66
Afada koɓolo n ukeɗi wa̱ a̱pa̱
1 Ili i na Vuzavaguɗu u danai i ɗa na,
<<Gaɗi ɗa kakuba ko tsugono ka̱ va̱,
aduniyan ta ɗe n tsu zuwa ene a̱ va̱.
To, gogo na icuꞋu i kpaꞋa ku ne ku ɗai i kumaꞋaka mu?
Te ɗai kpamu ubuta̱ u kuvuka u va̱ wi?
2 Vuzavaguɗu u danai, <<Ili i nampa ya ra̱ka̱ ba ekiye a̱ va̱ a ɗa a yaꞋin i ɗa,
ali ɗa yo okpoi nannai ba?>>
<<Ama vicuꞋu vu vuma vu nampa ɗa mi a̱ kula̱nsa̱,
vuza na u ka̱na̱i ka̱ci ka̱ ni ɗa kpamu ayinviki i koɓolo n a̱yi
ɗa kpamu wi a kuyaꞋan nwalu n kadanshi ka̱ va̱.
3 Uma a ci yaꞋan ta̱ tsu na a cigai, we le derere ɗa,
ko a lyuka n koɓonburom ko a lyuka n vuma,
ko a lyuka m malala,
ko a lyuka m mesheꞋe,
ko a̱ tuka̱ n kuneꞋe ki ili kashina,
ko a yaꞋan kuneꞋe ku mpasa m ma̱gurusunu,
ko a yaꞋan kuneꞋe ku kpalu ki ili i ma̱gula̱ni,
ko a cikpa a̱ ma̱li.
Aza na a zagbai uye u le,
ɗa wuma u le u panai ma̱za̱nga̱,
4 mpa feu n sheshe ta̱ n kuneke le atakaci
ka̱ta̱ n tuka̱ le n ili i na i a kupana wovon dem,
adama a na ana n ɗekushei, babu vuza na wu ushuki mu,
ana kpamu n yaꞋin kadanshi babu vuza na u paniki mu,
ɗa a yaꞋin ili i gbani-gbani a̱ a̱shi a̱ va
ɗa kpamu a yaꞋin ili i na n cigai ba.>>
5 Panai kadanshi ka Vuzavaguɗu,
a̱ɗa̱ aza na yi ugulani n kadanshi ka̱ ni,
<<Aza a̱ ɗa̱ a na a iwain ɗa̱
ɗa kpamu o lokoi ɗa̱ adama a kula ku va̱,
m ma̱ka̱n a danai, <YaꞋan Vuzavaguɗu u ta̱wa̱ n tsugbayin ci ni,
adama a na ce ene ma̱za̱nga̱ ma̱ ɗa̱.>
Ama ele ɗa aza na a kupana wono.
6 Panai izumgbi ɗe a̱ likuci ya,
panai kacaꞋa a̱ ma̱va̱li ma Vuzavaguɗu ma,
Izumgbi i Vuzavaguɗu i ɗa
a kuyaꞋan katsupu wi irala i ni derere tsu na wuntsai le.
7 <<Kafu u gita̱ a̱ga̱nda̱ a limata,
ɗa tana u matsai,
kafu u gita̱ kupana mɓa̱la̱ n limata,
ɗa tana u matsai maku mo kolobo.
8 Yayi u saꞋwai kupana ili tsu nampa?
Yayi kpamu u sawai kene i nampa ya?
I ta̱ a kumatsa aduniyan a kanna ke te?
Ko ta na feu aduniyan a ci yimkpa ta̱ a kanna ke te?
Makyan ma na Sihiyona u gita̱i a̱ga̱nda̱ a limata a̱ ni
ɗa ta na u matsai muku mo olobo.
9 Mpa Vuzavaguɗu n danai, <<N kuyawaka n uma a̱ va̱ a ayin a kumatsa
ka̱ta̱ m kpa̱ɗa̱ kuzuwa a matsa le ba.
Mpa vu na n tsu tuka̱ n limata, n kushiya kamatsatsu ba,
wannai ɗai n gita̱ a̱ga̱nda̱ a limata.>>
10 YaꞋin ma̱za̱nga̱ n Urushelima ka̱ta̱ kpamu i yaꞋan ma̱za̱nga̱ adama a̱ ni,
a̱ɗa̱ vu na i cigai ni,
yaꞋin ma̱za̱nga̱ ma gbayin n a̱yi,
n a̱ɗa̱ na kpamu yi n una̱mgbuka̱tsuma̱ n a̱yi.
