5
Siwyan wea kaket: Kbe meen Yesus hah yama u
1 Wore wo Tuhan hah yama u to, amu ne nwe kʼanu u nno fyi?
2 Anu nhar oh nwe wore wo Ait hah yama u to, kbe yama tubor. Kbe raa siwyan fefares tibyo ana mrok. Reto mnan fi wore wo raa mama msyõf bo ti sai. Ja raa siwyan fefares ye.
3 Tna raa ro wase Tuhan fares to, taro mawe, “Arin moof sai. Kbe bo mkair-kar aro mai kʼamu fee. Kbe amu nhau riof sai.” He mfe. Mam wore weto kbe Tuhan yno bo ro mkair btek mai abut kʼana. Kbe ana mkai riof fee. Mnan mfi fnya ro mhaf to. Au mhau, mhau to, tna wase wore wo au kborham tna kbe ku rau mbtek.
4 Anu fo raa ro Kristen. Anu nhau mam wore wo mamur u fee. Anu nhar nwe kbe meen tabam haberek tna Tuhan hah yama u. Nhar oh. Feto kbe ati ro Yesus hah yama u to, kbe anu nrok fee. Raa roto kbe mrok. Kbe mrok mnan mfi ja raa mrok mam ati ro raa mama msyõf bo wana ti sai.
5 Anu fo raa ro nhau mam wore wo maah. Anu fo nfi raa ro mhau mam wore mamur fee. Anu nhau mam mti fee.
6 Menohe raa taro wase bo ro Tuhan. Ana mfi raa ro mjin tu sorni ana sai. Menohe anu fo bhau siwyan yoyo wea sai. Bhau bkit wanu maah. Bhau btak bisoh anu kaket ye.
7 Raa ro mjin to, ja mjin mti. Tna raa ro bisir bo to, mbisir mti ye.
8 Menohe anu fo hayah. Anu ja bhau mam wore wo maah. Feto to anu ja bnaut anu re bno-na bo fee. Tna anu beroh smot Tuhan ye. Anu beroh bhaf moof kʼanya ye. Anu bno bo weto to, bno wa re kbe anu aro btek bwe mam iro fee. Anu bfi raa ro sbe. Ana myum bo wa mawe mno riof kʼana. Raa ro sbe ja myum ratan ro besi mkah bo mno wa kbe raa mama mame ana majat fee. Tna anu bmo wai Tuhan Yesus, kbe yoo riof ro mase yee kʼanu. Reto mfi raa sbe ja sbyõ watau ro besi. Ana myum bo wa mawe mno riof kʼana.
9 Allah ysok anu fo. Ysok tna ksoh yawe meen yno bo ro mkair mbtek mai kʼanu to fee. Bi Ait ysok anu tna ksoh yawe Yesus KristusTuhan ranu yoo riof ro mase yee kʼanu.
10 Tiwya Ait yhai. Yhai afo re kbe anu bhai tibyo fee. Yawe anu ro bhau baam mam tabam refo fares tna bsya anu ro bhai wia oh, meen anu bsen beta bmo bhau su bsya Ait ye.
11 Nkyas bokyas ro moof weto kʼanya re kbe anu nhau smot Yesus matak. Nkyas bo moof kʼanya re kbe anu aro waa fee. Tna sraujin fee. Tna nnaut yyi fee ye. Thar tawe anu ja nno bo weto, nno kaket oh.
Paulus watum bo ro tis tna ymah meen
12 Taja, tme, tao, tano na; hartu raa ro Allah yse mbo anu. Ana weto ja mur-mur mkyas Tuhan Yesus yasom kʼanu. Tna ana ja watum bo kʼanu ye.
13 Ana mno bo ro moof feto. Tibyo natmof ana tna hartu ana ye. Nhau to, niranya kaket nsya raa anya ye.
14 Taja, tme, tao, tano na; soh raa wanu aro ja yno bo kbik-bak to, nmo nastako ait. Tna soh raa ro sraujin aro to, nmo nkyas bo moof kʼana re ana sorni sraujin wana. Tna ana ro smot Tuhan kaket fee, nmo nkyas bo re nno bosmot rana me matak u. Tna sneh-sneh nsya raa anya beta ye.
15 Kaket anu: Soh raa mno bo ro mkair mai kʼanu to, ne nno bo ro mkair ska mai si kʼana ma. Nno bo moof kʼraa wanu ro smot Yesus ye. Tna nno bo moof kʼraa roto taro ye.
16 Nhau to, simaut mase yoyo sai.
17 Tna skabuk yoyo ye.
18 Anu fo raa ro smot Kristus Yesus. Allah ksoh yawe bo bawya sai ro mama to, nyoh asik mase kʼbi Ait.
19 Tna soh Har ro Tuhan mkyas bo kʼanu to, nri kaket, niwana bokyas reto ma.
20 Bokyas ro Tuhan ykyas kʼraa (mfi raa ro nabi) to, niwana bokyas rAit reto ma.
21 Tna bokyas ro raa mkyas kʼanu to, sanet wia. Ntu tna nmat sas kaket wia. Bokyas ro moof to, nbo nno.
22 Bo ro mti safo to, beak fari.
23 Allah tait Raa ro yatak yno raa mhaf tnok. Amu nyoh kʼAit re yama yatam anu re nhau nno bo wAit yoyo sai. Yno anu nhaf, srau wanu beta to mhau moof mfi raa ro wase mber safo. Amu nyoh kʼAit re yatam anu feto mamo snok mam oon ro Yesus Kristus hah ye yama to.
24 Allah ysok anu ytu yawe nma no kʼAit. Tna bo ro Ait yawe yno to, kbe yno tu oh.
25 Taja, tme, tao, tano na; skabuk amu nbo tuuf ye.
26 Nmah meen kʼanya ye tna hana anya ye.
27 Mkah Tuhan yatak rAit, amu nbis anu nwe baca aam refo kʼraa ro Kristen beta ro mhau mam Tesalonika, afo kbe ana mari beta ye.
28 Amu skabuk Allah re Tuhan ranu Yesus Kristus yatmof anu.