3
Ka Ngaran ni Hisus, Dakoldakol ki Moisis
1 Nò mgo sulod ku to pogtuu no songo nig-abin to Magboboot oyow ogpokougpo kinow dio to kandin uromo dio to langit, ogdoromdomon ta si Hisus no pigsugu to Magboboot kai to kanta woy nohimu on no Labow to mgo Talagpanubad to soini no pogtuu no og-abinon ta.
2 Masalig si Hisus no ogtuman to tibo no insugu to Magboboot no ian nig-alam kandin. Ka sikan, ogkounawa ki Moisis no songo masalig dongan to pog-alap din to pogpangatondanan to mgo pinanganak ni Israil no pigtokod to Magboboot.
3 Dokad di to dakoldakol ka igkasayo ki Hisus to sikan no igkasayo ki Moisis. No ian ogkounawaan ka baloy no oghimuon ta su songo dakoldakol ka igsayo ta to talaghimu to baloy, di mamalintok ka igsayo ta to baloy no nighimu rin.
4 Ka tibo no mgo baloy, duon mgo otow no nighimu, di ka Magboboot, ian ka talaghimu to tibo.
5 Ko si Moisis dongan, suguanon do to Magboboot no masalig sikandin to tibo no pog-alap din dio to mgo otow no impasakup to Magboboot. Di ka sikan no nohimu ni Moisis, immaganangon to sikan no igpatuman to Magboboot uromo.
6 Di si Kristu atag, ian ka Anak to Magboboot no ian tagtuun to baloy. No masalig si Hisus to og-alap to mgo otow no impasakup to Magboboot. No sikanta ka nohimu on no baloy rin, ko kono tad oglokaan ka pogsalig ta woy ka igkarago ta to sikan no og-im-imanan ta kandin.
Ka Himolayan no Ogligkat to Magboboot
7 Sikan ian to duon innangon to Gimukud to Magboboot. No kagi rin to,
“Kuntoon, ko ogdinogon now ka kagi to Magboboot,
8 kono kow ogpagkol to goinawa now no ogkounawa
to nohimu to mgo otow dongan no nakabayo to holholawan no nanligal to innangon din
woy ungoron dan og-ol-ologi ka Magboboot no nigbayo sikandan to sikan no awayan no mammara no tano.
9 Agad to ogkitoon dan ka tibo no nighimu ku to sikan no kohop-atan no tuid, malasi a ran og-ol-ologi.
10 Nò, sikan ian to nabolu ad on to sikan no mgo otow no nigkagi a to, ‘Ka goinawa ran, ungod ogsuwoy no kono ogkoiniat no og-unug to batasan ku.’
11 Sikan ian to nabolu ad on ian no nigsapaan ku to konad on ogpokosolod ka sikan no mgo otow dio to intagad ku poron kandan no himolayan.” Sikan ka innangon to Magboboot.
12 Nò mgo sulod to pogtuu, ayad-ayad kow oyow waro agad sagboka kaniu no ogmarooton to goinawa now no kono kow on ogtuu ki Hisus, su ko ogkoiling kow, ogkoiniugan now buwa ka Magboboot no kono ogkamatoy.
13 Di atag, tagood to duon dod allow ta to ogtuu, ogmoos-osonoy kinow nasi oyow kono kid ogkagawayan to goinawa ta no ogligkat to ogpakasalo ki no ogpagkol on ka goinawa ta.
14 Ian to og-iling ki su ko taman to ogpokouma kid on dio ki Kristu, og-ungoron ta ro oghirosoni ka sikan no an-anayan no pogsalig ta kandin, ogpakarumaruma kinow kandin.
15 Sikan dod ka ingkasulat dongan no kagi rin to,
“Kuntoon, ko ogdinogon now ka kagi to Magboboot, kono kow ogpagkol to goinawa now no ogkounawa to nohimu to mgo otow dongan no nanligal to innangon din.”
16 Hontow naan ka sikan no mgo otow no nigdinog to kagi to Magboboot di nigligal nasi to kagi rin ko kono no sikan no mgo otow no nakaawo to ugpaan to Ehipto dongan no si Moisis ka nig-alap kandan?
17 Woy hontow ka nakabolu to goinawa to Magboboot to solod to kohop-atan on no tuid ko kono no sikan dod no mgo otow no makasasalo woy nammatoy on dio to sikan no nabayaan dan dio to sikan no holholawan?
18 Woy hontow ka nigsapaan to Magboboot to konad on ogpakasolod to sikan no intagad din poron kandan no himolayan ko kono no sikan dod no mgo otow no nanligal dongan kandin?
19 Ligkat to sikan, ogpakasabut kid on to waro nakasolod sikandan to sikan no himolayan to Magboboot su waro nigtuu sikandan to kagi to Magboboot.