9
Tã gólâ Ôvârí drí õjílã yí drí lẽlé âꞌdólé õjílã íyíkâ ró rî ꞌbá yî njĩzó rî
1-3 Ãmbá õjílã ámákâ Yúdạ̃ yí kâ rî ꞌbá yî gã ĩyî trá dó tã lẽlé Yésũ ꞌá ꞌdíyî pã ꞌbá ró. Gõꞌdá tã rî ꞌdĩ tãsĩ rî, ĩzã ꞌê mâ trá rõô gõꞌdá ámâ ꞌbãlé ãwó ngõlé cú ĩꞌdî õjílã ámákâ Yúdạ̃ yí kâ rî ꞌbá yî tãsĩ. Má âtâ nõ úlı̣́ gólĩyî pạ̃tı̣́ı̣̃ rî ꞌbá yî ĩꞌdî ãnî drí Líndrí Tãndí Ôvârí kâ gólâ rĩ ꞌbá ámâ pãlé úlı̣́ nõ ꞌbá yî âtálé ãnî drí rî sĩ. Má lẽ trá rõô Ôvârí drí õjílã ámákâ Yúdạ̃ yí kâ rî ꞌbá yî pãlé õjílã tã lẽ ꞌbá trá Yésũ ꞌá rî ró rî, má âdó õnjõ kô ãlôwálâ õjílã Yésũ kâ ró. Gõꞌdá má ı̣̂sũ tã ĩzã õjílã ámákâ kâ Ôvârí rî gãzó dó ꞌdĩ rî tãsĩ rî, mâ trá rĩꞌá njãâ, ãꞌdô ró bê Ôvârí drí ámâ gãzó kpá dó õjílã Yésũ kâ rî ró, tãlâ gólâ õfẽ ró lâŋõ bê má drí lạ̃sı̣́ sĩ, õzõ tí ꞌdĩî rî, úũpı̣̃ lạ́tı̣̂ trá õjílã ámákâ Yúdạ̃ yí kâ rî ꞌbá yî drí tã lẽzó Yésũ ꞌá ꞌdíyî pã ꞌbá ró rî.
4-5 Ạ̃kû ró nã sĩ, Ôvârí ꞌbã tã trá ãmâ ạ́ꞌbı̣́yạ́ Ãbãrãyámã yî drí kĩ, yí âꞌdô gólĩyî ózõwá yî õjílã Ĩsĩrãꞌélẽ kâ ró rî ꞌbá yî njĩꞌá âꞌdólé õjílã íyíkâ rî ꞌbá yî ró. ꞌDĩî vósĩ rî, õjílã Ĩsĩrãꞌélẽ kâ rî ꞌbá yî õtírĩ rĩî ĩyî lậmú bê fãã nĩngá kô nĩngá võ ꞌãꞌí ró rî ꞌásĩ rî, Ôvârí âꞌdâ ãmbã íyíkâ trá gólĩyî drí ândâlâ dũû. Gõꞌdá Ôvârí rî trá rĩꞌá tã-drı̣̃ lẽlẽ ꞌbãlé gólĩyí bê âꞌdólé õjílã íyíkâ rî ꞌbá yî ró. Ĩtí rî, Ôvârí fẽ kpá tã ꞌbãꞌbã íyíkâ lẽlé gólĩyî drí ꞌẽlé rî ꞌbá yî gólĩyî drí, drı̣̃-ꞌbá gólĩyíkâ Músạ̃ sĩ. Gõꞌdá gólâ âꞌdâ lạ́tı̣̂ mbı̣̂ pạ̃tı̣́ı̣̃ íyî ı̣̂njı̣̃ kâ rî kpá gólĩyî drí. Gõꞌdá gólâ ꞌbã tã ãmâ ạ́ꞌbı̣́yạ́ yî drí kĩ, yí ãâꞌdô õrẽ fẽꞌá gólĩyî drí ãmbá ózõwá lâ yí bê. Gõꞌdá õrĩ gólĩyíkâ drí âꞌdózó õrĩ gólâ Yésũ Krístõ gólâ yí drí ꞌẽꞌá âjólâ õjílã pãlé ndrĩ rî tı̣̃zó ꞌá lâ rî ró. Gõꞌdá ngbãângbânõ rî, Yésũ bê rĩꞌá ꞌbũû ꞌálâ ngá-tı̣̂ dũû ndrĩ ãngó drı̣̃ kâ nõ ꞌbá yî drı̣̃lı̣́. Gólâ ĩꞌdî Ôvârí ꞌî. Bê trá ĩtí rî, ꞌdõvó nĩ ꞌdê mã ꞌê ãwô-ĩtí gólâ drí ãmbá tãlâ tã rî ꞌdĩ tãsĩ. Ãâꞌdô ĩtí.
