19
इफिसुस नगरो रे पौलुस
1 जेबे अपुल्लोस कुरिन्थुस नगरो रे था, तेबे पौलुस दूर-दराजो रे प्रदेशो ते ऊई की इफिसुस नगरो रे आया, तेती कुछ चेलेया ते मिले
2 तिने बोलेया, “क्या तुसे विश्वास करदे बखते पवित्र आत्मा पाया?” तिने बोलेया, “आसे तो पवित्र आत्मा रे बारे रे निए सुणेया रा।”
3 पौलुसे तिना खे बोलेया, “तेबे तुसे केसरा बपतिस्मा लयी राखेया?” तिने बोलेया, “यूहन्ने रा बपतिस्मा।”
4 पौलुसे बोलेया, “यूहन्ने ये बोली की मन फिराणे रा बपतिस्मा दित्तेया कि जो मांते बाद आऊणे वाल़ा ए तेस पाँदे, मतलब-प्रभु यीशुए पाँदे विश्वास करना।”
5 ये सुणी की तिने प्रभु यीशुए रे नाओं ते बपतिस्मा लया।
6 और जेबे पौलुसे तिना पाँदे आथ राखेया, तो तेबे तिना पाँदे पवित्र आत्मा उतरेया और सेयो लग-लग पाषा बोलणे लगे और भविष्यबाणी करने लगे।
7 यो सब तकरीबन बारा मर्द थे।
8 तेबे पौलुस प्रार्थना रे कअरो रे जाई की तीन मीन्ने तक निडर ऊई की बोलदा रया और परमेशरो रे राज्य रे बारे रे बईस करदा और समजयांदा रया
9 पर जेबे बऊत जणेया कठोर ऊई की विश्वास करने ते न कित्ती, बल्कि लोका सामणे एसा बाटा खे बुरा बोलणे लगे, तेबे तिने तिना खे छाडी की चेले लग करी ते और हर रोज तुरन्नुसो री पाठशाला रे उपदेश करो था।
10 दो साला तक येई ऊँदा रया, एथो तक कि आसिया प्रदेशो रे रणे वाल़े क्या यहूदी, क्या यूनानी सबी प्रभुए रा वचन सुणी ला।
11 परमेशर पौलुसो रे जरिए सामर्था रे नऊखे काम दखाओ था।
12 एथो तक कि रूमाल और टाल्ले तेसरे शरीरो साथे छवाँई की बमारा पाँदे राखो थे और सेयो ठीक ऊई जाओ थे और दुष्टात्मा तिना ते निकल़ी जाओ थी।
13 पर कुछ यहूदी लोक जो सँवावा करदे फिरदे रओ थे, ये बोलणे लगे, “जेसदे दुष्टात्मा ओ, तिना पाँदे प्रभु यीशुए रा नाओं, ये बोली की फूक बाओ थे कि जेस यीशुए रा प्रचार पौलुस करोआ आऊँ ताखे तेसरी कसम देऊँआ।”
14 तेबे स्क्किवा नाओं रे एक यहूदी बड़े पुरोईतो रे सात पाऊ थे, जो एड़ा ई करो थे।
15 पर दुष्टात्मे बोलेया, “यीशुए खे तो आऊँ जाणूंई और पौलुसो खे बी पछयाणुँई, पर तूँ कूणे?”
16 तेबे तिने मांणूए जेसदे दुष्टात्मा थी, तिना पाँदे लमखी की और तिना खे बसो रे ल्याई की तिना पाँदे एड़ा उपद्रव कित्तेया कि सेयो नांगे और काईल ऊई की तेस कअरो ते नठीगे।
17 ये गल्ल इफिसुसो रे रणे वाल़े यहूदी और यूनानी, सबी खे पता लगी गी और सेयो सब डरी गे और प्रभु यीशुए रे नाओं री तारीफ ऊई।
18 जिने विश्वास कित्तेया था तिना बीचा ते कई जणेया आयी की आपणे-आपणे काम मानी ले और सामणे ल्याए।
19 और जादू करने वाल़ेया बीचा ते कई जणेया आपणी-आपणी पोथिया कट्ठिया करी की सबी सामणे फूकी तिया और जेबे तिना रा दाम जोड़ेया, तो सेयो पंजा ह्जार चाँदिए रे सिक्के रे बराबर निकल़िया।
20 ईंयां प्रभुए रा वचन जोरो-शोरो साथे फैलदा गया और प्रबल ऊँदा गया।
21 जेबे यो गल्ला ऊई चुकिया तेबे पौलुसे आत्मा रे ठाणी ला कि मकिदुनिया और अखाया प्रदेशो ते ऊई की यरूशलेमो खे जाऊँ और बोलेया, “तेती जाई की माखे रोम नगरो खे देखणा बी जरूरी ए।”
