UOLI VOLOXU VILE ANE PAULO MUKAUKAVU MULAI NOXIꞌA
TA KOLINITO
Vaikala lamana
No anu voxo noxou Paulo, la anu mulai muaꞌaloxu aꞌalo laixe sou Iesu Kalisito no tuala tila ne Kolinito. Tuala tila ne Kolinito ne muxolu no xalee lia tila ne Akaia no xalee noxiꞌa ta Xiliki. Anu Paulo musokou lalotu xe mutounu lalotu no nano no tuala tila ne Kolinito ne. Ia no mine anu muꞌumesiꞌa sou mulai muxaxai no xalexalee leviani, la tuꞌutuꞌumaxu muxali noxiꞌa ta temanu lalotu ne Kolinito. Tavaꞌu aloxo ne la sou anu mukaukauvunu uoli voloxu ane ꞌo sou ulai umomosiꞌa no anu tuꞌutuꞌumaxu noxiꞌa ne.
Paulo tanuxaꞌa ta temanu lalotu ne Kolinito ne, xo loxo ꞌo io tuꞌutuꞌumaxu ne utaloxolixu muxamuxaxu taneꞌi, xe loxo ꞌo io uꞌoxoneꞌi la imuinu ꞌiliꞌilixo lailaixe la uaꞌa. Mo mulamanalixu talitaliꞌi moseꞌi no anu ꞌilixo sou taulaꞌi lexe aneꞌi ane mitautaulaꞌi imulinu ꞌilixo sou taulaꞌi laixe mo muvikala lexe tuꞌutuꞌumaxu uxali ne xo Uleenu Tavuna uulaxuneꞌi no anu xavutalaiꞌa sou ulosiꞌa xavutala laixe uasi. Mo muvikala no anu ꞌiliꞌilixo no anu lalotu, mo xaixai iouiou e Uleenu Tavuna ulosiꞌa ta mitema vilevilesi, xe muvikalaneꞌi lamana lexe ta mitema misoisoli ne, iliꞌi la itulu imauli la. Tuꞌutuꞌumaxu noxiꞌa ta Kolinito ne muꞌoxonu Paulo opo tuꞌumaxu manina, la sou anu mulamanalixaꞌa no anu masaxa noxou Lataua la muaꞌaloxu aꞌalo laixe ne, sou aneꞌi ilavu laixe lexe vaikala noxou Lataua muvikala no anu tuꞌutuꞌumaxu ne aloxo ua.
No nano no anu mautunu 13, la mupalaꞌalixu lamana lexe ꞌilixo sou tamasaxaiꞌa ta menexinge manina ne, ane mii lailaixe Lataua mulosiꞌa ta mitema noxou. ꞌIlixo ane ne, anu muaꞌulixo ꞌiliꞌilixo leviani.
Aꞌalo muai no nano aloxo ꞌo
Vaikala lamana 1:1-9
Kalikalipala muxali no nano no anu lalotu 1:10–4:21
ꞌIlixo sou voteꞌi 5–6
Vaikala sou taulaꞌi 7
Laꞌilali iꞌelaxu ulai noxiꞌa ta lataua kalakalavoi 8:1–11:1
ꞌIliꞌilixo sou lalotu maniasou 11:2–14:40
Iesu iloꞌa aneꞌi ane mimuxaxu taneꞌi itulu imauli la 15
Vaikala lamana sou suꞌuli xe muamuaꞌi noxou Paulo 16
1
1 Eni Paulo itema e Kalisito Iesu mupalusilo no anu masaxa noxou Lataua la muꞌavalilo mo vivinge Sosutenisi,
2 tekaukavu uoli voloxu ano ꞌo ulai noxinge ta mitema sou lalotu noxou Lataua lai ne Kolinito. Kalisito Iesu muꞌavalinge mo ngexolu vaꞌaxu loxo ta mitema noxou Lataua, mo ta mitema ukalusi no tuatuala ipita mo ilinga no ualasou Tila noxinge Iesu Kalisito, anu Tila noxiꞌa mo Tila noxinge kalumo.
