3
پاکشۆدۆکێن یَهیائے کُلئو
(مَتّا 3:1–12؛ مَرکاس 1:1–8؛ یوهَنّا 1:19–28)
1 رومئے بادشاه، تیبِریوس کئیسرئے بادشاهیئے پانزدهمی سال اَت. هما رۆچان، پُنتیوس پیلاتوس، یَهودیَهئے والی اَت. هیرودیس، جَلیلئے هاکم اَت. هیرودیسئے برات پیلیپُس، اِتوریَه و تْراهونیتیسئے هاکم اَت و لیسانیاس، آبیلینیئے هاکم اَت.
2 هَنّا و کیاپا، آ وهدئے مسترێن دینی پێشوا اتنت. هما رۆچان، هُدائے کُلئو گیابانا زَکرَیائے بَچّ، یَهیائے سرا آتک.
3 یَهیا، اُرْدُنئے کئورئے دوێن پهناتان هر جاگهَ شت و هُدائے کُلئوی په مردمانَ رَسێنت و گوَشتی: «چه وتی گناهان پشۆمان ببێت و پاکشۆدی بکنێت که بَکشگَ بێت.»
4 اَنچش که اے بارئوا اِشئیا نبیئے کتابا نبشته اِنت:
گیابانا، کَسے گوانکَجنت:
«هُداوندئے راها تئیار و
آییئے کِشکا راست و تچک بکنێت.
5 سجّهێن کَنڈ و دَرَگپُرّ کنگَ بنت و
سجّهێن کۆه و جُمپ جَهل آرگَ بنت.
چپّ و چۆٹێن راه تچک کنگَ بنت و
سجّهێن سرکپ و اێرکپ همدَپ و هَملَسون کنگَ بنت.
6 جهانئے سجّهێن مردم چه هُدائے نێمگا
رَکّێنگ و رَستگاریَ گندنت.»
7 وهدے مردم په پاکشۆدی کنگا آتک و مُچّ بوتنت، یَهیایا گۆن آیان گوَشت: «او سْیَه‌مارزادگان! کئیا شمارا ڈاه داتگ و گوَشتگ که چه هُدائے آیۆکێن کَهر و گَزبا رَکّتَ کنێت؟!
8 اَنچێن کار بکنێت چه آیان پَدّر ببیت که شما په دل چه وتی گناهان پشۆمان بوتگێت. وتی دلا پَهر مبندێت که ‹ما اِبراهێمئے نَسل و اۆبادگ اێن.› من شمارا گوَشان که هُدا چه اے سِنگ و ڈۆکان هم، په اِبراهێما چُکّ و اۆبادگ پێدا کرتَ کنت.
9 نون تَپَر تئیار اِنت درچکان چه بُنا بگُڈّیت و هر درچکے که شَرّێن بَرَ نئیاریت، گُڈّگ و آسا دئور دئیگَ بیت.»
10 مردمان جُست کرت: «گڑا ما چے بکنێن؟»
11 آییا پَسّئو دات: «اگن کَسێا دو جامگ هست، یکّێا هما کَسا بدنت که آییا هچّ نێست و اگن کَسێئے کِرّا وَرد و وراک هست، آیان هم بهر بکنت.»
12 سُنگی و مالیاتگیر هم په پاکشۆدیا یَهیائے کِرّا آتکنت. جُستِش کرت: «او استاد! ما چے بکنێن؟»
13 گڑا آییا گوَشت: «چه گیشّێنتگێن کِساسا گێشتر مگرێت.»
14 سپاهیگان هم چه آییا جُست گپت: «ما چے بکنێن؟» پَسّئوی دات: «په زۆر چه کَسێا زَرّ مگرێت و کَسێئے سرا درۆگێن تُهمت مجنێت. وتی مُزّئے سرا گُزران بکنێت.»
15 مردم، هُدائے واده داتگێن رَکّێنۆکئے اِنتزار و وَدارا اتنت، پمێشکا هئیالِشَ کرت که بلکێن یَهیا هما مَسیه اِنت؟
16 بله یَهیایا آ سجّهێن پَسّئو داتنت و گوَشتی: «من شمارا تهنا گۆن آپا پاکشۆدیَ دئیان، بله یک اَنچێن کَسے آیَگی اِنت که آ چه من زۆراکتر اِنت و من آییئے کئوشبندانی بۆجگئے لاهک هم نه‌آن. آ شمارا گۆن هُدائے پاکێن روه و آسا پاکشۆدیَ دنت.
