5
Aza Urushelima a iwain ku ka̱sukpa̱ unushi u le
1 Ɗa Ka̱shile ka danai, ka̱ra̱Ꞌi uye wu Urushelima ra̱ka̱,
yi indana ka̱ta̱ i la̱na̱.
i la̱na̱ ubuta̱ ra̱ka̱, ye ene
ko ya̱ kuciya̱ vuma,
vu usuɓi,
vuza na u tsu yaꞋan kasingai,
adama na n cinukpaka yi unushi u ni.
2 Ko a na a tsu dana, <<N kucina ta̱ n Ka̱shile>>
mayun ɗa ba, a kucina a uwa ɗa le.
3 Vuzavaguɗu a̱shi a̱ nu kamayun kaꞋa i a̱ kula̱nsa̱ ba?
Avu vu lapa le ta̱,
ama a pana usuɗukpi ba,
vu gbara le ta̱,
ama ɗa a iwain kusabaꞋa. Ele a iwain kulapula ida̱shi i le.
ɗa a kpanduki a̱ɗu e le an katali,
ɗa a iwain kushika̱ unushi u le.
4 Ɗa n danai,<<Uma a nampa aza a unambi a ɗa,
ele alau a ɗa,
adama a na ele e yeve uye u Vuzavaguɗu ba
e yeve tana feu kasingai ka̱ Ka̱shila̱ ba.
5 Adama a nannai mpa n kubana ta̱ wa aza a̱ gba̱ra̱-gba̱ra̱
ka̱ta̱ n yaꞋanka le kadanshi,
adama na ele e yeve ta̱ uye u Vuzavaguɗu,
e yeve ta̱ kasingai ka̱ Ka̱shile.>>
Ama ra̱ka̱ le ɗa o ɓolongi una̱ ɗa o koɗoi kogboro ka,
ɗa a̱ ba̱ɗa̱i ikani ya.
6 Adama a nannai kawu wi ta̱ a̱ kuta̱ a̱ kutsun ka̱ta̱ u takuma le,
kanama ki ta̱ a̱ kuta̱ e meremune ka̱ta̱ wu una le.
ma̱kunzukunzu mo bopo ta̱ a kinda likuci i le,
Yaba dem na wu uta̱i a̱ ka̱tsuma̱ ke le, i ta̱ a kukara yi ka̱ta̱ e wejeleshe yi,
adama a na unushi u le u yimkpa ta̱ n a̱bunda̱i.
ushirikpi u le u tsurakpa ta̱.
7 <<Nini ɗai n kucinukpaka ɗa̱ unushi u ɗa̱?
Muku n nu n ka̱sukpa̱ mu ta̱
kpamu ɗa a kucinai n a̱ma̱li a na i n wuma ba.
cina tana n nekei le ilikulya a lyaꞋa a̱ cuwa̱,
n nannai dem ɗa o tonoi a̱ma̱li o yoku
ɗa a uwai a iꞋuwa ya a shakanlai.
8 Ɗa ucuwi u laꞋi le a̱bunda̱i ɗa okpoi a mazamanai ma̱ a̱ma̱ci.
Yaba dem u bonoi a kuzama vuka vu toku.
9 Ashe u gaꞋan n neke le atakaci adama a ili i nampa ba?
Vuzavaguɗu u dansai,
Ashe mpa ma kutsupaka ka̱ci ka̱ va̱
adama a icuꞋu yi uduniyan i nampa ba?
10 <<Kumbai, ka̱ta̱ i gaɗukpa gaɗi va acaka a̱ ni ka̱ta̱ i kapa a ɗa,
ama ka̱ta̱ i kotso a ɗa ra̱ka̱-ra̱ka̱ ba,
kapai acaka a̱ ni,
adama na ele aza a Vuzavaguɗu a ɗa ba.
11 Adama na kpaꞋa ki Isaraila n kpaꞋa ku Yahuda
a yaꞋanka mu ta̱ unambi wu usuɓi n a̱bunda̱i, mpa Vuzavaguɗu mpa ɗa n dansai.
12 Adama na a yaꞋanka ta̱ Vuzavaguɗu aꞋuwa,
a danai <Wi a kuyaꞋan ili ba,
babu atakaci a na a̱ kuciya̱ tsu,
ko tana tsu ene kotokobi ko ma̱dukpa̱.
13 Eneki a ra̱ka̱ i ta̱ o kopko wunla̱i,
kadanshi ka̱ Ka̱shile ki punu we le ba.
Nannai feu a kuyaꞋan ke le.> >>
Vuzavaguɗu u salai afada
14 Adama a nannai, ɗa Vuzavaguɗu Ka̱shile MalaꞋimili u danai,
adama a na uma a yaꞋan ta̱ kadanshi ka nampa,
la̱na̱ n kuzuwa ta̱ kadanshi ka̱ va̱ a̱ una̱ u nu ka̱ta̱ kokpo akina,
ka̱ta̱ uma a nampa a okpo nɗanga, nɗanga n na akina o kusongu.