3 Alauna mo opo seꞌisisi molu noxou Lataua Maminge mo Tila Iesu Kalisito ulai noxinge.
Vaikala sou ꞌOsa
4 Eni utotomu ne alemo laixe ulai noxou Latauamenge xo noxou Iesu Kalisito la Lataua mualaunangenge ngingi ta Kolinito misevile.
5 Xo noxousi la Lataua muꞌanaꞌanalinenge no anu mimii lailaixe sou Uleenu. Mimii lailaixe ane ne anu vaivaikalamengi mukalusi xe no anu lavulavumengi mukalusi.
6 Xo tavaꞌu loxo aꞌalo laixe sou Kalisito ane nexi teaꞌaloxu ne muxali pekiaꞌu no nano noxinge.
7 Aloxo ne la sou ngingi ngaxoo vaꞌaxu no anu mimii lailaixe vile noxou Lataua Uleenu ne uasi, no mine ngingi ngaloopala sou ngaxoxomaiou Tila noxinge Iesu Kalisito ulivu uneꞌe.
8 Anu Tila uꞌoxo pekiꞌainge ulai utalo no anu voxo kaluxusou mo sou susu vile uxolu noxinge uasi no anu voxo noxou Tila noxinge Iesu Kalisito.
9 Lataua uvikala maninasi ne muꞌavalinge ngeꞌuna no anu pitapita sou mauli noxou ꞌOlu Iesu Kalisito anu Tila noxinge mo Anu umulinu vaikala aloxo ꞌo.
Kalikalipalaa no Nano no Anu Lalotu
10 Ioxe ta vivilo no anu ualasou Tila noxinge Iesu Kalisito, la eni ataliꞌisinge pekiaꞌu ulai noxinge lexe ngingi latala ukalusi ne opongengi vilesisi noxinge ngatongatoꞌo mo sou kalikalipalaa uxali nonixingengi mamu. Ngingi ngaxolu ngapita laixe manina no anu xavuxavutala noxinge mo masaxa noxinge ne uxali vilesisi.
11 Xo ta vivilo, Kuloe ta tulatulanu moseꞌi mivikalaleli lexe vaikala sou ꞌotoꞌoto a uxolu noxinge ne.
12 Maꞌia ane eni elemo noxinge ne aloxo ꞌo, ngingi vile naꞌoxe,
“Eni amulinu Paulo,”
xe vile la,
“Eni amulinu Apolosi,”
xe vile la,
“Eni amulinu Kepasi,”
xe vile la,
“Eni amulinu Kalisito.”
13 Loxovaa, Kalisito ne muvalavala? Loxovaa, Paulo ane musoli no anu ovu valautusinge? Loxovaa, ngingi ngeꞌulo no anu ualasou Paulo?
14 Eni aꞌosa musuku lexe eni aꞌulosine nini vile uasi, ia Kulisipasi ilou Xaiosi aneꞌisisi.
15 La sou mamu sou itema vile uvikala lexe ngingi ngeꞌulo no anu ualasilo.
16 Ia maninasi eni eꞌulosiꞌa Sutepano tatulatulaanu kalumo. Xe iliꞌi no anu ne eni axavutalanu lexe eni aꞌulosou evile la uasi.
17 Xo Kalisito mupalusilo sou lexe aꞌulosiꞌa ta mitema uasi, ia sou aꞌaloxu aꞌalo lailaixe noxou Iesu Kalisito. Anu mupalusilo sou aꞌaloxu Lataua vaikalau no anu lavulavu noxou itema uasi, xo mamu sou eni aꞌoxo ovu valautu noxou Kalisito uxali loxo mii vitanisi.
Kalisito ne Anu Xavutala Lailaixe Mo Xavi Noxou Lataua
18 Xo vaikala sou ovu valautu ne anu laixe uasi no anu lolomu noxiꞌa ta mitema aneꞌi ane ixoxolu ia uleeneꞌi ne ulai usoli, ia noxinge nenge ane Lataua upamaulinenge mo ulosinge mauli, vaikala ane ne anu xavi noxou Lataua.
