6
1 I swɑɑ dɑkio ye nɛ, Yinni Gusunɔ nɑ ɡeruɑ. Nɑ nɛɛ,
Isirelibɑ, i seewo
i kɑ tii yinɑ ɡuunu kɑ ɡunɡunun wuswɑɑɔ.
2 Bɛɛ ɡuunu, i swɑɑ dɑkio.
Bɛɛ tem kpɛɛkpɛɛku dɑmɡinu,
nɛ, Yinni Gusunɔ nɑ nɛn tɔmbu tɑɑrɛ wɛ̃ɛmɔ.
Nɑ kĩ n bu siribu soku.
3 Bɛɛ Isirelibɑ, bɛɛ nɛn tɔmbu, kɔ̃sɑ mbɑ nɑ bɛɛ kuɑ.
Mɑ sɔɔrɑ nɑ derɑ i wɑsirɑ.
I mɑn wisio.
4 I mɑn tɑɑrɛ wɛ̃ɛmɔ yèn sɔ̃ nɑ bɛɛ Isirelibɑ yɑrɑ sɑɑ Eɡibitin di?
Ǹ kun mɛ yèn sɔ̃ nɑ bɛɛ yɑrɑ sɑɑ yorun di?
Ǹ kun mɛ yèn sɔ̃ nɑ bɛɛ kpɑro beni ɡɔriɑmɑ, Mɔwisi kɑ Aroni kɑ Mɑriɑmu?
5 Bɛɛ nɛn tɔmbu, i yɑɑyo kɔ̃sɑ ye Bɑlɑki Mɔɑbun sinɑ boko u bwisikɑ u bɛɛ kuɑ.
I mɑɑ yɑɑyo ye Bɑlɑmu Beorin bii u nùn wisɑ.
Nɑ bɛɛ yɔ̃siri bɛɛn sɑnum sɔɔ sɑɑ Sitimun di sere Giliɡɑliɔ.
Mɑ i nɛn durom wɑ mɛ nɛ, Yinni Gusunɔ nɑ bɛɛ kuɑ.
Ye Yinni Gusunɔ u tɔmbu
bikiɑmɔ
6 Kɛ̃ɛ terɑ̀ kon kɑ Yinni Gusunɔ wi, wi u kpuro kere dɑɑwɑ
nɑ̀ n dɔɔ win sɑ̃ɑ yerɔ.
Kɛ̃ɛ terɑ̀ ko nɑ n nɛni n kɑ nùn yiirɑ.
Nɑɑ wɔ̃ɔ tiɑɡiɑ kon kɑ nùn yɑ̃ku dɔ̃ɔ mwɑɑrɑruɡiru kuɑ?
7 Yinni Gusunɔ u yɑ̃ɑ kinɛ dɑbi dɑbinun bukɑtɑ mɔ?
Gum kotosun bukɑtɑwɑ u mɔ?
Nɛn bii ɡbiikoowɑ kon nùn wɛ̃ u sere mɑn nɛn torɑnu suuru kuɑ?
8 Aɑwo, Yinni Gusunɔ u tɔmbu ɡeɑ sɔ̃ɔsi ye u rɑ kɑ̃.
Ye u bu kɑnɑmɔ bu ko,
yerɑ bu ben berusebu wɛ̃ ye n sɑ̃ɑ beɡiɑ.
Kpɑ bu bu kĩru sɔ̃ɔsi.
Kpɑ bu wi, Gusunɔ ben Yinni swĩi kɑ tii kɑwɑbu.
Yinni Gusunɔ u rɑ ɡbɛnɔbu
kɑ dɑɑ bɔɔbɔyɑɡibu sɛɛyɑsie
9 Yinni Gusunɔ u kɑ Yerusɑlɛmuɡibu yɑ̃.
Wi u bwisi mɔ, u koo nùn nɑsiɑ.
Bɛɛ Yudɑbɑ, i de nɛn siribu bu bɛɛ yeeri.
10 Kon wurɑ tɔn kɔ̃so u dukiɑ ɡure win dirɔ kɑ ɡbɛnɑ?
Kpɑ u n sɑkɑku mɔ ɡe nɑ ǹ kĩ?
11 I tɑmɑɑ wi u kilo weesuɡiɑ mɔ u dɛɛre?
12 Wee bɛɛn ɡobiɡibu bɑ tɔmbu dɑm dɔremɔ,
bɑ rɑ n weesu mɔ̀.
Kpɑ bɑ n ɡɑbu nɔni wɔ̃kumɔ kɑ ben ɡɑri.
13 Tɛ̃, nɑ sɔɔru kpɑ n kɑ bɛɛ sɛ̃suku bɛɛn durum sɔ̃,
kpɑ i kɑm ko.
14 I ko i di, ɑdɑmɑ i ǹ debumɔ.
I ko i nɔɔɡiru suɑ ɡɔ̃ɔrun sɔ̃.
Mɛyɑ n ǹ koorɔ i ɡɑ̃ɑnu bere.
Ì n mɑɑ ɡɑ̃ɑnu beruɑ, tɑbɑ kon kɑ ye kɑm koosiɑ.
15 I ko i duure, ɑdɑmɑ i ǹ ɡɛ̃ɛmɔ.
I ko i olifi ɡɑmɑ,
ɑdɑmɑ i ǹ wɑsi i yen ɡum sɑwɑ.
I ko i resɛm tɑm wĩɑ,
ɑdɑmɑ i ǹ wɑsi i mu nɔ.
16 Domi i sinɑ boko Omirin dɑɑ kɔ̃sɑ sɑɑrimɔ kɑ sere mɑɑ Akɑbuɡiɑ.
I ben dɑɑ sɑɑrimɔwɑ mɑm mɑm.
Yen sɔ̃nɑ kon de bɛɛn wuu ɡu ko bɑnsu.
Kpɑ n de bu bɛɛ yɛ̃ɛ.
I ko i sekuru wɑ bɛɛ kpuro nɡe mɛ nɛn tɔmbu bɑ rɑ wɑ.
Misee u weeweenu mɔ̀