18
Ka Pogkapolod to Dakol no Lunsud to Babilunia
1 Pogkaponga to sikan, duon man do nigkita ku no dangob no diwata to Magboboot no niglogsad ligkat to langit. Duon dakol no kabogbogan din, no ka tibo no kalibutan, nabat-awan to kandin no kalayagi.
2 Nigbabansagon sikandin no kagi rin to, “Nagulakgulak on ka mabantug no lunsud to Babilunia. Nohimu on no ugpaanan to mgo busow woy ka mgo balbal. Woy dio ogman-ugpo ka agad nokoy mgo maligsom woy ka maroot no mgo manukmanuk.
3 Ian su tibo no mgo koot-otawan to soini no kalibutan, nokoinum to sikan no inumanon din no ian ka mgo ig-ayat din oyow ogpokounug sikandan to mgo maroot no batasan din. Ka mgo igbuyag to soini no kalibutan, nighulid kandin. No ka mgo otow no ogsasaliu, nasalapian on to igkaratui rin no nigligkat to pogpanhilabot to kono no asawa rin.”
4 Pogkaponga, duon dangob no lagong no nigdinog ku. Kagi rin to,
“Sikaniu no mgo sakup ku, awo kow on to sikan no lunsud oyow kono kow ogkaayat to mgo maroot no batasan din no ogpakasalo kow on no songo ogpakalagkos kow to kandin no logpad.
5 Nokog-ampow-ampow on ka mgo salo din, no ian ogkounawaan ka katikang to langit. No kono ogkalingawan to Magboboot ka mgo pogkamaroot din.
6 Sikan ian to ogkabonnalan sikandin no ogkalogparan su ligkat to sikan no mgo maroot no nighimu rin. No ko songo monu ka imbayadbayad din to duma no mgo otow, songo sikan dod ka igbayadbayad dio to kandin. Di ko songo monu kabuluti ka inumanon no impoinum din to duma no mgo otow, ogdangob pad man do to kabuluti ka igkabaybayari no ogpakabalos dio to kandin
7 Nò, su nigmarayandayan sikandin no ian din umalagon ka kandin no ogkoiniatan, ogkoiling dod to sikan ka ogkoumaan to kandin no igkabaybayari. Ian su ka sikan no maroot no boi no ian igpananglitan to sikan no dakol no lunsud, nigkagi to, ‘Sikanak no boi no igbuyag, ogpakaalap to pandatuan ku, no waro igkoil-ilui ku. Kono a ogkoumaan to igpandawot ku su waro a man nabalu.’
8 Sikan ian, to songo allow ro ogkoumaan on sikandin to mgo igkabaybayari rin, mgo daralu, woy ka mgo igkapandawot din, woy ka mgo bitil, lagkos to ogkasilaban on. Ian su ka Lagboy no Igbuyag no ian ka Magboboot woy mamabogbog to tibo, ian ka oglogpad kandin.”
9 Ka mgo dakol no igbuyag to soini no kalibutan no nandumaruma kandin to ogmanhimu to mgo maroot no mgo batasan, ko ogkitoon dan ka obol to hapuy no ogpakasilab kandin, ogmaninsinogow woy ogpandawot.
10 Di dio do to mariu ogbabantoy su ogkahallok sikandan to ogpakalagkos to kandin no iglogpad. Woy ogpakakagi sikandan to, ‘Kalogon, kohoy-u ro ian lagboy su ka mabantug no lunsud to Babilunia, naraat lagboy su nigdagsangan on to logpad no waro do malingonngon no noubus on.
11 No agad ka mgo otow kai to kalibutan no talagbaligya songo ogmaninsinogow woy ogpandawot to sikan no ogkoumaan to sikan no dakol no lunsud to Babilunia. Ian su warad ogpakaboli to igbaligya dan poron.
12 no bulawan, woy ka mgo kalaglagan no nohimu to palata woy ka mgo mahal no batu, woy ka ighimu to baliog no oghingaranan to pirlas. Woy songo waro ogpakaboli to mgo mahal no manggad dan no malugowlugow woy ka malalab woy ka malurok. Woy songo waro ogpakaboli to agad nokoy no mgo kalaglagan no nohimu to mgo bangkil to ilipanti, woy ka nohimu to mahal no batu, woy ka nohimu to mahal no kayu, woy to burunsi, woy to putow, woy mgo to mgo malurok no batu no oghingaranan to marmul.