17 آییا چه بوچّ و پُگان دانئے جتا کنگ و گیشّێنگا، هَنشۆنے دستا اِنت. جۆهانا پاک و سَلّهَ کنت و دانان اَمبارا اێرَ کنت، بله پُگ و پلاران اَنچشَ سۆچیت که آسِش هچبرَ نمریت.»
18 یَهیایا، مردم دگه بازێن سر و سۆج و دِلبڈّی هم داتنت و وشّێن مستاگ، دئیان کرت.
19 بله وهدے یَهیایا، جَلیلئے هاکم هیرودیس په اے هاترا سکّ مئیاریگ کرت که آییا گۆن وتی براتئے جَن هیرودیایا، ناراهێن نزّیکی هست‌اَت و دگه بازێن رَدێن کاری هم کرتگ‌اَت،
20 هیرودیسا وتی گَندهێن کار گێش کرت و یَهیایی گپت و بندیگ کناێنت.
ایسّائے پاکشۆدی
(مَتّا 3:13–17؛ مَرکاس 1:9–11)
21 وهدے یَهیا بازێن مردمان پاکشۆدی دئیگا اَت، آییا ایسّا هم پاکشۆدی دات. وهدے ایسّا دْوا کنگا اَت، هما وهدا آسمانئے دپ پَچ بوت و
22 پاکێن روه، کپۆتێئے دْرۆشما آییئے سرا اێر نِشت و چه آسمانا تئوارے آتک که «تئو منی دۆستێن بَچّ ائے، من چه تئو باز وشّ و رَزا آن.»
ایسّائے بێه و بُنیاد
(مَتّا 1:1–17)
23 ایسّایا کمّ و گێش سی سال اَت که وتی کاری بُنگێج کرت. مردمانی هئیال اَت که ایسّا ایسُّپئے چُکّ اِنت. ایسُّپ هالیئے چُکّ اِنت و چه هالیا رَند:
24 مَتّات، مَتّاتِ لاوی، لاویِ مَلکی، مَلکیِ یَنّا، یَنّایِ ایسُّپ،
25 ایسُّپِ مَتّاتیا، مَتّاتیایِ آموس، آموسِ ناهوم، ناهومِ هَسْلی، هَسْلیِ نَجّای،
26 نَجّایِ مَهَت، مَهَتِ مَتّاتیا، مَتّاتیایِ شِمی، شِمیِ ایسُّپ، ایسُّپِ یَهودا،
27 یَهودایِ یوهَنان، یوهَنانِ ریسا، ریسایِ زِروبابِل، زِروبابِلِ شیالتیال، شیالتیالِ نیری،
28 نیریِ مَلْکی، مَلْکیِ اَدّی، اَدّیِ کوسام، کوسامِ اِلمودام، اِلمودامِ اێر،
29 اێرِ یوشَه، یوشَهِ اِلیازَر، اِلیازَرِ یوریم، یوریمِ مَتّات، مَتّاتِ لاوی،
30 لاویِ شَمون، شَمونِ یَهودا، یَهودایِ ایسُّپ، ایسُّپِ یونان، یونانِ اِلیاکیم،
31 اِلیاکیمِ مَلیا، مَلیایِ مینان، مینانِ مَتّاتا، مَتّاتایِ ناتان، ناتانِ داوود،
32 داوودِ یَسّی، یَسّیِ اۆبئید، اۆبئیدِ بۆازّ، بۆازِّ سَلمون، سَلمونِ نَهْشون،
33 نَهشونِ اَمیناداب، اَمینادابِ اَرَم، اَرَمِ هِسْرون، هِسْرونِ پارِس، پارِسِ یَهودا،
34 یَهودایِ آکوب، آکوبِ اِسْهاک، اِسْهاکِ اِبراهێم، اِبراهێمِ تارَه، تارَهِ ناهور،
35 ناهورِ سُروج، سُروجِ رئوو، رئووِ پالَج، پالَجِ آبێر، آبێرِ شالَه،
36 شالَهِ کئینان، کئینانِ اَرْپَکْشاد، اَرْپَکْشادِ سام، سامِ نوه، نوهِ لامَک،
37 لامَکِ مَتوشالَه، مَتوشالَهِ هَنّوه، هَنّوهِ یارِد، یارِدِ مَهَلالیل، مَهَلالیلِ کئینان،
38 کئینانِ اَنوش، اَنوشِ شئیس، شئیسِ آدم، و آدم چه هُدائے نێمگا اِنت.