6 Tã õjílã dũû Yúdạ̃ yí kâ rĩzó rĩꞌá Yésũ rî gãlé dó ꞌdĩ, rí kô tã-drı̣̃ lẽlẽ Ôvârí kâ ꞌbãlé trá gólĩyî ạ́ꞌbı̣́yạ́ yí bê rî îzãlé vólé. Nĩ ndrê drẽ, rĩꞌá cé õjílã ũrûkậ Ĩsĩrãꞌélẽ kâ rî ꞌbá yî ĩꞌdî âꞌdó ꞌbá pạ̃tı̣́ı̣̃ õjílã Ôvârí kâ ró rî.
7-8 Ĩtí rî, Ôvârí njĩ Ãbãrãyámã rî ózõwá yî ndrĩ âꞌdólé õjílã íyíkâ ró yã? Âꞌdó ĩtí kô. Ôvârí âtâ tã kĩ, âꞌdô âꞌdóꞌá Ĩsákã rî mvá yî ĩꞌdî gólĩyî îcá ꞌbá âꞌdólé ꞌdĩyímvá íyíkâ ró rî. Ôvârí njĩ Ãbãrãyámã rî ózõwá gólĩyî tã lẽ ꞌbá yí ꞌá rî ꞌbá yî trá âꞌdólé õjílã íyíkâ ró, âꞌdó kô kĩ, Ãbãrãyámã rî ózõwá yî njĩlí ndrĩ. Ôvârí âtâ tã Ãbãrãyámã drí kĩ nĩ rî, “Ánî ózõwá pạ̃tı̣́ı̣̃ rî ꞌbá yî âꞌdô âꞌdóꞌá ꞌdĩyímvá gólĩyî tı̣̃lı̣́ ánî mvá Ĩsákã sĩ rî ꞌbá yî ĩꞌdî.” Gõꞌdá úlı̣́ rî ꞌdĩ ꞌbá yî âꞌdâ tã kĩ, ãâꞌdô rĩꞌá cé ꞌdĩyímvá gólĩyî tı̣̃lı̣́, tãlâ Ãbãrãyámã lẽ tã gólâ Ôvârí drí tã lâ ꞌbãlé trá ꞌẽlé gólâ drí rî ꞌá rî ꞌbá yî, gólĩyî rĩꞌá ꞌdĩyímvá gólĩyî Ôvârí drí ndrẽlé õjílã íyíkâ ró rî ꞌbá yî ĩꞌdî.
9 Tã Ôvârí drí ꞌbãlé trá ꞌẽlé Ãbãrãyámã drí tı̣̃tı̣̃ Ĩsĩmélẽ kâ vósĩ rî ĩꞌdî nõ, “Ndrô ãlô vólé drı̣̃ ꞌásĩ rî, má âꞌdô âgõꞌá ánî õkó Sárã rî ꞌẽlé îcálé mvá tı̣̃lı̣́.” Gõꞌdá úlı̣́ rî ꞌdĩ ꞌbá yî âꞌdâ tã kĩ, Ôvârí gã Ãbãrãyámã rî mvá Ĩsĩmélẽ trá dó âꞌdólé ạ́ꞌbı̣́yạ́ ró õjílã íyíkâ rî ꞌbá yî drí.
10 ꞌDĩyímvá Rẽbékã kâ rî ꞌbá yî âꞌdâ kpá tã ãlôlâ ꞌdĩ ĩꞌdî ãmâ drí. Ãmâ ạ́ꞌbı̣́yạ́ Ĩsákã ĩꞌdî rĩꞌá ꞌdĩyímvá rı̣̃ Rẽbékã kâ lạ̃tı̣́ ró ꞌdĩ ꞌbá yî átá ꞌî.
11 Drẽ ãkpãkãꞌdã sı̣́sı̣́ útı̣́ lạ̃tı̣́ ꞌdĩ ꞌbá yî kôꞌdáwá gõꞌdá ꞌdĩî gólĩyî âꞌdó kpá kô drẽ îcálé tã tãndí ngãtá tã õnjí ꞌẽlé rî, Ôvârí âꞌdâ tã kĩ, yí ãâꞌdô cú drı̣́-ãcê bê õjílã yí drí lẽlé âꞌdólé íyíkâ ró rî njĩzó.
