7
Israel bagee okoo mée seratus empat puluh empat ribu kaa menaa
1 Kuwa kaboo da anii deeyaa naaki malaikat bagee mée okoo wui topea. Bo se misi naadi maga butu yaato wui kiyoo okoo mée ena-ena yiinaageeta topea. Magaa da kaa miya, maakaa pikuu da kaa miya, piya yuwa kaa miya bo se misi naadi taamege-taamege see ukuwagea.
2 Kuwa malaikat bagee wui kuwa Ogatamee me okoo magaa to ma, maakaa piku ma kuwa pedeo kiyaasi naadi pesee da manigi. Kuwa kaboo da anii deeyaa naaki malaikat bagee mée ena ma keno pakagi yaato kaama pakagi. Toono Too Mée Ogatamee me bagee ii see nekeensi naadi pe-tabeasiyaa agiyoo da mee malaikat see mée to me doopi. Wa me kuwa apanaa malaikat bagee okoo wui paagoo mena ebo kaa asiino,
3 "Maakaa piku ma, magaa to ma, piya yuwa ma kuwa eto kiipaa se pedeo kiyaai. Inii me Eboo Ogatamee mee kuwa Wa me agiyoo yaokagee see bagee yuwa okoo Wa me bagee yuwa ii see nekeensi naadi agiyoo mee okoo me etaguu to kaa yatabeasiino taa yoka kuwa agiyoo eto kiipaa se pedeo kiyaai" see asigi.
4 Kuwa kisee nekeensi naadi agiyoo yatabeata bagee yuwa okoo uduma egataayaa naaki mée seratus empat puluh empat ribu. Okoo kuwa ko Israel bagee mée apa gaasi ma wiya kaa bagee yuwa.
5 Kuwa yatabeata bagee kuwa ko Yehuda apaa kaa bagee mée dua belas ribu, Ruben apaa kaa bagee mée dua belas ribu, Gad apaa kaa bagee mée dua belas ribu,
6 Asyer apaa kaa bagee mée dua belas ribu, Naptali apaa kaa bagee mée dua belas ribu, Manasye apaa kaa bagee mée dua belas ribu,
7 Simeon apaa kaa bagee mée dua belas ribu, Lewi apaa kaa bagee mée dua belas ribu, Isakar apaa kaa bagee mée dua belas ribu,
8 Zebulon apaa kaa bagee mée dua belas ribu, Yusup apaa kaa bagee mée dua belas ribu, Benyamin apaa kaa bagee mée dua belas ribu. Kuwa ko Wa me bagee yuwa ii see nekeensi naadi agiyoo okoo kaa yatabeata bagee yuwa.
Mée eebaa kutuu seta kuwa deeta menaa
9 Kuwa kaboo da anii deeyaa naaki mée eebaa kutuu semaata topea, se egamaayaa. Mée tomaa gakata, mée apa gakata, maga gakata, mena tomaa gakata kisee tomaa bagee kuwa okoo ebo animagaano yoo kiyoo Domba Pooduu to ikigii to kaa yiinaageeta topea. Okoo togoo see dokaa, epoo da poodee see dokaa maataata totaakea. Okoo me yagaa da kaa palem see piyaa kagoo yuwa peneata topea.
10 Okoo me mena ebo kaa wegaano,
"Daba mée daagimaa peeyaano Mée mee ko ebo animagaano yoo animaata totaaki Mée inii me Eboo Ogatamee mee,
bedaa Domba Pooduu to Waa miya kisee Mée" see menaa wegagea.
11 Malaikat bagee kuwa uduma okoo ebo animagaano yoo kiyoo aya tookee agiyoo wui ma, ebo bagee mée oga ma wui ma kuwa gebo bobetaata topea. Okoo ebo animagaano yoo ikigii to kaa esee-gapuunta Ogatamee yaapaageekea.
12 Okoo me wegaano,
"Amin! Inii me Eboo Ogatamee Wa too ebo, Wa too asii-sege, Wa too ipi yago Mée yoka inii kiiboo, paamee see dimii kaa niiyaapaagee taai.
Waa esee omaago, Se-pesee, We-pesee yago Mée mee, kisee too iminoo miya, iminoo miya. Amin" see menaa wegagea.
13 Kiyoo kaama kuwa ebo bagee kuwa ena me nasiino, "Kuwa poodee togoo see dokaa maataata topea bagee kuwa maamee? Okoo kayoo kaama megea naa ya?" see nasigi.
14 Ani me waa asiino, "Neataagi, a too ipi" see asega. Wa me nasiino, "Kuwa bagee kuwa ko mée me esee maamaa wegee-wegee seta kaboo makii taa see kaa toogee seta bagee yuwa. Okoo me togoo see dokaa yuwa kuwa Domba Pooduu to Wa me tadaa uwoo yiba wetogemaata kaama poodee kiyaata.
15 Kuwa me kemaata okoo egapi yaato miya, daatooyiba yaato miya Ogatamee me ebo animagaano yoo ikigii to kaa yiinaageeta Wa me ee kaa agiyoo daamaa yaokagee siwoo see. Bedaa mee ebo animagaano yoo animaata totaaki Mée Wa me okoo taamegee taano see naadi okoo paagoo epo enaataa eetoowoo taapi.
16 Mee kaama wodoo okoo naano agiyoo ma, uwo ma kuwa se naadi kaapea, bedaa keno tani kaa ae-wae siyaa kuwa miya taa, biyaa tani yaai see kuwa miya taa.
17 Mee ebo animagaano yoo semoo to kaa Domba Pooduu to mee tupi yoka okoo gaagaa taa. Domba wodaa munitaa see mée mokoo Wa me okoo mée aya tuyaayaa uwoo mumaa to kaa kiyoo eepootagi. Okoo me emaa kaa yegee uwoo yuwa uduma Ogatamee me yawonaapeasiitagi" see kuwa wa me nasigi.