21
पौलुसो रा यरूशलेमो खे जाणा
1 जेबे आसे तिना ते विदा ऊई की जाह्ज खोलेया, तेबे सिदी बाटा ते कोस टापूए खे आए और दूजे दिने रूदुस टापूए दे और तेथा ते पतरा टापूए दे।
2 तेबे एक जाह्ज फीनीके नगरो खे जांदा ऊआ मिलेया और तेस पाँदे चढ़ी की यात्रा शुरू कित्ती।
3 जेबे आसा खे साईप्रस टापू खूँजे कनारे दिशेया, आसे तिजी खे छाडी की सीरिया प्रदेशो खे चली की सूरो रे उतरे, कऊँकि तेती जाह्जो रा बोजा उतारना था।
4 तेबे तेती चेलेया खे पाई की सात दिन तक रये, तिने पवित्र आत्मा रे सिखाए रे पौलुसो खे बोलेया, “यरूशलेमो नगरो रे पैर नि राखणा।”
5 सात दिना बाद जेबे तेथा ते आसा रे जाणे रा बखत आया, तेबे आसे तेथा ते चली पड़े और सबी जवाणसे बाल़का समेत आसे नगरो ते बारे पऊँछाए, तेबे आसे कनारे पाँदे पऊँछी की कुटणे टेकी की प्रार्थना कित्ती।
6 तेबे एकी-दूजे ते बिदा ऊए, आसे तो जाह्जो रे चढ़े और सेयो आपणे-आपणे कअरो खे वापस ऊईगे।
7 जेबे आसे सूर नगरो ते जलयात्रा पूरी करी की पतुलिमयिस नगरो रे पऊँछे, तेबे आसे विश्वासी पाईया खे नमस्ते करी की तिना साथे एक दिन रये।
8 दूजे दिने आसे तेथा ते चली की कैसरिया नगरो खे आए और फिलिप्पुस सुसमाचार प्रचारको रे कअरे, जो साता बीचा ते एक था, जेसखे यरूशलेमो रे चेलेया बिदुआ री देखपाल़ करने खे चुणी राखेया था, जाई की तेसरे कअरे रये।
9 तेसरी चार कुआँरी बेटिया थिया, जो भविष्यबाणी करो थिया।
10 जेबे आसे तेती बऊत दिन तक रई चुके, तेबे अगबुस नाओं रा एक भविष्यबक्ता यहूदिया प्रदेशो ते आया।
11 तिने आसा गे आयी की पौलुसो रा पटका लया और आपणे आथ पैर बानी की बोलेया, “पवित्र आत्मा ये बोलोआ कि जेस मांणूए रा ये पटका ए, से यरूशलेमो रे यहूदिया ईंयां बानणा और दुजिया जातिया रे आथो रे देई देणा।”
12 जेबे आसे यो गल्ला सुणिया, तो आसे और तेथो रे लोके पौलुसो ते बिनती कित्ती कि यरूशलेमो खे नि जाणा।
13 पर पौलुसे बोलेया, “तुसे क्या लगी रे करने कि रोयी-रोयी की मेरा मन लगी रे दुःखी करने? आऊँ तो प्रभु यीशुए रे नाओं ते यरूशलेमो रे बाने जाणे खेई नि, बल्कि मरने खे बी त्यार ए।”
14 जेबे से तिना ते नि मानेया, तो आसे ये बोली की चुप ऊईगे, “प्रभुए री इच्छा पूरी ओ।”
15 कुछ दिना ते बाद आसे पक्का इरादा करी की यरूशलेमो खे चली गे।
16 कैसरिया नगरो रे बी कई चेले आसा साथे चली पड़े और मनासोन नाओं रे साईप्रसो रे रणे वाल़े रे एक पुराणे चेले रे कअरे साथे ली आए, ताकि आसे तेसरे कअरे रऊँ।
पौलुसो रा याकूबो साथे मिलणा
17 जेबे आसे यरूशलेमो रे पऊँछे, तेबे विश्वासी पाई आसा साथे बड़े खुश ऊई की मिले।
18 दूजे दिने पौलुस आसा खे लयी की याकूबो गे गया, जेती सब बुजुर्ग कट्ठे थे।
19 तेबे तिने तिना खे नमस्ते करी की जो-जो काम परमेशरे तेसरी सेवकाईया रे जरिए दुजिया जातिया बीचे कित्ते थे, एक-एक करी की सब बताए।
20 तिने ये सुणी की परमेशरो री महिमा कित्ती, तेबे तिने बोलेया, “ओ पाई! तूँ देखणे लगी रा कि यहूदिया बीचा ते कई ह्जार मांणूए विश्वास कित्तेया और सब बिधानो री धुन लगाई राखोए
21 तिना यहूदी विश्वासिया खे तेरे बारे रे बताया कि तूँ दुजिया जातिया बीचे रणे वाल़े यहूदिया खे मूसे रे बिधानो खे छाडणे रे बारे रे सिखाएया और बोलोआ कि ना आपणे बच्चेया रा खतना कराओ और ना ई रवाजा पाँदे चलो, तो क्या करना चाईयो?
