25
Ablaham e sowo꞉
1 Ablaham eyo꞉ ga nowo꞉ di, ene wiyo꞉ Kedula.
2 Kedula a꞉ma꞉yo꞉lo꞉ kalu so꞉wa sa꞉la꞉la꞉yo꞉ we. Wa꞉la꞉bo꞉ Similan, nowo꞉ Yogsan, nowo꞉ Medan, nowo꞉ Midian, nowo꞉ Isbag, nowo꞉ Sua. Kalu so꞉wa elo꞉ sa꞉la꞉la꞉yo꞉ o꞉m.
3 Yogsana꞉ ene kalu so꞉wayo꞉ Seba o꞉lia꞉ Dedan ko꞉lo꞉ sa꞉la꞉li. Dedan eya a꞉la꞉ta꞉ga꞉lo꞉ so꞉lo꞉ fa꞉la꞉dowo꞉wo꞉ Asul kaluka꞉isale, nowo꞉ Letus kaluka꞉isale, nowo꞉ Leum kaluka꞉isale.
4 Midiana꞉ ene kalu so꞉wayo꞉ Efa, nowo꞉ Efel, nowo꞉ Hanog, nowo꞉ Abida, nowo꞉ Elda ko꞉lo꞉ sa꞉la꞉li. Kalu i we tambo Kedula eya a꞉la꞉ta꞉ga꞉ fa꞉la꞉dowo꞉.
5 Ablaham eyo꞉ ene dabuno꞉ tambo Aisa꞉g e dima꞉ki saefa꞉.
6 Ko꞉sega Ablaham e o꞉silikiyo꞉, nanog dian ga a꞉la꞉ elo꞉ di a꞉ma꞉lo꞉ kalu so꞉wa sa꞉la꞉li i o꞉mo꞉wo꞉ boba kelego꞉wo꞉ sagalifa꞉. A꞉la꞉ta꞉ga꞉ ene so꞉wa Aisa꞉gbo꞉wo꞉ fogo꞉ dimina꞉kiyo꞉, Ablaham eyo꞉ iyo꞉ ofdo꞉ yan doba꞉da꞉ hen a꞉na iliga꞉felo꞉.
7-8 Ablaham e donayo꞉ 175 a꞉la꞉fo꞉wo꞉ ta꞉ta꞉ga꞉yo꞉, elo꞉ ta꞉i mio꞉wo꞉ nafale ko꞉lo꞉, soma꞉no꞉ au sowo꞉. A꞉la꞉fo꞉ko꞉lo꞉ e iasi dane ane sab o꞉lia꞉ galima꞉ni ane.
9-10 E sowabiki, ene so꞉wa Aisa꞉g dia꞉ Ismael dia꞉ma꞉yo꞉ ene do꞉mo꞉wo꞉ dia꞉ha꞉na꞉sa꞉ga꞉, Mamele hen anib a꞉namio꞉, Makbela amilo꞉ u a us a꞉na difa꞉. Tamin amio꞉ hen a꞉no꞉ Eflon eno꞉. E Hit kalu Sohala꞉ inso꞉ ko꞉lo꞉, Ablahama꞉ ingayo꞉ sowabi a꞉na dalima꞉no꞉ a꞉la꞉ta꞉ga꞉ kilili. A꞉la꞉fo꞉ko꞉lo꞉ Selalo꞉ daido꞉wa, Ablahamo꞉lo꞉ a꞉na daido꞉.
11 Ablaham e sowa꞉sa꞉ga꞉ dowabikiyo꞉, ene so꞉wa Aisa꞉g e Gode eyo꞉ nafale mesea꞉ki ta꞉fo꞉len. Ho꞉len a꞉namio꞉ Aisa꞉g eyo꞉ Bil Lahai Loi hen aniba sa꞉sen.
Ismaela꞉ eso꞉lo꞉wo꞉ we
12 Ismaela꞉ ene eso꞉lo꞉ ta꞉i ane malolo꞉wo꞉ we. Ismael e Ha꞉gaya꞉ inso꞉. Ha꞉ga e Isib ka꞉isale ko꞉lo꞉ Selaya꞉ nanog dia꞉sen gayo꞉ e. Ablaham eyo꞉ e dia꞉sa꞉ga꞉yo꞉, Ismael ko꞉lo꞉ sa꞉la꞉li.