11 Ciya̱ vu apa ka̱ta̱ vi cuwa̱
m mani ma singai ma̱ ni,
vi ta̱ kpamu o kusoꞋo ka̱u
ka̱ta̱ vi yaꞋan ma̱za̱nga̱ n tsu na mani mi n a̱bunda̱i.>>
12 Adama a na na ɗa ili i na Vuzavaguɗu u danai,
<<Mi ta̱ a̱ kutuka̱ m ma̱ta̱na̱ a kubana wa̱ ni tsu mala,
ka̱ta̱ uciyi wa aduniyan u yaꞋan tsu na mini me ci yene,
u teku tsu kuyene, yi ta̱ kpamu a kapa, ka̱ta̱ kpamu e keɓe ɗa̱ gaɗi n ekiye a̱ ni,
ka̱ta̱ vu yongo e kujeꞋe ɗe a̱ nkuta̱ n ni.
13 Tsu na kamaci ka tsu kparusa maku ma̱ ni,
ta feu mi a kukparusa ɗa̱ nannai,
yi ta̱ a̱ kuciya̱ uremi wa̱ a̱ɗu n Urishelima.>>
14 Ayin a na baci ve enei ili i nampa, ka̱ta̱ ka̱ɗu ka̱ nu ka shana m ma̱za̱nga̱
ka̱ta̱ kpamu vo okpo lenwu an mita̱.
Ka̱ta̱ kpamu uma e yeve utsura u Vuzavaguɗu,
ama wi ta̱ o kuyotsongu wupa u ni a̱ ubuta̱ wi irala i ni.
15 La̱nuki, Vuzavaguɗu wi ta̱ lo a̱ kuta̱wa̱ n akina,
ekeke o odoku a̱ ni i ta̱ tsu kabatalikpau,
wi ta̱ a katika wupa ka̱u,
wi ta̱ a kuyaꞋan kuɓarangu ku ni m melentsu ma akina.
16 Adama a na n akina a ɗa koɓolo n kotokobi ka̱ ni
Vuzavaguɗu wi a kuyaꞋanka uma ra̱ka̱ afada,
aza na Vuzavaguɗu u kuna i ta̱ n a̱bunɗai.
17 Vuzavaguɗu u danai <<Aza a na a takpai nshinda̱ n le adama a na a bana a asuvu a ubaru, ɗa wi o kutono aza na a tsu wala n kayin, ɗa kpamu i a kutakuma inyama i ma̱gurusunu n a̱yu, ra̱ka̱ vi le i ta̱ a kuzuwaka uteku.>>
18 <<Adama a na mpa n yeve ta̱ ulinga u le n kusheshe ku le, ayin i ta̱ lo a̱ kuta̱wa̱ a na wo ɓolongu aduniyan n kelentsu ra̱ka̱, i ta̱ a̱ kuta̱wa̱ kene tsugbayin tsu va̱.
19 <<Mi ta̱ a kuzuwa urotu e mere me le, a̱ ka̱tsuma̱ ke le mi ta̱ a̱ kusuku aza a na a buwai n wuma a kubana a iɗika kakau, n aza a Tarishi, n aza a Libiya, n aza a Lidiya, n aza a Tubalu, koɓolo n aza e Helene, n kotogu ka na ki daꞋin ka̱u ka na ka̱ta̱ ka saꞋwai kupana ukuna u mereve u va̱ ba, i ta̱ a kusala tsugbayin tsu va̱ a aduniyan ra̱ka̱.
20 Vuzavaguɗu u danai, i ta̱ a̱ kutuka̱ n aza a̱ ɗa̱ ra̱ka̱ a aduniyan tsu kuneꞋe u Vuzavaguɗu, n odoku n ekeke o odoku ni njaki, a kubana a kusan ku ciɗa ku va̱ Urushelima, Vuzavaguɗu u danai, ɗa derere n tsu na aza a Isaraila a̱ tuka̱i n kuneꞋe ki ili i kashina a kasasu a kpaꞋa ku Vuzavaguɗu.
21 Vuzavaguɗu u danai, mi ta̱ kpamu a kuzagba aza yoku okpo anan ganu aza yoku kpamu okpo anan Levi.>>
22 <<Tsu gaɗi vu savu n iɗika i savu i na mi a kuciga kuyaꞋan, yi ta̱ o kokpo i ɗa̱, Vuzavaguɗu u danai, tsu nanlo tsu ɗa kula ku ɗa̱ ki o kuyongo koɓolo nu ntsukaya n ɗa̱.
23 Vuzavaguɗu u danai, a̱ ka̱ɗiva̱ ko wotoi u savu a kubana wotoi savu u yoku, Ashibi a nampa a kubana Ashibi o yoku, uma ra̱ka̱ i ta̱ a̱ kuta̱wa̱ a̱ kuɗa̱nku mu.>>
24 <<I ta̱ a̱ kuta̱ a bana pulai a inda even a ikyamba a aza a na a yaꞋankai mu ugbamukaci. Azun a na i o kusovo le a̱ kukuwa̱ ba, akina a na i o kusongu le feu i a̱ kukima̱sa̱ ba, i ta̱ o kokpo ili yu unata u uma a aduniyan dem.>>