22 लोका जरूर सुणना कि तूँ आयी रा।
23 इजी री खातर जो आसे ताखे बोलूँए, से कर, आसा गे एती चार मांणू ए, जिने मान्नत मानी राखी।
24 तिना खे लयी की तेस साथे आपणे आपू खे शुद्ध कर और तिना खे खर्चा दे, ताकि सेयो बाल़ कटवाओ। तेबे सबी खे पता लगी जाणा कि जो गल्ला तिना खे तेरे बारे रे सिखाईया गईया, तिना री कोई जड़ निए, पर तूँ आपू बी बिधानो खे मानी की तिजी रे मुताबिक चलेया
25 पर तिना दुजिया जातिया रे बारे रे, जिने विश्वास कित्तेया, आसे ये न्याय लयी की लिखी की पेजी राखेया कि सेयो मूर्तिया सामणे बलि कित्ते रे मासो ते, खूनो ते, गल़ा कोटे रे मासो ते और व्याभिचारो ते बचे रओ।”
26 तेबे पौलुस तिना मांणूआ खे लयी की दूजे दिने तिना साथे शुद्ध ऊई की मन्दरो रे गया और बताई ता कि शुद्ध ऊणे रे दिन, मतलब-तिना बीचा ते हर एकी खे चढ़ावा चड़ाए जाणे तको रे दिन कदी पूरे ऊणे।
मन्दरो रे पौलुसो खे पकड़ना
27 जेबे सेयो सात दिन पूरे ऊणे वाल़े थे, तेबे आसिया प्रदेशो रे यहूदिये पौलुसो खे मन्दरो रे देखी की सब लोक उकसाये और ये बोली की से पकड़ी ता,
28 “ओ इस्राएलियो! मताद करो, ये सेई मांणू ए, जो लोका खे और बिधानो खे और एथो री जगा रे बिरोदो रे, हर जगा रे सबी लोका खे सिखाओआ, एथो तक कि यूनानिया खे बी मन्दरो रे ल्याई की तिने ये पवित्र जगा अशुद्ध करी ती।”
29 तिने तो इजी ते पईले त्रुफिमुस इफिसुसवासिए खे पौलुसो साथे नगरो रे देखेया था और समजो थे कि पौलुस तेसखे मन्दरो रे ली आयी रा।
30 तेबे सारे नगरो रे आल्ला पड़ी गा और लोक दौड़ी की कट्ठे ऊईगे और पौलुसो खे पकड़ी की मन्दरो ते बारे कसिटी की ली आए और फटाफट द्वार बन्द करी ते।
31 जेबे सेयो तेसखे काणा चाओ थे, तेबे पल़टणा रे सरदारो खे सन्देशा पऊँछेया कि सारे यरूशलेम नगरो रे आल्ला पड़ी रा।
32 तेबे से फटाफट सिपाईया और सूबेदारा खे लयी की तिना गे थाले दौड़ी की आया। जेबे पीड़े फौजिया री पल़टणा रे सरदारो खे और सिपाईया खे देखी की पौलुसो खे मारने कुटणे खे बन्द करी ता।
33 तेबे पल़टणा रे सरदारे पौलुसो रे नेड़े आयी की से पकड़ी ता और दो जंजीरा साथे बानणे री आज्ञा देई की पूछणे लगेया, “ये कूणे और इने क्या करी राखेया?”
34 पर पीड़ा (भीड़) बीचा ते कोई कुछ बोलणे लगे और कोई कुछ और जेबे शोर-शराबे रे मारे ठीक सच्चाईया रा पता नि लगेया तो तेसखे गढ़ो रे लयी जाणे री आज्ञा दित्ती।
35 जेबे से संगा पाँदे पऊँछेया, तेबे एड़ा ऊआ कि पीड़ा रे दबाओ री बजअ ते सिपाईया खे से चकी की निणा पड़ेया।
36 कऊँकि लोका री पीड़ ये बोली की तेस पीछे पड़ी गी कि एसरा अन्त करी दो।
37 जेबे सेयो पौलुसो खे गढ़ो रे निणे वाल़े थे, तेबे तिने पल़टणा रे सरदारो खे बोलेया, “क्या माखे आज्ञा आयी कि आऊँ ताखे कुछ बोलूँ?” तिने बोलेया, “क्या तूँ यूनानी पाषा जाणेया?
38 क्या तूँ सेई मिस्री निए, जो इना दिनो ते पईले बिरोदी बणाई की चार ह्जार आतंकबादी लोका खे जंगल़ो रे लयी गा था?”
39 पौलुसे बोलेया, “आऊँ तो तरसुसो रा यहूदी मांणू ए, किलिकिया रा प्रसिद्ध रणे वाल़ा निवासी आ और आऊँ तांते बिनती करूँआ कि माखे लोका ते गल्ला करने दे।”
40 जेबे तिने आज्ञा दित्ती, तेबे पौलुसे संगाओ पाँदे खड़े ऊई की लोका खे आथो साथे सारा (ईशारा) कित्तेया, जेबे सेयो चुप ऊईगे, तेबे से इब्रानी पाषा रे बोलणे लगेया।