12 Ĩtí rî, âꞌdó kô rĩꞌá tã gólĩyî ángô rî ꞌbá yí kâ ĩꞌdî õjílã rî ꞌdĩ drí ꞌẽlé rî, ngãtá gõꞌdá kpá tã kĩꞌá nĩ rî, õjílã rî ꞌdĩ átá lâ íyíkâ ãꞌdî ĩꞌdî yã rî. Nĩ ndrê drẽ, Ôvârí âtâ tã trá Rẽbékã drí lạ̃tı̣́ gólâ drí ꞌẽꞌá tı̣̃lâ ꞌdĩ ꞌbá yî tãsĩ kĩ, “Lạ̃tı̣́ gólâ tı̣̃lı̣́ sı̣́sı̣́ rî âꞌdô rĩꞌá lạ̃tı̣́ ãzâ gólâ tı̣̃lı̣́ yí vó rî zẽlé rû ı̣̂ꞌbũlı̣́ drílâ.”
13 Tã ậngũ ꞌbá Ôvârí kâ ãzâ âtâ tã kpá kĩ nĩ rî, “Má lẽ Yãkóbã yî trá rõô ózõwá lâ yí bê, gõꞌdá má gã Ẽsáwõ yî dó ózõwá lâ yí bê âꞌdólé õjílã ámákâ rî ꞌbá yî ró.”
14 Õjílã ãzâ ãnî lãfálé sĩ âꞌdô îcáꞌá tã îjílí kĩ, “Ôvârí ãâꞌdô õjílã ũrûkậ ꞌbá yî gãꞌá dó gbõ cú ĩtí rĩrĩ gólĩyíkâ rî ndrẽ ãkó yã? Ĩtí rî, gólâ rí ꞌdĩ kô tã mbı̣̂ rî ꞌẽlé.” Gõꞌdá má âꞌdô tã ꞌdî drı̣̃ lâ lôgõꞌá kĩ, “Ôvârí rî trá kárá tã mbı̣̂ ꞌẽlé. Tí Ôvârí âfẽ lâŋõ nô trá õjílã drí ndrĩ tã õnjí tẽtẽ ꞌbá ró.”
15 Gõꞌdá Ôvârí rĩꞌá cú mbârâkã bê õjílã yí drí lẽlé rî ꞌbá yî njĩzó gbõ ĩtí lâ ꞌdĩ kâtí. Nĩ ı̣̂sũ drẽ tã gólâ Ôvârí drí âtálé Músạ̃ drí kĩꞌá nĩ rî,
“Má âꞌdô tã õnjí õjílã gólĩyî má drí njĩlí âꞌdólé ámákâ ró rî ꞌbá yí kâ âyéꞌá.
Má âꞌdô õjílã má drí njĩlí ꞌdĩ ꞌbá yî pãꞌá tã õnjí ꞌásĩ.”
Âfõ-âfõ 33.19
16 Ôvârí njĩ õjílã nĩ âꞌdólé õjílã íyíkâ ró. Âꞌdó kô kĩꞌá nĩ rî, rĩꞌá õjílã rî ꞌdĩ ꞌbá yî ĩꞌdî gólĩyî tã lẽ ꞌbá nĩ âꞌdólé õjílã Ôvârí kâ ró rî. Âꞌdó kpá kô kĩ, tãlâ õjílã rî ꞌdĩ ꞌbá yî ꞌê ĩyî tã Ôvârí kâ trá rî drí sĩ. Gõꞌdá Ôvârí njĩ õjílã ũrûkậ ꞌbá yî gbõ ĩtí âꞌdólé õjílã íyíkâ ró, tãlâ yí pâ ró gólĩyî lâŋõ tã õnjí gólĩyíkâ rî ꞌbá yí kâ ꞌásĩ pı̣̃pı̣̂sı̣́lı̣́ tãndĩ íyíkâ sĩ.
