54
Gaga:ma:ne Sia:ne Gadosu
1 Gode! Dia gasa bagade hou amoga na gaga:ma!
Dia gasa bagade hou amoga na udigili halegale laloma:ma!
2 Gode! Na sia:ne gadobe nabima!
Na sia:be nabima!
3 Gasa fi dunu da hidale nama doagala:musa: maha!
Dodona:gi dunu, amo da Gode fada:ne hame dawa:su dunu
Ilia da na fane legemusa: maha.
4 Be Gode da na Fidisu esala!
Hina Gode da na Gaga:sudafa!
5 Gode da ilila: wadela:i hou amogawane nama ha lai dunu
ilima se dabe imunu da defea.
E da ili wadela:lesimu.
Bai E da Ea fi dunu fisimu hame dawa:.
6 Hina Gode! Na da Dima nodonewane gobele salasu hamomu.
Na da Dima nodone sia:mu.
Bai Di da noga:idafa.
7 Di da nama bidi hamosu amo huluane gaga:i.
Amola na da nama ha lai dunu huluane hasali dagoi ba:i.