19
یَهودیانی کێنگ و پیلاتوسئے دودلی
(مَتّا 27:27–31؛ مَرکاس 15:16–20)
1 آ وهدی، پیلاتوسا هُکم دات ایسّایا شَلّاک و هئیزران بجننت.
2 پئوجیان چه ڈَنگر و کُنٹگان تاجے جۆڑێنت و ایسّائے سرا اێر کرت، بادشاهی جَمورنگێن کَباهے هم گوَرا داتِش.
3 آییئے کِرّا آیان و گوَشان اتنت: «دْرود و دْرَهبات، او یَهودیانی بادشاه!» شَهماتِش هم جت.
4 پیلاتوس پدا یَهودیانی کِرّا آتک و گوَشتی: «بچارێت، شمئے کِرّا کارانی تان بزانێت که من په آییا هچ مئیارے نگندان.»
5 ایسّا که آییا کُنٹگێن تاجے سرا و جَمورنگێن کَباهے گوَرا اَت، ڈنّا در آتک. پیلاتوسا گوَشت: «بچارێت، اے مرد همِدا اِنت!»
6 وهدے مزنێن دینی پێشوایان و آیانی سپاهیگان آ دیست، کوکّارِش کرت: «سَلیبی کَشّ! سَلیبی کَشّ!» پیلاتوسا گوَشت: «شما وت آییا سَلیب بکَشّێت. من هچ وڑێن مئیارے په آییا نگندان.»
7 یَهودیان گوَشت: «مارا شَریَتے هست‌اِنت که آییئے رهبندانی رِدا، باید اِنت کُشگ ببیت، چیا که گوَشتگی: ‹من هُدائے چُکّ آن.›»
8 وهدے پیلاتوسا اے اِشکت، چه پێشا گێشتر تُرسی دلا نِشت.
9 وتی کۆٹ و کلاتا شت و چه ایسّایا جُستی کرت: «تئو چه کجا ائے؟» ایسّایا پَسّئو ندات.
10 پیلاتوسا گوَشت: «منا پَسّئوَ ندئیئے؟ تئو نزانئے که تئیی آزاتی و سَلیب کَشّگئے اِهتیار منی دستا اِنت؟»
11 ایسّایا پَسّئو دات: «اگن هُدایا ترا اے اِهتیار مداتێن، منی سرا ترا هچ واک و اِهتیارے نێست‌اَت. بله، هما که منا تئیی دستا داتی، گێشتر مئیاربار اِنت.»
12 چه اِد و رَند، پیلاتوسا آییئے آزات کنگئے جُهدَ کرت، بله یَهودیان کوکّارَ کرت: «اگن اے مردا آزات بکنئے، کئیسرئے دۆزواه نه‌ائے. هرکَس وتا بادشاه بزانت و بلێکیت، کئیسرئے دژمن اِنت.»
13 وهدے پیلاتوسا اے اِشکت، ایسّایی ڈنّا آورت و وت یک جاهے په هُکم کنگا نِشت که آییا «سِنْگپَرْشَ» گوَشنت، په آرامی زبانا «جَبّاتا» بیت.
14 سَرگوَزئےتئیاریئے رۆچئے نێمرۆچا، پیلاتوسا گۆن یَهودیان گوَشت: «بچارێت، شمئے بادشاه همِدا اِنت!»
15 بله آیان کوکّار کرت: «گاری کن! گاری کن! سَلیبی کَشّ!» پیلاتوسا گوَشت: «پکّا شما لۆٹێت که شمئے بادشاها بکُشان؟» مزنێن دینی پێشوایان گوَشت: «چه کئیسرا اَبێد، مارا دگه بادشاهے نێست.»
16 آهِرا، پیلاتوسا ایسّا پئوجیانی دستا دات که آییا سَلیبئے سرا بدْرنجنت. گڑا آیان ایسّا برت.
ایسّا و سَلیب
(مَتّا 27:32–37؛ مَرکاس 15:21–26؛ لوکا 23:32–38)
17 ایسّایا سَلیبئے کُنٹ بَڈّا اَت و «کامپۆل» نامێن جاگهێا برتِش، که آرامی زبانا «جُلْجُتا» گوَشگَ بیت.
18 همۆدا آاِش زرت و سَلیبئے سرا دْرتک. گۆن آییا دگه دو مردمِش هم سَلیب کَشّت، یکّے راستێن و دومی چپّێن نێمگا. ایسّا، آ دوێنانی نیاما اَت.
19 پیلاتوسئے هُکما، مئیارنامگے نبشتِش که سَلیبئے سرا دْرَنجگ ببیت و آ نبشتگ اے ڈئولا اَت «ایسّا ناسِری - یَهودیانی بادشاه.»
20 چه یَهودیان بازێنێا اے مئیارنامگ وانت، چیا که ایسّائے سَلیب کَشّگئے جاگه چه شهرا دور نه‌اَت و په اِبرانی، لاتینی و یونانی زبانان نبیسگ بوتگ‌اَت.
21 پمێشکا، یَهودیانی مزنێن دینی پێشوایان گۆن پیلاتوسا گوَشت: «‹یَهودیانی بادشاه› مَنبیس، بنبیس که اے مردا گوَشتگ ‹من یَهودیانی بادشاه آن›.»
22 پیلاتوسا گوَشت: «هرچے که من نبشتگ، نبشتگُن.»