17 Ôvârí âtâ tã kúmú ạ́ngı̣́ Mạ́sı̣̃rı̣̃ kâ drí Músạ̃ sı̣́lı̣́ kĩ nĩ rî, “Má ꞌbã nî trá âꞌdólé drı̣́-ãcê bê kúmú ạ́ngı̣́ Mạ́sı̣̃rı̣̃ kâ ró, ãꞌdô ró bê mbârâkã ámákâ âꞌdázó õjílã drí, õzõ má õꞌê tã trá ní rú õnjí ró tãlâ drı̣̃ âmbâ-âmbâ áníkâ tãsĩ rî. Gõꞌdá tãlâ tã gólĩyî má drí ꞌẽlé ní drí rî ꞌbá yî tãsĩ rî, ámâ rú âꞌdô lı̣̂kúꞌá lı̣̂kû ãngó drı̣̃ı̣̂ ndrĩ.”
18 Úlı̣́ rî nõ ꞌbá yî âꞌdâ tã kĩ, Ôvârí cú rĩꞌá mbârâkã bê tã gólĩyî yí drí lẽlé ꞌẽlé õjílã ãngó nõ ꞌá rî drí rî ꞌẽzó. Ĩtí rî, pı̣̃pı̣̂sı̣́lı̣́ tãndĩ gólâkâ sĩ rî, gólâ rĩꞌá drı̣̃-bạ́lạ́yı̣̂ ró õjílã gólâ drí lẽlé pãlé rî ꞌbá yî pãzó. Gõꞌdá gólâ rî kpá õjílã gólĩyî yí drí lẽlé drı̣̃ lâ yî drí âmbálé rî ꞌbá yî drı̣̃ lâ yî ꞌbãlé âmbálé âmbâ, âꞌdô tã gólâ drí lẽlé rî vó ró.
19 Õjílã ãzâ ãnî lãfálé sĩ âꞌdô îcáꞌá tã îjílí kĩ, “Âꞌdô bê trá ĩtí rî, gõꞌdá Ôvârí rî zãâ rĩlí tã kĩlí ãmâ rú ãꞌdô tãsĩ yã? Ĩtí rî, gólâ rí ꞌdĩ kô tã mbı̣̂mbı̣̂ rî ꞌẽlé ĩꞌdî. Ãꞌdî âꞌdô îcáꞌá nĩ tã gólâkâ lẽlé ꞌẽlé rî îkílí yã?”
20 Ĩtí rî, má âꞌdô tã ꞌdî drı̣̃ lâ lôgõꞌá kĩ, “Ãnî rĩꞌá gbõ cé õjílã mvá ꞌî rî, gõꞌdá nĩ ı̣̂sũ tã kĩ, nĩ ãâꞌdô îcáꞌá tã-drı̣̃ lôgõlé ãꞌdô ró bê kĩ, tã Ôvârí kâ ãâꞌdô rĩꞌá ányâ ró rî ángô tí yã? Drẽ ĩtí rî, límvó îcâ fí trá tã îjílí rũ ꞌbá lâ tı̣́ kĩ nĩ rî, ‘Ní rû mâ nõtí nõ ãꞌdô tãsĩ yã?’ ”
21 Drẽ ĩtí rî, límvó rũ ꞌbá cú rĩꞌá tã mbı̣̂ bê ngá yí drí lẽlé ꞌẽlé lõdrí sĩ rî ꞌẽzó. Gólâ âꞌdô îcáꞌá cú ngá gólĩyî sũ ꞌbá sũsũ ró rî ꞌbá yî rũlı̣́ gõꞌdá ngá gólĩyî sũ ꞌbá kô îgígírãlé kô âꞌdó ꞌbá cé lôsĩ ꞌẽzó ĩꞌdî sĩ lâ ĩyî rî rũlı̣́ ꞌdó lõdrí kũlũtũtũ ãlô ꞌdĩ ꞌásĩ. Tã rî nõ âꞌdâ tã kĩ, Ôvârí îcâ trá tã gólĩyî yí drí lẽlé ꞌẽlé õjílã yí drí ꞌbãlé nĩ rî ꞌbá yî tãsĩ rî ꞌẽlé.
22 Ĩtí rî, Ôvârí trá rĩꞌá njãâ ạ̃wạ̃ ró õjílã bê tãlâ tã õnjí gólĩyíkâ rî ꞌbá yî tãsĩ. Gólâ cú rĩꞌá mbârâkã bê lâŋõ fẽzó õjílã gólâ tã õnjí ꞌẽ ꞌbá rî drí. Gõꞌdá kpálé bê ĩtí rî, Ôvârí rî trá rĩꞌá kậyı̣̂ mbı̣̂ gólâ lâŋõ íyíkâ drí âꞌdézó tã õnjí ꞌbá yî drı̣̃ı̣̂ rî tẽꞌá ĩꞌdî. Gólâ ꞌê ĩtí, tãlâ gólâ rî pı̣̃pı̣̂sı̣́lı̣́ rĩꞌá ạ̃ꞌdı̣́ ró gólĩyî tãsĩ, õzõ kpálé óõꞌbã õjílã rî ꞌdĩ ꞌbá yî lâŋõ fẽzó gólĩyî drí rî.
