15
Ini Mutu Yesus At ila gubernur Pilatus apang aadang mi
(Matius 27:1-2, 11-14; Lukas 23:1-5; Yohanes 18:28-38)
Kukuaveng muse, nehe emangpi pengadilan mi angu, itominu e hula Yesus ameang. Ang muse ini Aing partat At ila gubernur Pilatus apang aadang mi. Ila gubernur apang aadang mi muse, ana Yesus Adang taaning hula, “Tatalang? Etabit Aaing angu ba nehe Yahudi eRaja e, niang?”
Yesus ebalet hula, “Etabi! Nimang gubernur vengbanang iila angu etabi.”
Ang muse agama Yahudi ebuang vala ekapala ang naung gubernur at mateng hula, “Nehe anga ahalang ening bae kabing dena niang!” Bot ini Eahalang ang naung nu-nut vengbanang. Ang muse gubernur bot bale Yesus adang taaning hula, “Aana bae imateng ang naung venghele niang angu? Ini Aaing ening ahala toang amara tila. Aanake ebale hengi!”
Aarunge Yesus bae ebale di niang, anguba gubernur angu mijongat etatabi.
Gubernur Pilatus hukung aamina vengputus metma Mutu Yesus enang
(Matius 27:15-26; Lukas 23:13-25; Yohanes 18:39—19:16)
Tung kanap, hula nehe Yahudi ang naung pesta Paska ening angse, nehe toang angu ini nehe bui mi ang naung nu vengtalail, e gubernur ana ing ening ilva. Uangu adana, nehe ba bui mi angu nu ene Barabas. Tura ini adoi angu, ana Roma eparenta angu malavang, bot andi nehe ameang. Pesta Paska ejol angu peang iila, angu ebele nehe toang gubernur Pilatus ebele ila e, moring vengbanang hula, “Nimang gubernur! Ved Paska hoa iila! Hula bisa se, nimang gubernur aana nehe bui mi angu nu aing ening ilva emenghula aana ening tung kanap angu edadenang!”
Ang muse gubernur ibalet vengbanang hula, “Yaa! Na hula nuba ba ening ilva? Tatalang, hula na Aing ba nehe Yahudi eRaja anga Aing ening ilva se, iini vengjali e, niang?” 10 Gubernur Pilatus mateng aulang, se ana ateing iilat hula, agama Yahudi ebuang vala ekapala ang naung Yesus At hoa angu, iomi etatabit Yesus ealil angu ebele.
11 Aarunge agama enehe eele ang naung ini nehe toang angu ioomi taang, e ing emangpi gubernur Pilatus abanang hula, “Aing se ni nia! Barabas ang ba aing ening ilva!”
12 Ang muse, gubernur Pilatus bale taaning, hula, “Hula aulang se, na malekang naba ba ening metma Yesus, ba iini Earut, ꞌYahudi eRajaꞌ angu adana?”
13 Ang muse ing emangpi moring hama-hamat vengbanang hula, “Ening mang Ameang! Aing metma leut vengpaku!”
14 Gubernur Pilatus bot taaning hula, “Se, Eahalang naba? Na eahalang vengparisa tila, aarunge na bae Eahalang iiba harak niang!”
Aarunge ing emangpi moring etatabit vengbanang hula, “Ening mang Ameang! Aaungba Aing metma leut vengpaku!”
15 Gubernur Pilatus hula, nehe toang angu iomi ening sanang, angu ebele ana Barabas angu aing ening ilva, ijaling angu eamulung. Ang muse ana nehe jajaga ang naung ing parenta e cambuk metma* Yesus Aing bue Aing sabai. Aing bue Aing sabai seng muse, bot tentara ang naung Yesus Aing medi, e hula At ila Aing metma leut vengpakut Ameang.
Tentara ang naung Mutu Yesus ajajasing
(Matius 27:27-31; Yohanes 19:2-3)
16 Ang muse, tentara ang naung Yesus Aing masiring ila ilapa omi eele angu mi. Angumi, iserang batalion nu mi angu ini iaru. 17 Seng ang muse, ini kondo kaana aavening nu metma Yesus enang Ana pake, emenghula raja ang naung biasat pake angu edadenang. Seng muse, ini te emaang veng medi e, taing bikit metma tompi ening. Seng ang muse tompi maang angu ini metma Yesus Ong taang adimung, e ening At mamulal emenghula raja nu ini uhavede aing songgar etompi ma enang ana pake angu edadenang.