23 چه سَلیب کَشّگا رَند، پئوجیان ایسّائے پُچّ زرتنت، چار بهرا بهر کرتنت و هر یکّێا یک بهرے زرت. بله ایسّائے یک دَزگواپێن جامگے مَنت، که آییا هچ چاکے نێست‌اَت، سَرجم و یَک‌گواپ اَت.
24 گڑا آیان گۆن وت گوَشت: «بیاێت اِشیا ندرّێن، اِشیئے سرا پالَ جنێن، بچارێن بارێن کئے کَٹّیت؟» هما داب که هُدائے پاکێن کتابَ گوَشیت، هما ڈئولا بوت:
«منی پُچِّش وتی
نیاما بهر کرتنت و
جامگئے سرا
پال جتِش.»
پئوجیان هم همے کار کرت.
25 سَلیبئے نزّیکا ایسّائے مات، گۆن وتی گهار، کْلیوپاسئے جَن مَریم و مَریم مَجْدَلیَها اۆشتاتگ‌اَت.
26 وهدے ایسّایا وتی مات دیست که هما دۆستێن مریدئے کِرّا اۆشتاتگ، گۆن ماتا گوَشتی: «او بانُک! اے تئیی چُکّ اِنت.»
27 رَندا گۆن وتی مریدا گوَشتی: «اے تئیی مات اِنت.» آ مریدا، چه هما ساهتا رند مَریم وتی لۆگا برت.
ایسّا ساهَ دنت
(مَتّا 27:45–50؛ مَرکاس 15:33–37؛ لوکا 23:44–46)
28 نون ایسّایا دیست که سجّهێن چیزّ سَرجم بوتگ‌اَنت و پمێشکا که پاکێن کتابئے هبر سَرجم ببنت، گوَشتی: «تُنّیگ آن.»
29 چه تْرپشێن شرابا پُرّێن کونزگے اۆدا اێر اَت. آیان یک اِسْپنجے زرت و شرابێن کرت، دارێئے سرا بست و ایسّائے لُنٹان پِر مُشت.
30 وهدے ایسّایا شراب دپ جت، گوَشتی: «هلاس بوت!» رَندا سَری جَهل اێر آورت و ساهی دات.
ایسّایا نَیزهَ جننت
31 آ رۆچ، جُمَه و سَرگوَزئے اییدئے تئیاری گِرگئے رۆچ اَت. پمێشکا یَهودیان نلۆٹت دار کَشّتگێنانی جۆن و جَسَد، آ مزنێن شَبَّتئے رۆچا سَلیبئے سرا لۆنجان ببنت. پمێشکا چه پیلاتوسا لۆٹتِش آ سئیێنانی ٹانگان بپرۆشنت و چه سَلیبانی سرا اێر بگێجنت.
32 گڑا پئوجی دێما آتکنت و آ دوێنانی پادِش پرۆشتنت که گۆن ایسّایا سَلیب کَشّگ بوتگ‌اتنت.
33 ایسّائے کِرّا که آتکنت، دیستِش ساهی داتگ. پمێشکا آییئے پادِش نپرۆشتنت.
34 بله چه پئوجیان یکّێا، نئیزَهے ایسّائے پهلوگا جت و هما دمانا چه آییئے جۆنا هۆناپ در آتک.
35 آ کَس که وت اے چیزّانی شاهد بوتگ، اے هبرانَ گوَشیت و آییئے شاهدی راست اِنت. آ زانت که راستێنَ گوَشیت تان شما ایمان بیارێت.
36 اے کار، هما ڈئولا بوت تان پاکێن کتابئے هبر سَرجم ببیت که گوَشیت: «آییئے هچ هڈّے پرۆشگَ نبیت.»
37 پاکێن کتاب، دگه یک جاگهے هم گوَشیت: «آ هما کَسا چارنت که نئیزه‌اِش جتگ.»
ایسّائے کَبر و کپُن
(مَتّا 27:57–61؛ مَرکاس 15:42–47؛ لوکا 23:50–56)
38 رَندا، ایسُّپ نامێن مردے که اَریماتیائے شهرئے نندۆک اَت و چه یَهودیانی تُرسا چێرکایی ایسّائے مرید اَت، پیلاتوسئے کِرّا شت و ایسّائے جۆنئے برگئے اِجازتی لۆٹت. پیلاتوسا اِجازت دات و آییا جۆن برت.
39 نیکودیموس، هما که ائولی رَندا یک شپے ایسّائے گِندگا شتگ‌اَت، آتک و گۆن وت لهتێن هۆر و هئوارێن مُرّ و اَوود و کَرْزاَرواهی آورت، که سی کیلوئے کِساسا اتنت.
40 نون آیان ایسّائے جۆن زرت و یَهودیانی کَبر و کپُنئے دۆد و ربێدگانی رِدا، گۆن وشبۆێن داروان لیلُمێن گُدێا پتات.
41 هما سَلیبئے نزّیکا یک باگے اَت که اۆدا نۆکێن کَبرے هست‌اَت و اَنگت کَسے آییئے تها کَبر نبوتگ‌اَت.
42 یَهودیانی تئیاریئے رۆچ اَت و کَبر هم هما نزّیکا اَت، پمێشکا ایسّائے جۆنِش همۆدا کَبر کرت.