10
1 Neebee nokaa yuwa, eto ko anii ma tomaa kaa bagee kuwa okoo daba daagimaa peegea naaki ou naadi kaama anii okoo kaa Ogatamee paagoo sembahyang yasegeeka.
2 Okoo ko "Ogatamee me menaa niidoowoo, niiukuwawoo taai" see omaago ma wegawoo see bagee kiya okoo mikee menaa doodoo se ukuwawoo siyaa, see kuwa mikee kisega.
3 Ogatamee me inii Kristus doodoo too mée sikii kiyaayaa menaa kuwa okoo ewo. Okoo me "Inii Musa me menaa deewoo naadi kaama mée sikii kiyaayaa" see menaa kuwa doowookea. Okoo Ogatamee me Kristus mee doodoo too mée sikii kiyaayaa see menaa kuwa yayiino taa.
4 Mikee, Musa me menaa kuwa manii to ko Kristus kaa too, Wa kaa too uwa daata kemaata Waa mikee gaayaa bagee kuwa Ogatamee me sikii kiyaayaa.
Yesus mikee gaayaa bagee kuwa uduma daba daagimaa peeyaa menaa
5 Musa me menaa kuwa Kristus kaa uwa daata kemaata idukaa Ogatamee me "Kisee ukuwaai, kisee se ukuwaai" see aseta menaa doodoo mée sikii kiyaayaa see kaa menaa ena Musa me ebeamaata, mee ko kisee: "Kuwa menaa yuwa ukuwawoo siyaa bagee kuwa daamaa toogee taapea" see menaa ebeamaata.
6 Kiya Kristus mikee gaawoo naadi kaama mée sikii kiyaayaa menaa mee ko kisee: "'Asiyoo epoo to wodoo maamee pakagiipi naa ya?' see dimii mee se gaai" see menaa ebeamaata. Mena nekeeniino yaato ko 'Ani me Kristus Waa asiyoo kaama magaa da kaa badaa pakaa-maagiinaka' see dimii mee se gaai.
7 "Bedaa 'Yamokiyoo boota bagee toogee yoo maamee esegiipi naa ya?' see kuwa miya se wegaai" see menaa ebeamaata. Mena nekeeniino yaato ko Kristus Waa yamokiyoo kaama badaa maawaanaka see dimii mee miya se gaai.
8 Kisee se kiya mapea menaa ebeamaata naa ya? Mee ko kisee: "Okaa da ebo menaa kuwa ekaapa, beesekaa se, ikii me ebee to kaa miya topa, ikii me dimii yiba miya agoo" see kuwa idukaa ebeamaata. Eto ko kuwa okaa da ebo menaa kuwa inii yaweganaakea, Yesus mikee nao see gaai naadi menaa kuwa.
9 Kisee ikii me ebee to kaa "Yesus mee ko Tuhan yoka" see wegataa, bedaa dimi yiba 'Yesus mee boota kaama Ogatamee me mikee aya andoo peeyaata ii' see kuwa miya gaataa, kisee ukuwayu ko ikii daba daagimaa pootagea.
10 Yesus me menaa kuwa dimi yiba awimaayu naadi kaama Ogatamee me mée sikii kiyaayaa, bedaa ebee to kaa Yesus mikee nao see wegamaayu naadi kaama mée daba daagimaa peeyaa.
11 Ogatamee me menaa yiba ebeamaata menaa ena mee ko kisee: "Waa mikee gaayaa bagee ego weda see dimii mee se gaatagea" see ebeamaata.
12 Mikee, Yahudi bagee wa too, mée tomaa-tomaa apanaa yuwa wa too see kuwa se kiya okoo uduma endagii. Okoo uduma epoo Mée mee ena too too, mee ko Tuhan mee. Wa paagoo Tuhan nao see asiyaa bagee kuwa uduma Wa me okoo kaa daamaa agiyoo maamaa yaukuwaaniyaabuu siyaa.
13 Mee ko "Tuhan nao naadi Wa ekaa da weeyaa bagee uduma daba daagimaa pootagea" see menaa ebeamaata kemaata mée uduma ena doodoo.
14 Kisee kiya okoo Waa mikee gaano taa see bagee kuwa gaayu ko okoo me kaasee Tuhan nao see asiyaa? Bedaa Wa me menaa yiino taa see bagee kuwa kaasee mikee nao see gaayaa? Bedaa Wa me menaa okoo paagoo eewegaano bagee taa gaayu ko okoo kaasee kuwa menaa yeeyaa?
15 Bedaa kuwa menaa pe-eeweganaa taai see asiino taa gaayu ko kuwa menaa kaasee eeweganaa siyaa? Ogatamee me menaa ena mee ko kisee: "Daamaa menaa yadoonaa see bagee yuwa meemaagea kuwa daamaa, ede nao" see menaa ebeamaata.
16 Kiya Yesus me doometa menaa kuwa mée uduma daamaa masemagaano taa. Mikee, kisee menaa da idukaa nabi Yesaya me wegata, mee ko kisee: "TUHAN, inii me kadoota menaa kuwa daamaa eewegamaage kiya maamee me mikee nao see gaayaa?" see wegata.
17 Kisee kemaata Kristus me menaa kuwa yeekee kaa mikee nao see gaayaa. Bedaa Wa me menaa eewegaakee kaa yeeyaa.
18 Kisee kiya ni me apaadee see menaa ena mee ko kisee: Kuwa Kristus kaa menaa kuwa Israel bagee yuwa yeemaagea ye, yiino taa ye? Okoo mikee yeemaagea. Kisee menaa ena idukaa ebeamaata, mee ko:
"Okoo me menaa kuwa uwoo to, magaa to peeyaabuu taa see,
okoo me menaa yuwa maga otoo to kaa too peemaaga" see menaa ebeamaata kemaata Mzm 19:5
19 Israel bagee yuwa mikee yeemaagea. Kiya anii bedaa kaagaa ena ma apaadee see menaa agoo, mee ko kisee: Kuwa Kristus kaa menaa kuwa Israel bagee yuwa nekeeniino taa ye? Okoo mikee kisee nekeenegea ii see menaa kuwa petamanii Musa me ebeamaata. Ogatamee me menaa ena mee Musa me Israel bagee paagoo yaaseta, mee ko kisee:
"Ani me mée tomaa-tomaa apanaa yuwa miya epa kaapa kuwa kaa ikii me Anii nabe kaapea,
Ani me dimi ewo see tomaa kaa bagee yuwa kaa daamaa agiyoo yaukuwaapa kuwa kaa ikii me Anii nakagoo kaapea" see yaaseta. Ul 32:21
20 Bedaa kisee miya nabi Yesaya me Ogatamee me wegata menaa weda taa ma yaaseta, mee ko kisee:
"Okoo TUHAN mee ou see dimii mee taa kaa Anii naabanaa taano taa see bagee yuwa kuwa Anii nadeemaagea,
okoo TUHAN mee ipi kega naaki ou see dimii mee taa see bagee yuwa paagoo Anii ekaato ipi kiyaaga" see wegata. Yes 65:1-2
21 Kiya Israel bagee gaayu ko Ogatamee me okoo kaa yawegata menaa ena mee ko kisee: "Kuwa Ni me menaa se nayeetaa, Anii nawisintaa see bagee kuwa Anii kisee too egapi yaato miya, daatooyiba yaato miya uduma Ni paagoo nameei naadi Ni me yagaa wiya kegataata kisee too toomuu segeeka" see menaa yawegata.