18 Bot ing emangpi Aing haromat At mamulal, bot hula, “Tabe Yahudi eRaja!” 19 Bot ini ibabakeng tout hela Yesus apang aadang mi Aing haromat. Seng ang muse ini Eng mi purung Apang mi purung bae alolang niang. Bot ini te kabura metma Ong angu veng bue. 20 Ini At mamulal ajajasing seng muse, kondo aavening jasi angu ini bale aahit medi. Senge ini bot Ekondo angu bale metma Enang Ana pake. Ang muse, ini At ila bendar Yerusalem eahalang, e Aing metma leut vengpakut helet vengaamina.
Ini Mutu Yesus Aing metma leut vengpaku
(Matius 27:32-44; Lukas 23:26-43; Yohanes 19:17-27)
21 Ini Yerusalem mi kaluar lamal ila via hahama mi muse, ini nehe nu aing harak. Ene Simon. Aing angu bendar Kirene enehe. Aing ba Alexander bot Rufus imang angu. Ana uhavede hula bendar Yerusalem mi ila, aarunge tentara ang naung aing pina, senge aing paksa ot Yesus Eleut angu tevang. 22 Ini Yesus Aing masiring ila mana nu angu mi, ene Golgota. Evengbanang hula, ꞌNehe ong kira emana.ꞌ 23 Angumi, ini hula anggor kalikil obat venggaot metma Yesus Enang Ana na, e Ana bisa Edira angu vengtahang. Aarunge Yesus bae na niang. 24-25 Ang muse, ini Yesus alalat metma leut vengpaku. Oma oda turinu kuaveng muse, ini leut angu bakung atahing. Ang muse tentara ang naung bing ening, e ateing hula nuba ba Yesus Ekondo angu medi. 26 Ang muse ini aarang nu metma Yesus Ong adana angmi paku, e mihurak vengbanang hula,
“Anga nehe Yahudi eRaja”
Angu ba ini metma e eela ening e, Yesus Aing hukung. 27 Angmi angu, nehe bui mi di aaru ini ing pakut iameang, nu Yesus Etene oa, nu Ebajaul oa. 28 [Ening aulang e ini naba ba Lahatala Esurat hamulang mi vengbanang iila angu akanap hula, “Ini Aing ening emenghula nehe jasi edadenang.”]
29 Nehe emangpi ba angmi lamal ang naung, uuling Yesus leut venghili angu ateing. Ang muse ini iong avavili aulange hura manantit ening Yesus ava aaloring vengbanang hula, “Ee! Aana hula Aana bisa Lahatala Ehava hamulang angu arahak, senge mietang tue se, Aana bale bakung atahing, etabi e, niang? 30 Aanake leut angu taang hela, e Aava vengahit ening lohi! Hula aulang, senge niomi etatabit vengbanang hula Aaing angu etatabit Lahatala Oal.”
31 Agama Yahudi ebuang vala ekapala ang naung bot guru agama ang naung di Yesus Ehura Emanantit hula, “Ana nehe aabeung ening lohi tila, aarunge Ana bae Ava ening lohit jadi niang! 32 Ana Ava ohit hula Aingba, ꞌKristusꞌ, Aing angu nehe ba turangmi Lahatala vengpalai tila angu. Nehe aabeung hula, Aing angu Israel eRaja. Hula etabit aulang se, Ana leut angu taang hela e pi ateing hengi. Aulang senge piomi etatabit Aing vengaanamang.”
Nehe aaru ba leut venghili Yesus At hama-hama angu di Ehura Emanantit aulang.
Mutu Yesus aamina
(Matius 27:45-56; Lukas 23:44-49; Yohanes 19:28-30)
33 Ang muse, kua kete mana angu vengtering miiipi ved hahama mi ila oda tue vedba. 34 Oda tue vedba muse, Yesus moring Aram ehur mi vengbanang hula, “Eloi-eloi! Lema sabaktani?” (Evengbanang hula, Aaingba Nimang! Aaingba Ne Lahatala! Etatalang ba Aana aamota ma Nenang Naing vengkilang alang?”)
35 Nehe aaedeng ba papeang angmi angu Yesus Amal angu vengmee. Ang muse ini hula, “He! Iini vengmee hengi! Ana Elia, Lahatala Ehur vala tura angu earu sehi.” 36 Ang muse, nehe nu bihit ila lotang medi e, metma anggor kalikil mi abaang. Senge lotang angu metma doba etupa mi tangi, senge taning mida Yesus ibar tupa angu dei e, Ana kadumi. Ang muse nehe angu mateng hula, “Kilang e pi uuling hengi! Misavaka eningse Elia hoa e At leut angu taang hela.”
