18
Tuala Tatila ne Vaviloni Mimamulo
1 Ioxe eni emaisou mimii ne mukalu xe iliꞌi no anu la angelo vile molu teitexi no loxotolo muluꞌe. Anu xaviinu manina xe muluꞌe la lamanaxu muieisou lia ꞌo mukalusi.
2 Anu muꞌava tatila aloxo,
“Tuala tatila ne Vaviloni a mimamulo mukalu.
Mo ane ixali tualasiꞌa ta uleenu ta masumasua.
Aneꞌi ta molosila mo ta ngiala ta masumasua
iloꞌa ta ngiala ta laꞌilaꞌia manina ixolu no anu.
3 Xo ta mitema tavuꞌalo milai noxie la iloꞌa miꞌoxonu ꞌiliꞌilixo masumasua sou voteꞌi,
la miꞌoxoneꞌi mixovulaulau loxo milosiꞌa uaini noxie la miiexu.
Mo ta tatanaanu no lia ꞌo miꞌoxonu ꞌilixo sou voteꞌi ne kalumo noxie.
Mo ta mitema sou isovanu mimii iouiou
la ta mitema ilotonu no lia ꞌo minoꞌu lamoli toxotoxoxaꞌa manina
no anu ꞌiliꞌilixo masumasua noxie ne.”
4 Mo eni elomu la, la elomusou ꞌava vile la molu teitexi no loxotolo muluꞌe aloxo ꞌo,
“Ta mitema noxilo ngongiꞌa ngavaitami malaxo no anu susu noxie mamu,
ngaꞌume mo ngaxexesie mo sou umomomo sou
ngaꞌuna no anu tuꞌutuꞌumaxu e sou uxali noxie uasi.
5 Xo Lataua uxavutalanu ꞌiliꞌilixo masumasua e ane miꞌoxoꞌoxonu ne
misuꞌanu laꞌoluxu xo mole mutelo muxali teitexi no loxotolo.
6 La sou ꞌiliꞌilixo maꞌia ane miꞌoxonu muneꞌe noxinge
la ngakolinu ulivu noxie aloxo ne alaxu ta tamei.
Mo milosinge uaini ngeiexu la ngakolinu ulivu ulai noxie,
aloxo ne alaxu ta tamei xe ukalu la ngalosie iiexu.
7 Mo ngalosie navunavu manina mo itama,
xo ane iꞌitinu ualasie la mivikala lexe ane mixolu laixe manina.
Mo tane uvikala lexe ane mixolu loxo sema tatila la iꞌitinu ualasie mo ivikala lexe,
‘Eni loxo sema valu uasi xe umomomo sou mii vile uꞌoxoleli atama uasi.’
8 Aloxo ne la sou tuꞌutuꞌumaxu masumasua uxali noxie no voxo vilesisi.
Tuꞌutuꞌumaxu ne soli mo tama xe kaetoto toxoxaꞌa
mo ane iꞌela no navu xo Tila anu Lataua xaviinu musuku
mulavusou ꞌiliꞌilixo maꞌia ane miꞌoxonu la muvikala lexe anu ukalusie.
9 Mo ta tatanaanu tuatuala e mineꞌe iloꞌa miꞌoxoꞌoxonu ꞌiliꞌilixo iouiou sou voteꞌi la iloꞌa mixolu laixe manina imaisou navu umuxu sou iꞌela la itama mo ielielisie.
10 Mo imaisou navunavu e muxali noxie ne la iꞌume xe itulu vaꞌaxu ꞌolesi ia itama. Aneꞌi itama la ivikala lexe,
‘Maulamenge Vaviloni,
nini tuala manina mo xavineni musuku,
ia alaxu vilesisi la nini nakalu avile.’
11 Mo ta mitema sou isovanu mimii no lia ꞌo ukalusi kalumo itama mo ielielisie xo evile umomomo sou ulotonu miꞌamiꞌa ilou mixamixaꞌa la uasi.
12 Miꞌamiꞌa ilou mixamixaꞌa loxo xoulu mo siliva mo xapoxapo mo lasala mo lavalava keakea mo malivololoonu mo xalexalexu xe lauolauoinu, mo ovuovu tumaꞌu lailaixe mo mimii iouiou miꞌoxonu no anu elepani anaxu mo ovuovu iouiou ilotonu la lamoli sou toxoxaꞌa mo balasi mo aeni mo kulu lailaixe toxoxaꞌa.
