9
1 Bɛɛ Isirelibɑ, i ku tɔ̃ɔ bɑkɑru ko ɡɛ̃ɛbun sɑɑ sɔɔ
nɡe bwese ni nu tie.
Domi i Yinni Gusunɔ biru kisi.
Mɑ i dɑ i bũnu ɡɑsirimɔ
i nu siɑrɑmɔ mi bɑ ɑlikɑmɑ soomɔ kpuro.
2 Adɑmɑ ɑlikɑmɑ ye bɑ soomɔ kɑ ɡum mɛ bɑ ɡɑmɑmɔ,
yen ɡɑɑ kun ko n sɑ̃ɑ bɛɛɡiɑ.
Mɛyɑ i ǹ tɑm kpɑm wɑsi i wunɑ.
3 Isirelibɑ bɑ ǹ sinɑmɔ tem mɛ Yinni Gusunɔ u bu wɛ̃ sɔɔ.
Bɑ koo wurɑmɑ Eɡibitiɔ ǹ kun mɛ Asiriɔ.
Kpɑ bu dĩɑ sesenuɡinu di mi.
4 Sɑɑ ye sɔɔ, bɑ ǹ mɑɑ kpɛ̃ bu yɑ̃kuru ko kɑ tɑm.
Bɑɑ bɑ̀ n tu kuɑ,
tɑ ǹ Gusunɔ wɛ̃remɔ.
Ben yɑ̃ku dĩɑnu nu ko n sɑ̃ɑwɑ nɡe ɡɔɔ dĩɑnu.
Wi u nu di, u koo disi duurɑwɑ.
Dĩɑ ni, nu koo win ɡɔ̃ɔru kpeesiɑ.
Adɑmɑ bɑ ǹ kɑ ye duɔ Yinni Gusunɔn sɑ̃ɑ yerɔ.
5 Mbɑ i ko ko Yinni Gusunɔn tɔ̃ɔ bɑkɑnu sɔɔ.
6 Ì n bɛɛn yɛnusu deri bɑnsu,
Eɡibitiɡibɑ koo bɛɛ dɑm koosiɑ ben mi.
Adɑmɑ yen wuu ɡe bɑ mɔ̀ Mɛnfisi ɡɑ ko n sɑ̃ɑwɑ nɡe bɛɛn sikiru.
Awĩi yi koo bɛɛn ɑrumɑni di.
Kpɑ sɑ̃ki yi kpi bɛɛn kunɔ.
7 Sɑɑ yɑ turɑ yè sɔɔ Yinni Gusunɔ u koo siri.
Sɑɑ yɑ tunumɑ yè sɔɔ u koo bɑɑwure kɔsiɑ ye u kuɑ.
Bɛɛ Isirelibɑ i ko ye wɑ.
Wee bɛɛn torɑnu kɑ bɛɛn tusirun kpɑ̃ɑrun sɔ̃,
i rɑ n tɑmɑɑ Gusunɔn sɔmɔ u wiirɑwɑ.
Wi, wi Yinni Gusunɔ u kɑ ɡɑri kuɑ u tɑm nɔrɑwɑ.
N deemɑ bɛɛ, i torewɑ n kpɑ̃, mɑ i nùn tusɑ.
8 Adɑmɑ sɔmɔ wi u bɛɛ kirɔ mɔ̀,
u wɑ̃ɑ kɑ Gusunɔ.
Kɑ mɛ, i nùn yinɑ bɛriɑmmɛ mi u dɔɔ kpuro.
I rɑ mɑm nùn seesiwɑ Gusunɔ win Yinnin sɑ̃ɑ yerɔ.
9 Wee i dɑ i kɔ̃sɑ kuɑ nɡe mɛ i rɑɑ kuɑ Gibeɑɔ.
Yinni Gusunɔ kun bɛɛn torɑnu duɑri.
U koo bɛɛ sɛɛyɑsiɑ nin sɔ̃.
Yinni Gusunɔ u nuki sɑnkirɑ
10 Yinni Gusunɔ u nɛɛ, sɑnɑm mɛ nɑ ɡbiɑ nɑ Isirelibɑ wɑ,
nɛn nɔni sɔɔ, bɑ sɑ̃ɑwɑ nɡe resɛm mɑrum
mɛ bɑ wɑ mi ɡɑ̃ɑnu ku rɑ kpi.
Mɑ nɑ mɑɑ ben bɑɑbɑbɑ wɑ nɡe fiɡie mɑrum ɡbiikum.
Adɑmɑ ye bɑ tunumɑ Bɑɑli Peoriɔ,
miyɑ bɑ tii bũu wi bɑ mɔ̀ Bɑɑli wɛ̃.
Mɑ nɑ bu tusɑ nɡe bũu wi.
11 Tɛ̃ Isirelibɑn bɛɛrɛ yɑ koo doonɑ nɡe ɡunɔ mɔrin wuuru.
Ben kurɔbu bɑ ǹ mɑɑ ɡuri suɑmɔ bu sere mɑ.
12 Bɑ̀ n mɑɑ bibu seeyɑ, kon de bu ɡbiwɑ bu sere bukurɑ.
Bɑ koo wɑhɑlɑ bɑkɑ wɑ nɑ̀ n bu biru kisi.
13 Nɡe mɛ nɑ Isirelibɑ wɑɑsinɑmɔ,
bɑ sɑ̃ɑwɑ nɡe dɑ̃ɑ
ni bɑ duurɑ tem ɡem sɔɔ.
Adɑmɑ bɑ koo ben bibu yibɛrɛbɑ nɔmu bɛriɑ
be bɑ koo bu ɡo.
14 Osee u nɛɛ, Yinni Gusunɔ, bɑ̀ n koo Isirelibɑ sɛɛyɑsiɑ,
sɛɛyɑsiɑ birɑ̀ bɑ koo ɡɔsi.
A de ben kurɔbu bu nukuru yɑri,
kpɑ ben bwɑ̃su su ɡberɑ.
15 Yinni Gusunɔ u nɛɛ,
ɡeemɑ ben nuku kɔ̃suru kpuro tɑ sɔ̃ɔsirɑ Giliɡɑliɔ.
Miyɑ nɑ bu wɑ mɑ nɑ bu tusɑ.
Kon bu ɡirɑ nɛn wuswɑɑn di ye bɑ kuɑn sɔ̃.
Nɑ ǹ mɑɑ bu kĩ.
Domi ben sinɑmbu kpurowɑ bɑ mɑn seesimɔ.
16 Nɑ be, Isirelibɑ sɛɛyɑsiɑ.
Bɑ sɑ̃ɑ nɡe dɑ̃ɑ te tɑ ɡberɑ nuurun di kpuro.
Tɑ ǹ mɑɑ binu mɑrumɔ.
Bɑɑ bɑ̀ n mɑɑ bibu mɑrɑ, kon de bii be bɑ kĩ mi, bu ɡbiwɑ.
17 Osee u nɛɛ, Gusunɔ nɛn Yinni u bu yinɑ
yèn sɔ̃ bɑ ǹ win ɡɑri swɑɑ dɑki.
Bɑ koo kowɑ yɑɑyɑɑre kowobu bwesenun suunu sɔɔ.
Isirelibɑn bɑndɑ kpɑ