95
Ishipa i kucikpa
1 Ta̱wa̱i ci yaꞋan ishipa i ma̱za̱nga̱ u Vuzavaguɗu,
ci cananai ishipa i ma̱za̱nga̱ u katali ka wishi ka̱ tsu.
2 YaꞋan tsu ta̱wa̱ e kelime ka̱ ni n kucikpa,
ci cananai ishipa i ma̱za̱nga̱ n kucikpa.
3 Adama a na Vuzavaguɗu Ka̱shile ka gbayin kaꞋa,
mogono ma gbayin maꞋa wa̱ a̱ma̱li ra̱ka̱.
4 Wi ta̱ o tsugono tsa aduniyan ra̱ka̱,
a ɗaka va aɓatsu atali a kubana,
a nsasan mu ugaɗi.
5 Mala ma̱ ni maꞋa, adama a na a̱yi ɗa u yaꞋin maꞋa,
n ekiye a̱ ni a ɗa u yaꞋin iɗika i ɗekpu.
6 Ta̱wa̱i tsu kuɗa̱ngi ci yaꞋankai ni a̱ga̱nda̱,
yaꞋan tsu kuɗa̱ngu e kelime,
ka Vuzavaguɗu, vuza na u yaꞋin tsu.
7 Adama a na a̱yi ɗa Ka̱shile ka̱ tsu,
a̱tsu ɗa uma a na wi a kuguɓa,
a̱tsu ɗa ushiga wu nkyon u na wi a̱ kula̱na̱.
I pana baci ka̱la̱ka̱tsu ka̱ ni anana,
8 ka̱ta̱ i yaꞋan ugbami u kaci tsu na ikaya i ɗa̱ i yaꞋin a Mariba ba,
tsu na a yaꞋin e meremune,
ma Masaha a kanna ka nanlo ba,
9 taɗe o tonoi mu kune-kune
ɗa o kondoi mu,
ko a na wo okpoi ene ta̱ ili i na n yaꞋin adama e le.
10 Ali a̱ya̱ amangere mpa a wupa n tsukaya tsu nanlo,
n danai <<A̱ɗu a uma a nanlo i wa̱ a̱ va̱ ba,
kpamu e yeve uye u va̱ ba.>>
11 Adama a nannai n kucina ta̱ a̱ ka̱tsuma̱ ka wupa u va̱,
n danai, <<I a ku uwa a̱ ubuta̱ u kuvuka u va̱ ba.>>