15 La̱na̱ a̱ɗa̱ aza a Isaraila, mi ta̱ a̱ kutuka̱ ɗa̱
n uduniyan na ɗe daꞋangi u na u kushilika̱ n a̱ɗa̱, ɗaɗa i na Vuzavaguɗu dansai,
uduniyan u ɗa u na wi n ugbami wa asuvu
uduniyan u ɗa u na wi ali ayin a tsukaya,
uduniyan u ɗa u na i yevei kelentsu ka̱ ni,
babu kpamu vuza na wi e kuyeve i na i a kudansa.
16 Majiki me le mi ta̱ u ɓa̱iwi an kasaun,
dem vule afuɗi o kuvon a ɗa.
17 I ta̱ a kulyaꞋa ashina a̱ ɗa̱ n ilikulyaꞋa i ɗa̱,
ka̱ta̱ a una muku mo olobo n ɗa̱ n nkere n ɗa̱,
ka̱ta̱ o kotso ushiga wu nlala n ɗa̱ n wa anaka a̱ ɗa̱,
ka̱ta̱ a lyaꞋa itacishi ya ashina a nɗanga a̱ ɗa̱,
ka̱ta̱ likuci yi nshilya n ɗa̱ n na i nekei a̱ɗu
a una i ɗa n otokobi.
18 <<Ama ko a ayin a nanlo, mi a kuna ɗa̱ ra̱ka̱-ra̱ka̱ ba. Vuzavaguɗu u dansai,
19 Ama ɗa baci uma a̱ ɗa̱ ecei ɗa̱, <Yiɗa̱i i zuwai ɗa Vuzavaguɗu Ka̱shile ka̱ ɗa̱ ki a kuyaꞋanka tsu ili i nampa ra̱ka̱?> Ka̱ta̱ i dana le, <Tsu na i ka̱sukpa̱i mu ɗa i ka̱na̱i kutono omoci a̱ a̱ma̱li a iɗika i ɗa̱, nannai ɗa i kuga̱nda̱ka̱ omoci a na i a iɗika i na yi i ɗa̱ ba.> >>
20 Dansai ukuna u nampa a kpaꞋa ku Yakubu,
Salai ka a̱ likuci i Yahuda.
21 <<Zuwai atsuvu i pana ukuna u nampa,
a̱ɗa̱ alau n ajarishi a uma,
aza a na i n a̱shi e kene ama e ci ene ba,
aza a na i n atsuvu a kupana ama a tsu pana ba.
22 Ɗa Vuzavaguɗu u danai, ashe u gaꞋan i pana wovon u va̱ ba?
Ashe u gaꞋan i jeꞋeke ikyamba e kelime ka̱ va̱ ba?
Mpa ɗa n zuwai kayala kokpoi kure ku mala,
kure ku na kokpoi mayun a kufuɗa kupasa ku ɗa ba,
ko aɓau a̱ ɗa̱nga̱ baci, a kufuɗa a pasa ba,
ko an wo okpoi a̱ tsu ka̱na̱ ta̱ yura̱, ama i kufuɗa a pasa ba.
23 Ama uma a nampa i ta̱ n ugbamiwasuvu n ugbamukaci kpamu a̱ka̱ra̱shi aɗa,
ele a̱ ka̱sukpa̱ mu ta̱, ɗa a yaꞋin nwalu n le.
24 A̱ɗu e le a tsu dana
<YaꞋan tsu pana wovon u Vuzavaguɗu Ka̱shile ka̱ tsu ba,
a̱yi na u tsu neke tsu mini ayin
a̱ lyushi n irana,
ka̱ta̱ u neke tsu kpamu ayin a vukyaꞋa.>
25 Unushi u ɗa̱ u pece ɗa̱ ta̱ n ili i nampa.
Unushi u ɗa̱ kpamu u sa̱nka̱ ɗa̱ ta̱ kasingai.
26 Adama a na uma a kavama i ta̱ punu a̱ ka̱tsuma̱ ka uma a̱ va̱,
o tsu bopo ta̱ an aza na a zuwakai maza adama a na e reme nnu.
A zuwai maza,
ɗa e remei uma.
27 An mabana tukpa nu nnu,
ta feu iꞋuwa i le yi tukpa m modoruko nannai,
i ɗaɗa i zuwai ɗa okpoi aza a uciyi wa̱ a̱bunda̱i,
28 ɗa a yaꞋin ikyamba ɗa a tasai.
kagbanigbani ke le ki n uteku ba,
a ci kiɗa afada a usuɓi ba,
ka̱ta̱ a̱ la̱nga̱sa̱ mkpan adama a na a lapula ka̱ci ke le,
kpamu a̱ tsu ɓa̱nka̱ aza a unambi a̱ ubuta̱ wa afada ba.
29 Ɗa Vuzavaguɗu u danai, ashe u gaꞋan n takacika le adama a ili i nampa ba?
Kpamu ashe u gaꞋan n tsupaka kaci ka̱ va̱ ukuna
adama uduniyan tsu nampa ba?>>
30 A yaꞋan ta̱ ili i gbani-gbani n ili wovon
a iɗika
31 Eneki a yaꞋan ta̱ kene ka aꞋuwa,
anan ganu kpamu a kulyaꞋa tsugono n utsura u ka̱ci ke le,
uma a̱ va̱ kpamu ta a cigai nannai,
ama yiɗa̱i ya kuyaꞋan ɗa baci ukoci u ta̱wa̱i?