23
Ablaham eyo꞉ Selaya꞉ do꞉mo꞉lo꞉ a꞉ido꞉ hen a꞉no꞉ kilili
1-2 Sa꞉la e donayo꞉ 127 a꞉la꞉fo꞉ a꞉no꞉ dota꞉ga꞉ sowo꞉. Ho꞉len a꞉namio꞉ e Ka꞉ina꞉n hen a꞉na sen ami, Kiliat Alba amisa꞉n, nowo꞉ wiyo꞉ Heblon, e a꞉na elena sowo꞉. E sowabikiyo꞉, Ablaham e kuo꞉ya꞉lab a꞉na tina꞉sa꞉ga꞉ nofolaki ya꞉la꞉len.
3-4 E a꞉namilo꞉ ya꞉la꞉likilo꞉ sen a꞉no꞉ dasilia꞉sa꞉ga꞉ ha꞉nakiyo꞉, Hit kalu imo꞉wo꞉ a꞉la꞉sio꞉, “Ne mageso꞉ kaluwo꞉ o꞉ngo꞉ ya꞉ga꞉ gi o꞉lia꞉ sen ko꞉lo꞉, ni ga sowo꞉ we hen no꞉no꞉ndo꞉ kililiabde a꞉na dalima꞉no꞉ ko꞉lo꞉, hen heb gilo꞉wo꞉ nelo꞉ kililia꞉niki dimina,” a꞉la꞉sio꞉.
5-6 Hit kalu iliyo꞉ Ablahambo꞉ a꞉ma꞉la꞉ sa꞉laki, “Kalu alan, ge nilido꞉ sa꞉ma꞉nigo꞉l we dabuma. Niliyo꞉ ina꞉lila꞉bo꞉ dalima꞉no꞉ hen nolo꞉ dimidaefa꞉ da꞉lab. Ni us wenamio꞉ ge wabulun kalu ko꞉lo꞉, giyo꞉ dalima꞉no꞉ hen nafale gilo꞉ ba꞉dab a꞉na daida꞉bi. Gi ga sowo꞉ a꞉no꞉, heno꞉ o꞉bamida꞉ya꞉le go꞉no꞉ndo꞉ dalima꞉no꞉ asulabde a꞉na dalima꞉no꞉ dowalega, hendo꞉ biso꞉ kalu a꞉ma꞉yo꞉ mo꞉ka꞉ma꞉no꞉.”
7 A꞉la꞉do꞉ sa꞉lab a꞉no꞉ da꞉da꞉ga꞉yo꞉, Ablaham e dasila꞉sa꞉ga꞉, Hit hendo꞉ biso꞉ kalu iyo꞉ sagalema꞉ki, e misa꞉yo꞉ a꞉na gulu.
8 A꞉la꞉ta꞉ga꞉ Ablaham eyo꞉ imo꞉wo꞉ a꞉la꞉sio꞉, “Giliyo꞉ hendele a꞉naka dalima꞉ki asulalega, gio꞉ ha꞉na꞉sa꞉ga꞉ Sohal inso꞉ Eflon emo꞉wo꞉ dabu ba꞉ba꞉ni hamana.
9 Makbela hen a꞉namio꞉, Eflona꞉ ene egelo꞉ anib amio꞉, ene u ayo꞉ nowo꞉ a꞉lab ko꞉lo꞉, hen a꞉no꞉ nemo꞉ dimina꞉ki, giliyo꞉ emo꞉ dabu ba꞉da꞉bi. Eyo꞉ nemo꞉wo꞉ dimialikiyo꞉, hen a꞉namilo꞉ mole elo꞉ da꞉feab aumbo꞉, niyo꞉ gili siwa꞉l amio꞉ a꞉na kililia꞉no꞉ ko꞉lo꞉, ni ga sowo꞉ a꞉no꞉ a꞉na dalima꞉no꞉”
10 Ablaham eyo꞉ a꞉la꞉sa꞉labikiyo꞉, Hit kalu Eflon elo꞉ kegeo꞉ us a꞉namio꞉ elen. Hit kalu o꞉lia꞉ kaluka꞉isale amisa꞉n toga꞉me a꞉namilo꞉ kegeo꞉ sen i a꞉ma꞉ si wa꞉l amio꞉, Eflon eyo꞉ a꞉ma꞉la꞉yo꞉ a꞉la꞉sio꞉,
11 “A, a꞉la꞉ba. Kalu alan, ni to we dabuma. Niyo꞉ egelo꞉ hen o꞉lia꞉ u a o꞉lia꞉yo꞉ gemo꞉ madali dimio꞉l. Ni so꞉lo꞉wa꞉ si wa꞉l amio꞉ gemo꞉ ka dimio꞉l ko꞉lo꞉, sowo꞉ gilo꞉ a꞉no꞉ o꞉li dalima꞉ib.” Eflon eyo꞉ a꞉la꞉sio꞉.
