तेसरिया ई खातर बणाई राखिया।
17 मसीह सब चीजा बणने ते पईले ई मौजुद था और सब चीजा तेसरी ई इच्छा रे मुताबिक मिली की काम करदी रओईया।
18 मण्डल़ी मसीह रा शरीर ए और मसीह मण्डल़िया रा सिर ए। सेई आदि ए और मरे रेया बीचा ते जिऊँदा ऊणे वाल़ेया रे जेठा ए ताकि सबी गल्ला रे सेई प्रदान ओ।
19 कऊँकि पिता परमेशरो री खुशी इदे ईए कि तेसरा पूरा सबाओ मसीह रे वास करो।
20 मसीहे क्रूसो पाँदे जो आपणा खून बाह्या तिजी रे जरिए परमेशरे मेल-जोलो री शुरूआत कित्ती। परमेशरो खे ये खरा लगेया कि से मसीह रे जरिए सब चीजा रा चाए सेयो तरतिया पाँदलियाए या स्वर्गो रिया ए आपू साथे मेल-जोल करी लो।
21 तुसे जो पईले परमेशरो ते दूर थे और बुरे कामो री बजअ ते मनो ते बैरी थे।
22 पर एबे परमेशरे आपणे पुत्र मसीह रे क्रूसो पाँदे मरने रे जरिए तुसा साथे बी मेल-जोल करी ला, ताकि तुसा खे आपणे सामणे पवित्र और निष्कलंक और निर्दोष बणाई कि आजीर करो।
23 तुसे मसीह रे विश्वासो री निऊँआ पाँदे पक्के बणे रे रओ। तेसा उम्मीदा खे नि छाडो जो सुसमाचार सुणने ते बाद तुसा खे मिली। एस सुसमाचारो रा प्रचार सर्गो निठे सारी सृष्टिया रे कित्तेया और जेतेरा प्रचार करने खे आऊँ पौलुस सेवक बणेया।
मण्डल़िया रा सेवक-पौलुस
24 एबे आऊँ तिना दु:खो रिया बजअ ते खुशी मनाऊँआ, जो तुसा री तंईं उठाऊँआ। आऊँ मसीह रे क्ल़ेशो री कअटी, आपणे शरीरो रे, तिना री मण्डल़िया खे, जो मसीह रे शरीरो रे पूरी करी देऊँआ।
25 जेसरा आऊँ परमेशरो रे तेस परबंदो रे मुताबिक तेसरी मण्डल़िया रा सेवक बणेया, जो तुसा खे मांगे सम्बाल़ेया, ताकि आऊँ परमेशरो रे वचनो रा पूरा-पूरा प्रचार करुँ।
26 मतलब तेस पेतो खे जो सदिया और पीढ़िया ते गुप्त रया, पर एबे परमेशरो रे तिना पवित्र लोका पाँदे प्रकट ऊआ।
27 परमेशरे ये इजी खे प्रकट कित्तेया कऊँकि से चाओ था कि तुसे दूजी जाति तिना रे नौखी और महिमा रे पेतो खे समजो। से पेत ये कि मसीह तुसा लोका बीचे रओआ और तिना रे तुसा लोका री महिमा री उम्मीद ए।
28 आसे मसीह रा प्रचार करूँए और परमेशरो री तेसा बुद्धिया ते हर एक माणूंए खे चतौणी और पूरे ज्ञानो रा उपदेश देऊँए। जेते कि हर एक मांणूए खे मसीह रे सिद्ध करी की तिना सामणे आजीर करो।
29 इजी खे आऊँ तेसरी तेसा शक्तिया रे मुताबिक तन मन लगाई की मईणत करूँआ जो माखे मसीह रे जरिए मिलोई और जो मांदे काम करोई।