13 Mo mimii tumaꞌu lailaixe loxo maiau sosou mo misou ielaxu la tumaꞌu lailaixe mo ueli mo mii tumaꞌu lailaixe mo uaini ilou olivu lexaxu mo palaua mo uiti mo kau mo sipsip mo oosi mo mii e oosi ulapulapunu sou utavuleneꞌi ta mitema no anu mo isovaneꞌi ta mitema sou ta mitema ilotoneꞌi xe ta mitema imaumauli ne evile ulotonu la uasi.
14 Ta mitema lavuluti la ivikala lexe, mimii e ngiangiaxu nini nemasaxau sou naꞌou mo lavuluti iouiou mo tokolomo e lailaixe lamoli sou toxotoxoxaꞌa ne ukalu avile. La umomomo sou naxalisou la uasi.
15 La ta mitema sou isovanu mimii ne misovanu mimii no nano noxie la minoꞌu lamoli toxoxaꞌa ne mimaisou navunavu noxie ne la miꞌume manina la umomomo sou ilai ꞌalai uasi. Mitulu vaꞌaxusi. Aneꞌi mitama mo mielieli manina,
16 mo mitama miꞌavaꞌava aloxo ꞌo,
‘Maulamenge tuala tatila manina,
tatei la tokolomoxe ne lavulavu keakea mo lailaixe manina
mo kaukavuxu iouiou manina.
Anu kaukavuxu malivololoonu mo lauolauoinu mo lasala
mo xoulu xe xapo iouiou ulamilami no anu vasimele.
17 Xo alaxu vilesisi la tokolomoie ilou lamolie ne tasiauxu.’
La ta mitema e itatavulenu lasipi tavuꞌalo mo aneꞌi e iaveiave no lasipi ilai no tuala xalexalee moseꞌi ne mo aneꞌi ane ixaxai no nano no lasipi mo aneꞌi ane maulixaꞌa muxolu no luaki ne itulu vaꞌaxusi la ieꞌi ukaasi.
18 Aneꞌi itulu ia ieꞌi ulai no navu umuxu e uꞌie ukalu la iꞌava ulai lexe, ‘Tuala tatila vile umomomo aloxo tuala tatila ane ꞌo uasi manina.’
19 La sou aneꞌi miꞌuloxu lomulo no kisiꞌa xe mitama mo mielieli manina la miꞌava aloxo ꞌo,
‘Maulamenge tuala tatila manina,
no mine nexolu la ta mousou lasipi no luaki mixali
ta mitema sou lavuluti no anu lamoli noxiesi.
Ia alaxu vilesisi la ane tasiauxe avile.’
20 Aloxo ne la sou nini loxotolo mo ta mitema noxou Lataua
mo ta mitema sou xaixai noxou xe ta mitema sou palomatana.
Ngaꞌosa manina xo Lataua mukolinu
la mulosie navunavu iouvilesisi aloxo ane miꞌoxonu muneꞌe nixinge.”
21 Xe vaivaikala ne mukalu la emaisou angelo vile xaviinu musuku muꞌitinu lavoꞌo kulu vile toxoxaꞌa la muleanu mulai no luaki. La muꞌava aloxo ꞌo,
“Tuala tatila ne Vaviloni ne ileanu ulai no luaki aloxo ne
mo umomomo sou ixalisou la uasi.
22 Mo umomomo sou ilomusou susapu mo vei
xe xoolau ta mitema iꞌoxonu utama no nano ne la uasi,
mo ta mitema sou xaixai iouiou umomomo sou ixaxai no nano ne la uasi,
xe umomomo sou ilomusou lavoꞌo sou uxiunu uiti luuxu la uasi.
23 Mo telu ukakaa no nano ne la uasi,
mo umomomo sou vaivaikala sou taulaꞌi ilomusou no nano ne la uasi.
Ta mitema sou isovanu mimii mixali ta mitema sou lavuluti
mo xavineꞌi no ieꞌi ta mitema no lia ꞌo mukalusi.
Xo no anu saa kalakalavoi noxine la neꞌoxoneꞌi ta mitema
no xalexalee tuatuala no lia ꞌo milai vaꞌaxu mukalusi.
24 Xe no nano la ta mitema sou palomatana iloꞌa ta mitema noxou Lataua
xe aneꞌi ane miveꞌa misoisoli sialuxaꞌa munixi,
la sou Lataua mumaisou aloxo ne la mukalusie tuala tatila ne avile.”