9
प्रेरिता रे अक्क और फर्ज
1 आऊँ से सब कुछ करने खे आजाद ए जो आँऊ चाऊँआ। आऊँ एक प्रेरित ए। मैं यीशुए खे जो म्हारा प्रभु ए देखी राखेया। मेरे ई जरिए तुसे मसीह पाँदे विश्वास कित्तेया।
2 आऊँ ओरी री नजरा रे चाए प्रेरित नि बी ए तेबे बी तुसा री तंईं तो प्रेरित ए। आँऊ सेईए जो तुसा बीचे सुसमाचार लयी की आया। प्रभु यीशुए रे तुसा रा विश्वास साफ-साफ बताओआ कि आँऊ मसीह रा प्रेरित ए।
3 जो लोक मेरी प्रेरिताईया रे बारे रे सवाल पूछोए तिना खे मेरा येई जवाब ए!
4 बरनबास और माखे पक्के तौरो पाँदे प्रेरिता रे रूपो रे आपणे कामो रे बदले खाणे-पीणे री चीजा लणे रा अक्क ए।
5 ओरी प्रेरिता और प्रभुए रे पाई और पतरसो साई माखे बी मसीह पाँदे विश्वास करने वाल़ी जवाणसा साथे ब्या करी कि आपू साथे लयी चलणे रा अक्क ए।
6 माखे और बरनबासो खे बी ओरी प्रेरिता जेड़े पैसेया री मताद पाणे रा अक्क ए और आसा खे आपणी जिन्दगी जिऊणे खे काम करने री जरूरत निए।
7 एड़ा कोई सिपाई निए जो आपणा ई पैसा खर्च करी की सिपाईए रा काम करोआ। एड़ा कोई जिम्मीदार निए जो अँगूरा रा बगीचा लगाई की तिजी रा फल नि खांदा ओ। एड़ा कोई मांणू निए जो डांगर पाल़ी की तिना रा दूद नि पींदा ओ।
8 आऊँ इना गल्ला खे सिर्फ मांणूआ रे बिचारे रे आधारो पाँदे नि बोलदा। मूसे रा बिधान बी येई गल्ला बोलोई।
9 कऊँकि मूसे रा बिधानो रे लिखी राखेया, “खल्याणो रे जोड़े रे बखते चलदे ऊए बल़दा रा मूँ नि बानणा।” क्या परमेशर बल़दा री ई चिन्ता करोआ?
10 या खास करी की आसा खे बोलोआ। आ, आसा खेई लिखी राखेया, कऊँकि खरा ए कि डोरू बाणे वाल़ा उम्मीदा साथे बाओ और खलयाणो रे पूए ते अन्न लग करने वाल़ा फसला रा अक्कदार ऊणे री उम्मीद तो राखोआ।
11 जे आसे तुसा दे आत्मिक बीज बाई राखे, तो क्या शारीरिक रोटिया री उम्मीद करनी कोई बड़ी गल्ल ए?
12 जे ओरी रा तुसा पाँदे ये अक्क ए, तो क्या आसा रा इजी ते जादा नि ऊणा? फेर बी आसे ये अक्क कामो रे नि ल्याए। पर सब कुछ सईन करूँए, ताकि आसा री बजअ ते मसीह रे सुसमाचारो रे कोई रुकावट नि ओ।
13 क्या तुसे नि जाणदे कि जो पवित्र चीजा री सेवा करोए, सेयो मन्दरो ते खाओए और जो बेदिया री सेवा करोए, सेयो बेदिया साथे अक्कदार ओए।
14 ईंयां ई प्रभुए री ये आज्ञा ए कि जो लोक सुसमाचारो रा प्रचार करोए तिना री आऊँदणी सुसमाचारो ते ओ।
15 पर इना अधिकारा बीचा ते मैं एकी रा बी कदी इस्तेमाल नि कित्तेया। ये गल्ला मैं इजी खे बी नि लिखिया कि एड़ा कुछ मेरे बारे रे कित्तेया जाओ। बजाए इजी रे की कोई मांते तेसा गल्ला खेई छीनी लओ जेतेरा माखे गर्व ए। इजी ते तो आँऊ मरी जाणा ई खरा समजूँआ।
16 जे आऊँ सुसमाचार सुणाऊँ, तो इदे माखे कोई कमण्ड करने री गल्ल निए। कऊँकि सुसमाचार सुनाणा माखे दित्ती री जिम्मेवारी ए और जे आऊँ सुसमाचार नि सुणाऊँ, तो माखे हाय!
17 जे आऊँ आपणी इच्छा ते ये काम करूँआ तो माखे तिजी री मजदूरी मिली जाणी। पर जे आऊँ ये काम बिना इच्छा ते करूँआ जेते री जिम्मेवारी परमेशरे माखे देई राखी तो आँऊ मजदूरिया री उम्मीद नि करी सकदा।
18 तो फेर मेरी कुण जी मजदूरी ए? से ये कि आँऊ बिना कुछ लये सुसमाचारो रा प्रचार मुफ्तो रे करूँआ। और सुसमाचारो ते जूड़े आपणे अक्को रा पुरा इस्तेमाल नि करदा।
19 हालाँकि आँऊ केसी रे बी अधीन निए फेर बी मैं आपणे आपू खे सबी रा दास बणाईता रा कि आँऊ जादा ते जादा लोका खे मसीह गे खिंजी की ल्याऊँ।
20 आऊँ यहूदिया खे यहूदी बणेया ताकि, यहूदिया खे मसीह गे खिंजी की ल्याऊँ। जो लोक बिधानो रे अधीन ए, तिना री खातर आऊँ बिधानो रे अधीन ना ऊँदे ऊए बी बिधानो रे अधीन बणेया कि तिना खे जो बिधानो रे अधीन ए, खिंजी की ल्याऊँ।
21 तिंयाँ ई जो लोक बिधानो रे अधीन निए तिना खे मसीह गे ल्याऊणे खे तिना जेड़ा ई आऊँ बी बणीगा। हालाँकि मसीह रा बिधानो रे अधीन ऊणे री बजअ ते आँऊ आपू परमेशरो रा बिधानो ते आजाद निए।
22 आऊँ कमजोरा खे, कमजोर जा बणेया कि कमजोरा खे मसीह गे खिंजी की ल्याऊँ, आऊँ सबी मांणूआ खे सब कुछ बणेया कि किंयाँ ना किंयाँ कईया जणेया खे बचाऊँ।
23 आऊँ सब कुछ सुसमाचारो खे करूँआ, ताकि ओरी साथे तिजी रा अक्कदार ऊई जाऊँ।
मसीही दौड़
24 क्या तुसे नि जाणदे कि दौड़ा रे तो सब दौड़ोए, पर इनाम एक ई लयी जाओआ? तुसे तेड़े ई दौड़ो, ताकि जीती जाओ।
25 हर एक पईलवाण सबी किजी रा संयम करोआ, सेयो तो एक मुरजाणे वाल़े मुकुटो खे पाणे री खातर इतणा सब करोए, पर आसे तो तेस मुकुटो खे करूँए, जो मुरजाणा नि।
26 इजी री खातर आऊँ तेस मांणूए जेड़ा दौड़ुंआ, जेसरे सामणे एक लक्ष्य ए, आऊँ अवा रे मुक्के नि बाँदा।
27 आऊँ आपणे शरीरो खे बाऊँआ और कुटुँआं और बसो रे ल्याऊँआ, एड़ा नि ओ कि ओरी खे प्रचार करी की आऊँ आपू ई केसी रीतिया ते नकम्मा ठईरूँ।