13-16 Ismaela꞉ inso꞉ a꞉la꞉ta꞉ga꞉ so꞉lo꞉ i amilo꞉ fa꞉la꞉dowo꞉ wi agelo꞉wo꞉ we. Wa꞉la꞉bo꞉ Nebayod, a꞉ma꞉ fa꞉so꞉ Kedal, a꞉ma꞉ fa꞉so꞉ Atabel, a꞉ma꞉ fa꞉so꞉ Mibsam, a꞉ma꞉ fa꞉so꞉ Misma, a꞉ma꞉ fa꞉so꞉ Duma, a꞉ma꞉ fa꞉so꞉ Masa, a꞉ma꞉ fa꞉so꞉ Hadad, a꞉ma꞉ fa꞉so꞉ Tema, a꞉ma꞉ fa꞉so꞉ Yedul, a꞉ma꞉ fa꞉so꞉ Nafis, a꞉la꞉ta꞉ga꞉ tifo꞉ Kedema. Wi sadelab a꞉no꞉ Ismaela꞉ inso꞉wo꞉ o꞉m. A꞉la꞉ta꞉ga꞉ wi a꞉no꞉ ili amisa꞉n o꞉lia꞉ hen ilo꞉ sa꞉sen a꞉no꞉lia꞉ a꞉no꞉ko꞉ wikilo꞉. A꞉la꞉fo꞉ko꞉lo꞉ so꞉wa wena a꞉la꞉ta꞉ga꞉lo꞉ so꞉lo꞉ kugula꞉fo꞉ fa꞉la꞉dowo꞉wo꞉ wiyo꞉ o꞉m.
17 Ismael e donayo꞉ 137 a꞉la꞉fo꞉ a꞉no꞉ ta꞉ta꞉ga꞉ sowo꞉ ko꞉lo꞉, e iasi dane ane sab o꞉lia꞉ galima꞉ni ane.
18 Ismaela꞉ ema꞉mu ilo꞉ mesa꞉ni aneyo꞉, Hafila a꞉na a꞉la꞉ta꞉ga꞉lo꞉ ta꞉i aneyo꞉ Sul hen a꞉na edo꞉. Isib a꞉la꞉ta꞉ga꞉ Asilia hena ha꞉nakiyo꞉, Sul hen a꞉no꞉ Isib o꞉lia꞉ eleya a꞉lab. A꞉la꞉ta꞉ga꞉ so꞉lo꞉ i a꞉no꞉ ao o꞉lia꞉yo꞉ egelebo꞉ ha꞉fa꞉nolowo꞉ mo꞉sa꞉sen.
Aisa꞉g eyo꞉ Iso꞉ o꞉lia꞉ Ya꞉kob o꞉lia꞉ sa꞉la꞉li
19 Ablahama꞉ inso꞉ Aisa꞉g ene eso꞉lo꞉ ta꞉i ane malolo꞉wo꞉ we. Ablaham eyo꞉ Aisa꞉g sa꞉la꞉li.
20 Aisa꞉go꞉ donayo꞉ 40 a꞉la꞉fo꞉wo꞉ ta꞉ta꞉sa꞉ga꞉, La꞉ba꞉gayo꞉ a꞉na di. La꞉ba꞉gaya꞉ iyayo꞉ Betuel a꞉la꞉ta꞉ga꞉ ene aowo꞉ Laban. Betuel o꞉lia꞉ Laban o꞉lia꞉yo꞉ Alam kalu ko꞉lo꞉ Mesobotemia a꞉na sa꞉sen.
21 Aisa꞉ga꞉ ingayo꞉ fain dowabiki, e asuwa꞉foma꞉ki Yawemo꞉ dulugu sio꞉. Eyo꞉ a꞉la꞉gabiki, Yawe eyo꞉ elo꞉ to sio꞉ a꞉no꞉ da꞉da꞉sa꞉ga꞉, La꞉ba꞉gayo꞉ asuwa꞉tabiki, a꞉na alelo꞉.
22-23 La꞉ba꞉ga e alela꞉likiyo꞉, so꞉wa ko꞉lo꞉ kufa꞉ us amilo꞉ sab a꞉no꞉ ida꞉nino꞉ ani tandelabiki, eyo꞉ a꞉la꞉asulo꞉, “Ni kufa꞉ usamilo꞉ dimidab we, wangaki gaba꞉le?” A꞉la꞉fo꞉ko꞉lo꞉ eyo꞉ a꞉la꞉asulakiyo꞉, Yawemo꞉ dabu ba꞉dabiki, Yawe eyo꞉ emo꞉wo꞉ a꞉la꞉sio꞉,
“Gi kufa꞉ usamilo꞉ so꞉wa a꞉la꞉ sab koma꞉yo꞉,
tif amio꞉ so꞉lo꞉ a꞉la꞉ alobanala꞉fa꞉ib.
So꞉lo꞉ nowo꞉ halaido꞉ dowaki, nowo꞉ tiginila꞉ma꞉ib a꞉la꞉ta꞉ga꞉
wa꞉la꞉bo꞉ tifa꞉ nanog dian kalu doma꞉ib.”