23 Ôvârí fẽé lâŋõ gólĩyî drí ꞌwãâ kô, ãꞌdô ró bê kĩ, õjílã gólĩyî yí drí lẽlé pãlé rî ꞌbá yî ĩîcâ ró ĩyî bê ãmbã íyíkâ nı̣̃lı̣́, nĩngá sĩ yí âyê ró bê tã õnjí gólĩyíkâ, tãlâ gólĩyî ĩîcâ ró bê âꞌdólé Yésũ kâtí rĩlí Ôvârí bê ꞌbũû ꞌálâ.
24 Gólâ njĩ ãmâ õjílã gólâ drí lẽlé pãlé õjílã íyíkâ ró rî ꞌbá yî ꞌbạ̃súrú Yúdạ̃ yí kâ gõꞌdá kpá ãzâ ꞌbá yí kâ rî ꞌbá yí bê rî ꞌásĩ. Ôvârí jâ rû õjílã yí drí gãlé trá dó sı̣́sı̣́ rî ꞌbá yî njĩlí.
25 Tã ꞌdî rĩꞌá õzõ tã ậngũ ꞌbá Õséyã drí úlı̣́ âtázó trá ạ̃kû ró nã kâtí kĩ,
“Má âꞌdô õjílã gólĩyî âꞌdó ꞌbá kô ámákâ ró rî ꞌbá yî njĩꞌá,
tãlâ gólĩyî ãꞌdô ró bê ĩyî õjílã ámákâ rî ꞌbá yî ró.
Má ꞌbãá õjílã ꞌdî ꞌbá yî lôvó lâ kô sı̣́sı̣́,
gõꞌdá ngbãângbânõ rî, má jâ rû trá gólĩyî lôvó ꞌbãlé gạ̃rạ̃.”
Õséyã 2.23
26 “Sı̣́sı̣́ õjílã ãlôlâ ꞌdĩ ꞌbá yî Ôvârí zı̣̂ trá kĩ, ‘Ãnî âꞌdó kô rĩꞌá õjílã ámákâ ĩꞌdî.’
Gõꞌdá ꞌdĩî vósĩ, áâꞌdô gólĩyî zı̣̃ꞌá “ ‘ꞌdĩyímvá Ôvârí mbârâkã ãkĩ bê rî kâ rî ꞌbá yî ró.” ’ ”
Õséyã 1.10
27 Gõꞌdá tã ậngũ ꞌbá Ĩsáyã âtâ úlı̣́ kpá kĩ,
“Õjílã Ĩsĩrãꞌélẽ kâ lûtı̣̂ ĩyî trá âcálé dũû õzõ sínyítã õnyíkõ lı̣̃mvû ândrê tı̣́ rî ꞌbá yí kâtí.
Õzõ kpálé ĩtí rî, Ôvârí âꞌdô cé ũrûkậ ꞌbá yî pãꞌá ĩꞌdî gólĩyî lãfálé ꞌásĩ âꞌdólé õjílã íyíkâ ró.
28 Nĩ ndrê drẽ, Ôvârí âꞌdô pạ̃tı̣́ı̣̃ lâŋõ fẽꞌá õjílã ndrĩ gólĩyî tã gólâkâ gã ꞌbá dó rî ꞌbá yî drí ꞌwãâ, ãꞌdô ró bê yí drí gólĩyî ûfúzó.”
Ĩsáyã 10.22-23
29 Ĩsáyã âtâ tã kpá ãmâ tã õnjí ꞌbá ró rî ꞌbá yî tãsĩ kĩ,
“Ôvârí gólâ mbârâkã bê gạ̃rạ̃ rõô rî ꞌê tã ãmâ tãsĩ âꞌdô pı̣̃pı̣̂sı̣́lı̣́ tãndĩ íyíkâ rî vó ró,
gólâ âyê ãmâ ózõwá ũrûkậ ꞌbá yî rĩlí lédrẽ-lédrẽ ró.