22 तेबे आपणी सेवा करने वाल़ेया बीचा ते तीमुथियुस और इरास्तुसो खे मकिदुनिया प्रदेशो रे पेजी की आपू कुछ दिन तक आसिया प्रदेशो रे इफिसुस नगरो रेई रई गा।
इफिसुसो रे उपद्रव
23 तेस बखते एस पंथो रे बारे रे बऊत आल्ला-गोल्ला ऊआ।
24 कऊँकि देमेत्रियुस नाओं रा एक सन्यार अरतिमिसो री देविया रे मन्दरो री चाँदिए री मूर्तिया बणवाई की कारीगरा खे बऊत काम दलाओ था।
25 देमेत्रियुसे तिना खे और एड़ी चीजा रे कारीगरा खे कट्ठे करी की बोलेया, “ओ पाईयो! तुसे जाणोए कि एस काम करी की आसा खे कितणा पैसा मिलोआ।
26 तुसे देखोए और सुणो बी ए कि सिर्फ इफिसुस नगरो रेई नि बल्कि सारे आसिया प्रदेशो रे ये बोली-बोली की इने पौलुसे बऊत लोका खे समजयाया और परमाई बी राखे, कि जो आथे की बणाई राखे, से ईश्वर निए।
27 और एबे सिर्फ एसा गल्ला रा ई डर निए कि आसा रे एस कामो री प्रतिष्ठा जांदी रणी, बल्कि ये बी कि महान् देवी अरतिमिसा रा मन्दर तुच्छ समजेया जाणा और जेसखे सारा आसिया प्रदेश और दुनिया पूजो ई, तिजी री खासियत बी जांदी रणी।”
28 तिना खे ये सुणी की रोष आईगा और सेयो चींगी-चींगी की बोलणे लगे, “इफिसियों री अरतिमिस महान् ए।”
29 तेबे सारे नगरो रे बड़ा आल्ला पड़ी गा और लोके गयुस और अरिस्तर्खुस मकिदुनिया प्रदेशो खे जो पौलुसो साथे यात्री थे, पकड़ी ते और एक चित्त ऊई की रंगशाला खे दौड़ी गे।
30 जेबे पौलुसे लोका गे पीतरे जाणा चाया तेबे चेलेया से जाणे नि दित्तेया।
31 आसिया रे कुछ हाकिमा बीचा ते बी तेसरे कई दोस्ते, तेसखे सन्देशा पेजेया और बिनती कित्ती कि रंगशाला रे जाई की आपणी जिन्दगी मुसीबता रे नि पाणी।
32 तेबे कोई कुछ बोलणे लगे और कोई कुछ, कऊँकि सभा रे बऊत गड़बड़ी ऊणे लगी री थी और बऊत जणे लोक ये पनि जाणो थे कि आसे किजी खे कट्ठे ऊई रे।
33 तेबे तिने सिकन्दरो खे, जो यहूदिये खड़ा कित्तेया था, पीड़ा (भीड़) बीचा ते आगे कित्तेया। सिकन्दर आथो साथे सारा (ईशारा) करी की लोका सामणे कुछ बोलणा चाओ था।
34 पर जेबे तिना खे पता लगेया कि ये यहूदी ए, तो सब के सब एक शब्दो ते कोई दो कंटे तक चींगदे रये कि इफिसियों री अरतिमिस महान् ए।
35 तेबे नगरो रे मन्त्रिये लोका खे शान्त करी की बोलेया, “ओ इफिसियों रे लोको! कुण नि जाणदा कि इफिसियों रा नगर बड़ी देवी अरतिमिसो रे मन्दर और ज्यूस मतलब सर्गो री तरफा ते सेटिया री मूरता रा रखवाल़ा ए।
36 तो तेबे इना गल्ला रा कोई जवाब नि ऊई सकदा, तो तुसा खे ठीक ए कि चुप रओ और बिना सोचे-समजे कुछ नि करो।
37 कऊँकि तुसे इना मांणूआ खे, जो ल्याई राखे, ना मन्दरो खे लूटणे वाल़े ए और ना ई आसा री देविया रे निन्दक ए।
38 जे देमेत्रियुस और तेसरे साथी कारीगरा खे केसी ते कोई बईस ओ तो कचैरी खुली ए और न्याय करने खे हाकिम बी ए, सेयो एकी दूजे पाँदे दोष लगाओ।
39 पर तुसे जे केसी ओरी गल्ला रे बारे रे पूछणा चाओए, तो सभा सामणे न्याय करेया जाणा।
40 माखे डर ए कि जेबे राज्यपालो एस अंगामे रे बारे रे सुणना तो तेस बोलणा कि आसे रोमी सरकारा रे खलाफ बिद्रोह करने री कोशिश लगी रे करने। कऊँकि एस अंगामे रा कोई कारण निए, तो आसे एसा पीड़ा रे कट्ठे ऊणे रा कोई जवाब नि देई सकदे।”
41 तेबे तिने ये बोली की तिने सभा बिदा कित्ती।