8
هپتمی مُهر و تلاهێن بۆسۆچ
1 وهدے گوَرانڈا هپتمی مُهر پَچ کرت اَرشا کِساس نێم ساهتا بێتئواری بوت.
2 پدا من هپتێن پرێشتگ دیستنت که هُدائے دێما اۆشتاتگ‌اتنت. آیان هپت کَرنا دئیگ بوت.
3 دگه پرێشتگے آتک و کُربانجاهئے کرّا اۆشتات که تلاهێن بۆسۆچے گۆن اَتی. آییا باز سۆچُکی دئیگ بوت که گۆن هُدائے سجّهێن پَلگارتگێنانی دْوایان یکجاهِش بکنت و هما تلاهێن کُربانجاهئے سرا پێشِش بکنت که هُدائے تهتئے دێما اِنت.
4 سۆچُکیانی دوتّ گۆن هُدائے پَلگارتگێنانی دْوایان هئوار، چه پرێشتگئے دستا هُدائے کرّا بُرزاد شتنت.
5 پدا پرێشتگا بۆسۆچ زرت، چه کُربانجاهئے آسا پُرّی کرت و زمینئے سرا دئوری دات. گْرندان گْرندِت، بُرزێن تئوار چست بوتنت، گْرۆکان جت و زمین‌چَنڈے آتک.
کَرنا
6 پدا هپتێن پرێشتگان، که آیان هپتێن کَرنا گۆن اتنت، وتا په کَرنایانی جنَگا تئیار کرت.
7 ائولیگا وتی کَرنا جت، ترۆنگل و آس گۆن هۆنا هئوار زمینئے سرا اێر رێچگ بوت. زمینئے سئےیک آسا اێر برت، درچکانی سئےیک آسا اێر برت و سجّهێن سبزێن کاه آسا اێر برتنت.
8 دومی پرێشتگا وتی کَرنا جت، بلاهێن کۆهێئے ڈئولێن چیزّے که پَهک بُن اَت، دریائے تها دئور دئیگ بوت و دریائے سئےیک هۆن بوت.
9 دریایی سَهدارانی سئےیک مُرت و بۆجیگانی سئےیک تباه بوت.
10 سئیمی پرێشتگا وتی کَرنا جت، بلاهێن اِستارے که مَشَلێئے ڈئولا رۆک اَت، چه آسمانا کئور و چمّگانی سئےیکئے سرا کپت.
11 اِستارئے نام «جئور» اِنت. آپانی سئےیک تَهل بوت و بازێن مردمے چه آپانی تَهلیا مُرت.
12 چارمی پرێشتگا وتی کَرنا جت. رۆچئے سئےیک، ماهئے سئےیک و اِستارانی سئےیک اَنچش جنَگ بوت که سئےیکِش تهار بوت. رۆچا هم وتی رُژناییئے سئےیک گار دات و شپا هم وتی رُژناییئے سئےیک گار دات.
13 رندا من چارِت و اِشکت که آسمانئے نیاما بالێن وَکابے کوکّار کنگا اَت: «اَپسۆز، اَپسۆز، اَپسۆز په زمینئے نندۆکان، هما کَرنایانی تئوارانی سئوَبا که اے دگه سئیێن پرێشتگان جنَگی اَنت.»