13 Woy warad on ogpakaboli to mgo mohomut no ig-anag no ogkohingaranan no sinamun, woy ka mgo paminta, woy ko ka igmohomut to lawa woy ka mohomut no igtomog. Songo waro ogpakaboli to mgo inumanon dan, woy ko lana, woy ka maroyow no harina ran woy ka tirigu, woy ka mgo ayam dan no baka, woy ko karniru, woy ka mgo kalisa ran, woy ko mgo uripon woy ko mgo gimukud to mgo otow.
14 No,” kagi rod to sikan no mgo talagbaligya to, “Ka tibo no ogkoiniatan nu poron, warad on. Woy ka tibo no karoyawan nu, songo konad on ogkakitaan. Ian ka kagi ran.
15 No ka tibo to sikan no mgo otow no ogbaligya poron to sikan no mgo kalaglagan, ogsasindog dio to mariu no ogbabantoy no ig-uwang dan to ogsinsinogow woy ogmandawot.
16 No ogkagi ran to, “Kalogon lagboy to mgo otow to sikan no dakol no lunsud no nokani nakakikinabo to mgo maddoyow woy mahal no manggad no malalab woy malugowlugow, woy duon pad immaroyow rin no bulawan, woy to mgo mahal no batu woy to pirlas no oghimuon no baliog.
17 No to waro do malingonngon no ka tibo to sikan no igkaratui rin, noubus on.” Sikan ka kagi ran.
No ka tibo no mgo kapitan to mgo sakayan dio to dagat, woy ka mgo ogmanakoy woy ka mgo ogmanalabau to mgo sakayan no dio to sikan woy ka tibo no mgo otow no ogmanalabau dio to dagat, songo ogmansasindog sikandan dio to mariu to sikan no dakol no lunsud ka ogbabantoy.
18 No ko ogkitoon dan ka obol din to ogkasilaban on, ogpakangangang to kagi ran to, “Waro ogkounawa to kabantug to sikan no lunsud.”
19 No to pog-amulung dan, nigpanabukan dan ka mgo ulu ran to obol to tano woy ogmaninsinogow sikandan woy ogmandawot lagboy no ogpaagbot to ogkagi to, “Kalogon lagboy su naraat on ka sikan no mabantug no lunsud. Ian su ligkat to kandin no igkaratui, ogpanalapi poron ka tibo no mgo otow no tagtuun to mgo sakayan to dagat. Di to songo uras do, noubus on ka tibo no mgo kalaglagan din.” Sikan ka ogkagion dan.
20 Sikaniu no ogman-ugpo dio to langit, woy sikaniu no mgo sakup to Magboboot woy ka mgo suguanon din woy sikaniu no mgo talagnangon to kagi to Magboboot, karagoi now ka pogdaat to sikan no mabantug no lunsud. Ian su niglogparan to Magboboot ka mgo otow to sikan no lunsud no nigbayadbayad kaniu.”
21 Pogkaponga, duon mabogbog no diwata to Magboboot no nighonat to dakol no galingan no batu no indogpak din dio to dagat. No kagi rin to, “Ogkounawa to soini ka pogkagulak to sikan no mabantug no lunsud to Babilunia. Konad on ogkohutuk no ogkitoon.
22 Woy kai to kandin, konad on ogdinogon ka mgo daging to alpa woy ka mgo maroyow no oggung, woy ka daging to pulondag woy ka bungag. Songo konad on ogkakitaan ka mgo otow no ogkatou to agad nokoy no ogpanhimuon. Songo konad on ogdinogon ka daging to mgo galingan.
23 Songo konad on ogkohutuk no ogkabat-awan to agad nokoy no ilawan. Woy konad on ogdinogon kai ka mgo lagong to mgo iam pad og-asawa. Ka mgo ogpandagang kai to soini no dakol lunsud, mabantug poron lagboy sikandan dio to agad hondoi kai to kalibutan. Di ligkat to pogpamulingan dan no ogpokoubat, nagawayan ka tibo no mgo koot-otawan to soini no kalibutan.
24 Sikan ian to niglogparan ka mabantug no lunsud to Babilunia su dio nigtulalug ka mgo langosa to mgo talagnangon to kagi to Magboboot woy ka mgo sakup din woy to tibo no mgo otow no nighimatayan kai to kalibutan.”