81
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka, <<Gititi.>> Vishipa vu Asafa.
Ishipa i ka̱ɗiva̱ ka̱ a̱pa̱m
1 Cananai ishipa i ma̱za̱nga̱ u Ka̱shile katsura ka̱ tsu,
orukpoi ka̱u u Ka̱shile ka Yakubu.
2 Gita̱i ishipa n i kucuwai medelemishipa,
waꞋi umolu, waꞋi umolu u gbayin,
n ka̱la̱ka̱tsu ka uyoꞋo.
3 I lika̱ kavana ka̱ ka̱giri o wotoi u savu,
i lika̱ kavana ka a makyan ma na wotoi u pecei,
i yaꞋan ka̱ɗiva̱ ka.
4 Na lo ili i kutono i ɗa wa aza a Isaraila,
wila̱ u ɗa u na wu uta̱i a̱ Ka̱shile ka Yakubu.
5 U neke ta̱ wila̱ u nanlo a̱ ubuta̱ uma a Isaraila,
a makyan ma na wu uta̱i u shilika̱i n uma a Masar.
M panai ka̱la̱ka̱tsu ka na n saꞋwai kupana ba, a kudansa,
6 <<N cipa̱ka̱ ɗa̱ ta̱ ucanuku wa̱ a̱miki u na wi avangatsu a̱ ɗa̱,
mbana ma atakaci n na mi ekiye a̱ ɗa̱ n yaꞋan ta̱ wishi.
7 A makyan ma na yi o kusoꞋo atakaci,
i ɗeke mu ta̱, ɗa tana n wawai ɗa̱,
ɗa mu ushuki mpa punu eleshu,
n kondoi ɗa̱ a̱ mini ma Mariba.
Kuvuka
8 Panai, a̱ɗa̱ uma a̱ va̱ aza a Isaraila,
n ciga ta̱ i panaka mu.
9 Ka̱ta̱ i cikpa a̱ma̱li ba,
ka̱ta̱ kpamu i kuɗa̱ngu a omoci a̱ma̱li ba.
10 Mpa ɗa Vuzavaguɗu Ka̱shile ka̱ ɗa̱,
vuza na wu utuka̱i ɗa̱ a iɗika i Masar,
apukai una̱ u ɗa̱, mi ta̱ a ku lyatangu ɗa̱.
11 <<Ama uma a̱ va̱ a panaka mu ba,
Isaraila u iwain kutono mu.
12 Adama a nannai,
n ka̱sukpa̱ le ta̱ a lyaꞋa kelime n ugbamukaci u le,
a yaꞋan ili i na i a kufuɗa kuyaꞋan.
13 Uma a̱ va̱ i baci a kupanaka mu,
ishi baci aza a Isaraila o kutono uye u va̱,
14 mi ishi ta̱ o kuloko irala i le gogoꞋo lo
n lyaꞋa aza a na a iwai le ra̱ka̱.
15 Aza a na a iwai Vuzavaguɗu,
i ta̱ a̱ ku kuɗa̱ngu e kelime ka̱ ni adama o wovon,
atakaci e le ko wannai ɗa.
16 Ama mi ta̱ a ku lyaꞋatangu ɗa̱ n alkama i singai,
ka̱ta̱ n zuwa ɗa̱ i cuwa̱ n ishigi i na a jaꞋwain a katali.>>