26
Vishipa vu Dawuda.
1 Vuzavaguɗu, yotsongu a na mpa mi n unushi ba,
adama a na n yaꞋan ta̱ ili na yi derere,
n neke ta̱ Vuzavaguɗu ka̱ɗu ka̱ va̱,
ko munla̱i.
2 Vuzavaguɗu, kondo mu,
vu kondo kusheshe ku ka̱ɗu ka̱ va̱,
3 Adama a na n yeve ta̱ ucigi u nu u na u tsu sabaꞋa ba,
wi ta̱ o kutono nu mpa,
kamayun ka̱ nu kaꞋa mi o kutono ayin tutu.
4 N ci yongo n uma a kavama ba,
kabura mu n aza a kapalaka̱shi ba,
5 N kovo ta̱ koɓolo ka uma a gbani-gbani,
n tsu yongo n uma a gbani-gbani ba,
6 Vuzavaguɗu, n saꞋa ta̱ ekiye a̱ va̱,
adama a na n yotsongu mi n unushi ba,
n kucikpa ku ɗa n tsu dasa n ka̱ra̱Ꞌa̱ katalikalyuka ka̱ nu.
7 Mi ta̱ a kucanana ishipa i kucikpa n ka̱la̱ka̱tsu ka̱u,
nu n dansai ili mereve i na vu yaꞋin ra̱ka̱.
8 Vuzavaguɗu, n ciga ta̱ kpaꞋa ku na vi a̱ ida̱shi,
ubuta̱ u na tsugbayin tsu nu ci a̱ ida̱shi.
9 Ka̱ta̱ vu una mu koɓolo n aza a unushi ba,
ko vu una mu koɓolo n aza a munuka ba,
10 Aza a na i a kuyaꞋan ka gbani-gbani a makyan dem,
i ta̱ ufoɓushi adama a na isa kalyaꞋa.
11 Ama mpa, mi ta̱ a kuyaꞋan ili i na yi mejege,
pana asuvayali a̱ va̱ vu shiba̱ mu.
12 N laꞋaka ta̱ a̱ ubuta̱ ka gbani-gbani dem,
a̱ ka̱tsuma̱ ko koɓolo ka uma,
mi ta̱ a kucikpa Vuzavaguɗu.