19 Xo kaukavu sou muai no anu Lavuku Tavuna teinu aloxo ꞌo,
“Eni amamulonu xavutalaiꞌa ta mitemasou xavutala lailaixe
mo aꞌoxo lavulavuiꞌa ta mitema sou lavulavu tatila uxali mii vitanisi.”
20 Itema sou xavutala laixe ne anu ava? Mo itema sou lavulavu no anu lapuloto ne ava? Mo itema sou lavulavu sou ꞌotoꞌoto no anu vaikala sou mimii no lia ꞌo ne ava? Lataua muꞌoxonu lavulavu sou lia ꞌo ne uxali laixe uasi.
21 Xo no anu xavutala laixe noxou Lataua la anu muꞌoxonu pekiaꞌu noxiꞌa ta mitema no ꞌa lialia sou meꞌa ilavusou no anu lavulavu noxiꞌa uasi. Aneꞌi ixavutala lexe vaikala noxou Lataua laixe uasi. Ia Lataua muꞌosasi no anu vaikala ane nexi teaꞌaloxu sou upamaulineꞌi aneꞌi ane imuxaxu taneꞌi no anu.
22 Ta Iutaia imasaxau sosovo iouiou xe ta Xiliki ikamuli xavutala laixe.
23 Ia nexi taaꞌaloxu Kalisito solixu no anu ovu valautu. Aꞌalo ane ne anu loxo mii sou kuluke noxiꞌa ta mitema ne Iutaia, xe ta mitema aneꞌi ane ta Iutaia uasi la aneꞌi iꞌoxe aꞌalo ne aꞌalo vulaulausi.
24 Ia ta Iutaia iloꞌa ta Xiliki ane Lataua muꞌavaliꞌa ne miꞌoxe Kalisito anu xavi mo xavutala laixe noxou Lataua.
25 Xo mii maꞌia noxou Lataua ane ta mitema iꞌoxo lexe anu laixe uasi. Ne anu tila mo muuaulixu lavulavu noxiꞌa ta mitema. Xe mii maꞌia noxou Lataua ane ta mitema iꞌoxo lexe anu mamalaxusi ne mii pekiaꞌu muuaulixu xavi noxou itema.
26 Ioxe ta vivilo, ngaxavutalangengi tei no voxo mine Lataua muꞌavalinge. La ta peina noxinge ne lavulavumengi tila no ieꞌi ta mitema sou lialia ꞌo uasi. Mo ta piena noxinge ne nganoꞌu xavi uasi. Xe ta piena noxinge ne sou uala ta tatila uasi.
27 Ia Lataua muilou mii ane ta mitema iꞌoxe laixe uasi ne sou mupamaelaneꞌi ta mitema sou lavulavu ta tatila no anu. Xe Lataua muilou mii ane mamalaxu no lialia ꞌo ne sou mupamaelaneꞌi ta mitema pekipekiaꞌa no anu.
28 Mo anu muiloiꞌa aneꞌi ane ualasiꞌa kituꞌa no anu lialia mo ta mitema iꞌoxe aneꞌi mii vitanisi. Xe mii vitanisi no ieꞌi ta mitema ne sou umamulonu mimii ane ta mitema sou lialia ixavutala lexe anu mii tila.
29 Aloxo ne mo sou itema vile umomomo sou utooxu no iou Lataua uasi.
30 Xo loxo noxousi la sou ngingi ngexolu noxou Kalisito Iesu e muxali loxo lavulavu laixe noxinge molu noxou Lataua. Xo noxou Iesu anu aloxo ꞌo ꞌilixo sou tamuamuaꞌi ulapusi mo taxolu loxo ta mitema noxou Lataua ane anu mulivulinenge.
31 Anu aloxo ne loxo Lavuku Tavuna teinu muvikala lexe,
“ꞌEna ꞌei ane molu utooxu la anu utooxu Tila anusisi.”