Õzõ ãꞌdô tíkó ĩtí kô rî, tã ãmákâ rî âtî vó nõ trá ngbá,
nyé õzõ gólĩyî Sõdómõ kâ Gõmórã bê Ôvârí drí ûfúlı̣́ ndrĩ ngbá rî kâtí.”
Ĩsáyã 1.9
Tã õjílã Yúdạ̃ yí kâ drí tã lẽzó kô Yésũ ꞌá ꞌdíyî pã ꞌbá ró rî
30 Ngbãângbânõ rî, nĩ ârî úlı̣́ ámákâ nõ ꞌbá yî, õzõ kpálé õjílã gólĩyî Yúdạ̃ yî ró kô rî ꞌbá yî õrî kô lạ́tı̣̂ mbı̣̂ Ôvârí drí gólĩyî ndrẽzó õjílã mbı̣̂mbı̣̂ íyíkâ ró rî ꞌbá yî lôndãlé rî, ũrûkậ ꞌbá yî ûsû lạ́tı̣̂ ꞌdĩ trá, tãlâ gólĩyî lẽ tã trá Yésũ ꞌá. Ĩtí rî, Ôvârí ndrê gólĩyî trá tã mbı̣̂ ꞌbá ró tã lẽlẽ gólĩyíkâ tãsĩ.
31 Gõꞌdá õzõ kpálé õjílã Yúdạ̃ yí kâ õcê rû ĩyî kpı̣̃ı̣̂ âꞌdózó tã mbı̣̂ ꞌbá ró ĩyî Ôvârí lı̣̃fı̣́ tã ꞌbãꞌbã gólâkâ rî ꞌbá yî ı̣̂njı̣̃-ı̣̂njı̣̃ lâ yî sĩ rî, gólĩyî îcá kô tã ꞌbãꞌbã rî ꞌdĩ ꞌbá yî ı̣̂njı̣̃lı̣́ ndrĩ. Tãlâ tã ꞌdî tãsĩ rî, gólĩyî âꞌdó kô mbı̣̂ Ôvârí lı̣̃fı̣́.
32 Âꞌdô trá ĩtí, tãlâ gólĩyî lẽé tã kô Ôvârí gólâ îcá ꞌbá gólĩyî ꞌbãlé mbı̣̂mbı̣̂ ró rî ꞌá. Gólĩyî rî ĩyîngá gbõ rĩꞌá rû cẽlé tã tã ꞌbãꞌbã gólâkâ ꞌdĩ ꞌbá yí kâ bê âꞌdózó õjílã mbı̣̂ ró Ôvârí lı̣̃fı̣́, tãlâ tã gólĩyíkâ ꞌẽlé trá rî ꞌbá yî tãsĩ. Gõꞌdá Yésũ drã bê trá rî, tã rî ꞌdĩ ꞌbã gólĩyî gõꞌdá gãlé dó tã lẽlé Yésũ ꞌá ꞌdíyî pã ꞌbá ró. Õdrã Yésũ kâ âꞌdô trá gólĩyî drí õzõ kúnı̣́ gólâ drílĩyî rĩzó pá sı̣̃lı̣́ rú lâ ĩyî rĩzó lôꞌdélé vũdrı̣́ rî kâtí, tãlâ gólĩyî nı̣̃ı̣́ tã ífí lâ kô.
33 Gõꞌdá ĩtí rî, gólĩyî gã dó Yésũ rî nı̣̃lı̣́ ꞌdíyî pã ꞌbá ró, té õzõ tã ậngũ ꞌbá Ĩsáyã drí ậngũlı̣́ trá rî kâtí kĩ,
“Nĩ ndrê drẽ, má ꞌbã kúnı̣́ trá õjílã ámákâ Yúdạ̃ yí kâ lãfálé,
kúnı̣́ rî ꞌdĩ, õjílã dũû âꞌdô pá sı̣̃ꞌá rú lâ lôꞌdézó ngbá vũdrı̣́.
Gõꞌdá õjílã ãlô-ãlô gólâ tã lẽ ꞌbá trá kúnı̣́ rî ꞌdĩ ꞌá rî âꞌdô îcáꞌá njũlı̣́ gạ́gạ́ tã gólâkâ rú,
tãlâ gólĩyî nı̣̃ trá kĩ, gólâ âꞌdô tã ꞌẽꞌá mbı̣̂mbı̣̂ gólĩyî pãzó.”
Ĩsáyã 8.14; 28.16