37 Ang muse Yesus bot bale moring, seng muse Ana aamina.
38 Lahatala Ehava hamulang mi, noang talaling eele nu hilit metma Lahatala Ekamar hamulang angu venghabal. Yesus Eeng abaang muse, noang talaling eele angu takahit siat oang aaru, atelat hela alolang veng abaang.
39 Golgota mi angu, nehe jajaga enehe eele nu ue Yesus Eleut eela angmi tahi. Ana uuling Yesus Eaamina angu ateing muse, ana mijonga. Senge ana vengbanang hula, “Ado! Nehe anga, etatabit Lahatala Oal!”
40-41 Bot nehe jangu aaedeng angu, ola mi uuling Yesus Eaamina angu ateing. Ing angu ba tura Galilea mi Yesus bot Egahing vala ang naung imampi ing vengbalenta angu. Ing anguba Salome, Maria ba Magdala aabang enehe angu, bot Maria ba nu angu (Aing ba Yakobus kuar bot Yoses§ iva angu), bot jangu aabeung toang ba Yesus amulung hama-hamat hoa Yerusalem mi angu.
Ini Mutu Yesus Aing taloul
(Matius 27:57-61; Lukas 23:50-56; Yohanes 19:38-42)
42-43 Ang muse, nehe nu via valaping e, hula Yesus Ebaring angu leut taang at hela. Nehe angu ene Yusup. Aing angu bendar Arimatea enehe. Bot aing angu di Majelis Pengadilan agama Yahudi angu e ia atang. Aing angu omi aaung. Bot Lahatala Eparenta pinat metma Enehe toang adana, ejol angu di ana ue ading sehi.
Yesus Eaamina angu jumad veng. Emitobang angse nehe Yahudi ang naung ived sambajang adana. Angu ebele ba jumad veng angu, Yusup hula Yesus Ebaring angu ematurat at hela hengi. Ang muse ana ava ening barani, e ila gubernur Pilatus abung Yesus Ebaring angu banang. 44 Gubernur Pilatus vengmee Yusup banang aulang muse, ana mijonga. Ang muse ana hula, “Ah! Nehe angu uuser-uuser aaminat aulang! Na hula have bae aulang niang!”
Ang muse ana nehe gahing ila nehe jajaga enehe eele angu earu, e adang taaning hula, “Tatalang? Yesus angu aamina tila, e jedung?”
45 Nehe jajaga enehe eele angu vengbanang hula, “Nimang, Ana etabit venangmi aamina tila.” Gubernur Pilatus vengmeet aulang muse, ana vengjalit Yusup ot Yesus Ebaring angu medit at ila.
46 Ang muse Yusup ana Golgota mi ila muse, ana Yesus Ebaring angu leut taang at hela. Ana noang hiba ebili eele anguba metma Yesus Ebaring angu balolit ening aalus-aalus. Uangu adana, ini uhavede daang hiba nu var abu eele omimi venglabat medi. Ang muse ini Yesus Ebaring angu abaning ila metma daang angu mi maso. Seng ang muse, ini var halala eele nu aoring metma daang eviaha angu vengtering. Seng muse Yusup iimal ila.
47 Uangu veng, Maria ba Magdala enehe angu bot Maria ba eabeung (aing ba Yoses iva angu), di ila angmi. Oleve mana ba ini Yesus Ebaring ang metma mi mea angu euling bot venganit aaung-aaung.
* 15:15 Tentara Roma ang naung cambuk pake angu, te buar esar daeri ba nehe ening. Senge ini na ekira maang, niang se, jambil maang metma sar etupa angu vengparta. Cambuk angu, hula metma nehe varisik bae alolang niang ang se, ebuar ang naung vaher miosing. 15:16 Tentara ang naung imana angu, Latin ehur mi hula se, praetorium. Angu tentara ang naung imana mamolo ue inehe eele ehava elapa omimi. 15:21 Roma 16:13 15:24-25 Mazmur 22:19 15:28 Yunani ehur mi hurak tura angu, hur kokal 28 anga bae ue niang. 15:28 Yesaya 53:12 15:29 Mazmur 22:8; 109:25; Markus 14:58; Yohanes 2:19 15:34 Mazmur 22:2 15:36 Mazmur 69:22 15:38 Keluaran 26:31-33 § 15:40-41 Yunani ehur iiba angu hurak hula ꞌYoses ivaꞌ, aabeung ang hula ꞌYosef ivaꞌ. 15:40-41 Lukas 8:2-3