24 So꞉wa sa꞉la꞉lia꞉no꞉ ho꞉lende dowab a꞉namio꞉, hendele so꞉wayo꞉ a꞉la꞉ sab a꞉la꞉asulo꞉.
25 Kalu so꞉wa wa꞉la꞉b sa꞉la꞉liab a꞉no꞉ mada genelo꞉ a꞉la꞉ta꞉ga꞉ do꞉la꞉ma꞉ fo꞉ndo꞉ dowo꞉ ko꞉lo꞉, e Iso꞉ wikilo꞉.
26 A꞉ma꞉ fa꞉s amio꞉ ene aowo꞉ handalowakiyo꞉, eyo꞉ Iso꞉wa꞉ gido꞉fo꞉ doma ta꞉lidota꞉ga꞉ handalowo꞉ ko꞉lo꞉, so꞉wa a꞉no꞉ Ya꞉kob wikilo꞉. La꞉ba꞉ga eyo꞉ so꞉wa a꞉la꞉ a꞉no꞉ sa꞉la꞉liabikiyo꞉, Aisa꞉g e donayo꞉ 60 a꞉la꞉fo꞉ dowo꞉.
Iso꞉ e wa꞉la꞉b dowo꞉wo꞉ ka ta꞉fo꞉
27 So꞉wa a꞉la꞉yo꞉ anaya꞉sa꞉ga꞉yo꞉, Iso꞉ e hena꞉ usa sia꞉liki, no꞉lo꞉ buluma꞉no꞉ kalu dowo꞉. Ko꞉sega Ya꞉kob e so꞉g a ka siliki, ha꞉fa꞉nolo dowa꞉sen.
28 Aisa꞉g e, Iso꞉ elo꞉ no꞉ bululakilo꞉ ho dia꞉yab a꞉no꞉ ma꞉no꞉wo꞉ alan asulab ko꞉lo꞉, eyo꞉ Iso꞉wo꞉ mada alan asulo꞉. Ko꞉sega La꞉ba꞉ga eyo꞉ Ya꞉kobo꞉ mada alan asulo꞉.
29 Ho꞉len no amio꞉, Ya꞉kob eyo꞉ ma꞉no꞉ so꞉da꞉len amio꞉, Iso꞉ e hena꞉ usa a꞉la꞉ta꞉ga꞉ a꞉ma꞉la꞉ mio꞉. E halaido꞉lo꞉ma dowaki, maiyo꞉ alan dowo꞉.
30 Iso꞉ eyo꞉ Ya꞉kobo꞉wo꞉ a꞉la꞉sio꞉, “Ne mada maiyab ko꞉lo꞉ ma꞉no꞉ gilo꞉ so꞉fa꞉ genelo꞉ ko, nelo꞉ dimina.” (Eyo꞉ a꞉la꞉sio꞉ ko꞉lo꞉, Iso꞉ ene wiyo꞉ nowo꞉ Idom.)
31 Ya꞉kob eyo꞉ a꞉ma꞉la꞉bo꞉ a꞉la꞉sio꞉, “Ma꞉no꞉ we gemo꞉ o꞉li dimia꞉no꞉ ko꞉sega giyo꞉ kelego꞉ nowo꞉ nemo꞉ ko꞉le dimina. Ge wa꞉la꞉b ko꞉lo꞉, dowa꞉ dabun nafaleyo꞉ wa꞉la꞉ba꞉ dian. Ko꞉sega o꞉go꞉ giyo꞉ ‘wa꞉la꞉bo꞉ ge dowab’ a꞉la꞉sa꞉lalega, niyo꞉ ma꞉no꞉ we gemo꞉wo꞉ a꞉na mea꞉no꞉” a꞉la꞉sio꞉.
32 Iso꞉ eyo꞉ a꞉la꞉sio꞉, “Ne maiyo꞉wo꞉ alan dowaki, soma꞉no꞉wo꞉ o꞉ngo꞉ dowab ko꞉lo꞉, ne maiyo꞉ sowalega, wa꞉la꞉b so꞉wa wi a꞉ma꞉yo꞉ waga asuwa꞉fa꞉iba?”
33 Ya꞉kob eyo꞉ towo꞉ a꞉la꞉sio꞉, “Ge tamina Godeya꞉ si wa꞉l amio꞉ dinali saefoma.” A꞉la꞉fo꞉ko꞉lo꞉ Iso꞉ eyo꞉ dinali sa꞉la꞉sa꞉ga꞉ dimiabiki, Ya꞉kob e wa꞉la꞉b o꞉ngo꞉wo꞉ a꞉na dowo꞉.
34 A꞉la꞉dinali sa꞉la꞉sa꞉ga꞉, Ya꞉kob eyo꞉ falawa so꞉fa꞉ o꞉lia꞉ ta꞉ya꞉la꞉ so꞉fa꞉ ho꞉n wo꞉gelo꞉ o꞉lia꞉yo꞉ Iso꞉ e maiya꞉ki dimi. E ma꞉no꞉ a꞉no꞉ ho꞉n o꞉lia꞉ na꞉la꞉ga꞉, a꞉na ane. A꞉la꞉go꞉ko꞉lo꞉ Iso꞉ e iyayo꞉ sowakilo꞉ dabun kelego꞉ emo꞉lo꞉ dimia꞉no꞉ a꞉no꞉ mo꞉beaki, eyo꞉ o꞉ngo꞉malo꞉ngo꞉ a꞉la꞉asulo꞉.