12 Ablaham eyo꞉ to a꞉no꞉ ko꞉lo꞉ da꞉dakiyo꞉, eyo꞉ hendo꞉ biso꞉ kalu kegeo꞉ imo꞉wo꞉ ene misa꞉yo꞉ wa꞉ka gulu.
13 A꞉la꞉dimida꞉sa꞉ga꞉yo꞉ hendo꞉ biso꞉ kalu kegeo꞉ a꞉no꞉ tambo dabuma꞉ki, Ablaham eyo꞉ Eflonbo꞉wo꞉ a꞉la꞉sio꞉, “To nilo꞉ sa꞉ma꞉nigo꞉l we, giyo꞉ dinafa dabuma. Nilo꞉ hen kililia꞉no꞉ mole ililo꞉ da꞉lab a꞉no꞉ gemo꞉ dimia꞉nigo꞉l ko꞉lo꞉, giyo꞉ o꞉li dia꞉ib a꞉la꞉asulo꞉l. Niyo꞉ heno꞉ kililia꞉sa꞉ga꞉yo꞉, sowo꞉ a꞉no꞉ a꞉na dalima꞉no꞉.”
14-15 A꞉la꞉sa꞉labiki Eflona꞉ a꞉ma꞉la꞉ sa꞉laki, “Kalu alan, nilo꞉ so꞉lo꞉l we ge dabuma. Hen we silba mole 400 a꞉la꞉fo꞉ a꞉ma꞉ kililia꞉no꞉ dowo꞉, ko꞉sega na꞉no꞉ mole to nenela꞉mela꞉no꞉wo꞉ ka ta꞉foma. Ge sowo꞉wo꞉ ka daida꞉bi.” Eflon eyo꞉ a꞉la꞉sio꞉.
16 A꞉la꞉fo꞉ko꞉lo꞉ Eflon elo꞉ Hit kaluwa꞉ si wa꞉l amilo꞉ to sio꞉ a꞉no꞉ Ablaham eyo꞉ kudu ha꞉naki, silba mole 400 a꞉la꞉fo꞉ a꞉no꞉ hendele dinafa aloba꞉da꞉sa꞉ga꞉, mole a꞉no꞉ emo꞉ dimi.
17-18 A꞉la꞉fo꞉ko꞉lo꞉ Hit kalu o꞉lia꞉ kaluka꞉isale amisa꞉n toga꞉me a꞉namilo꞉ kegeo꞉ sen i a꞉ma꞉ si wa꞉l amio꞉, Eflon eyo꞉ Makbela hen us a꞉namilo꞉ egelo꞉wo꞉lo꞉, i a꞉namilo꞉ a꞉labo꞉lo꞉, a꞉la꞉ta꞉ga꞉ u ayo꞉lo꞉, a꞉no꞉ tambo Ablahambo꞉ dimi. Makbela hen a꞉no꞉, Mamele hen doba꞉da꞉yo꞉ ko꞉na꞉ma dowo꞉ ko꞉lo꞉, hen usamilo꞉ a꞉no꞉ Ablaham e kilili.
19 A꞉la꞉fo꞉ko꞉lo꞉ Ka꞉ina꞉n hen us a꞉namio꞉, Heblon amisa꞉n anib amio꞉, Mamele hen doba꞉da꞉, Makbela hen a꞉no꞉ Ablaham eyo꞉ dia꞉sa꞉ga꞉, inga Selayo꞉ u a usa a꞉nami daida꞉sa꞉ga꞉ difa꞉.
20 Tamin amio꞉ egelo꞉ o꞉lia꞉, u a a꞉no꞉lia꞉yo꞉ Hit kalu ilino꞉ dowo꞉ ko꞉sega Ablaham e kililia꞉sa꞉ga꞉ di.