5
Vishipa vu kashina ki itacishi
1 Mi ta̱ a kuya'anka macigi ma̱ va̱
vishipa vu kashina ki itacishi i ni,
macigi ma̱ va̱ mi ta̱ n kashina ki itacishi
a ubuta̱ u tsuta̱ wu uɓon wu nsasan.
2 Ɗa u za̱ɗukpa̱i iɗika ya, ɗa u ɓolongi atali a na i punu,
ɗa u shikpa̱i nɗanga mi itacishi i na u la'i n kuciga.
U ma'i punu mashilya ma vuza kindi
ɗa u doku u lapulai lo ubuta̱ u kupisha umaci u mambulu wa.
U la̱nsa̱i icu'u yu umaci wu nɗanga i singai,
ama i ɗa i matsai umaci u gbani-gbani.
3 <<Gogo na a̱ɗa̱ aza a̱ ida̱shi a Urishelima n uma a Yahuda,
ya'ankai tsu afada a nampa mpa n kashina ki itacishi ka̱ va̱.
4 Yiɗa̱i yi ishi i ga'in n ya'an n kashina ki itacishi ka̱ va̱
u la'i i na n ya'in ɗe?
Ana n sheshei mi ta̱ a̱ kuciya̱ umaci u singai,
yiɗa̱i i zuwai ɗa i kpa̱ɗa̱i kumatsa umaci u mambulu u singai?
5 Gogo na mi ta̱ a kudana wu
ili i na n kuya'an n kashina ki itacishi ka̱ va̱.
Mi ta̱ a kutakpa ubaru u na mi ishi n zuwai va,
ka̱ta̱ ta na ka ya'an ula̱nga̱shi,
ka̱ta̱ m ɓoso mashilya ma,
ka̱ta̱ ta na a dasasa ka'a.
6 Mi ta̱ o kubonoko ka'a ka̱pula̱ka̱,
babu ukana'i ko ucimbi
ka̱ta̱ mataci n awana o gbonguro punu.
Mi ta̱ a kudana Ka̱shile
ko yo'o mini punu ba.>>
7 Adama a na kashina ki itacishi ka Vuzavaguɗu Mala'imili
kpa'a ki Isaraila ku ɗa,
aza a Yahuda
ele ɗa ica̱'a̱shi i singai i na u cigai.
U la̱nsa̱i kasingai ama ɗa kucikpa we enei kutsuwa̱n ku mpasa,
wi indanai ko u kuciya̱ ta̱ usuɓi ɗa kucikpa u panai ma̱shi ma̱ vishili.
Atakaci koɓolo n afada
8 Ili ya atakaci i ɗa a kubana wa aza a na a tsu tsula i'uwa kakau n a̱bunda̱i
koɓolo n uba̱nga̱ u kuma'a kakau n a̱bunda̱i
ali ubuta̱ dem u kotso,
ka̱ta̱ vi yongo ende'en a̱ ubuta̱ wa.
9 Vuzavaguɗu Mala'imili u ya'an ta̱ kadanshi atsuvu a̱ va̱ a kupana,
<<Mayun i'uwa n a̱bunda̱i yi ta̱ o kokpo agali,
ka̱ta̱ i'uwa i gbagba'in yo okpo lekeɗi babu vuza punu.
10 Nsala kupa n kashina ki itacishi ki ta̱ a̱ kuta̱ m ma̱kya̱n ma aza a Yahuda kenu gbani, nca̱'a̱tsu kupa mi icu'u mi ta̱ a kumatsa ma̱ca̱'a̱tsu me te koci.>>
11 Ili ya atakaci i ɗa a kubana wa aza a na a̱ tsu ɗa̱nga̱ n usana
a̱ kula̱nsa̱ ma̱ra̱,
ka̱ta̱ o yongo ɗe ali kayin ka gbayin
o kuso'o ali ma maka le.
12 I ta̱ n umolu koɓolo n ugogi a̱ ubuta̱ u ka̱ɗiva̱ ki ilikulya ke le,
m medele mi ishipa n vushari koɓolo m ma̱ra̱,
ama babu kukeɓece n ukuna wi ili i Vuzavaguɗu,
ko e keɓece kpamu n ili i na u ya'in.
13 Adama a nannai uma a̱ va̱ i ta̱ a kubana tsugbashi a iɗika i yoku
adama a unambi u kuyeve,
aza a na i n tsugbayin i ta̱ a̱ kukuwa̱ n kambulu,
ka̱ta̱ aza a na a buwai kpamu a̱ kuwa̱ n kakuli.
14 Adama a nannai kasaun ko yongoi a kulapula kelentsu ka̱ ni
ɗa ka̱ ɓa̱yuwa̱i una̱ u ni n wanshi ka̱u,
ciya̱ uga'in u Urishelima n ka̱bunda̱i ka uma a̱ ni ka̱ zura̱ngu punu a asuvu.
Aza a gbagba'in n aza a kaca'a a na i lo dem, i ta̱ a̱ kuzura̱ngu punu.
15 Umaci u vuma dem ra̱ka̱ wi ta̱ a̱ kuciya̱ ugoyi
ka̱ta̱ o bonoko vuma ukuna u gbani,
a̱shi a vuza va̱ a̱ra̱ɗi i ta̱ a kuya'an ugoyi.
16 Ama Vuzavaguɗu Mala'imili wi ta̱ a̱ kuciya̱ ucikpi, adama a kasingai ka̱ ni,
ka̱ta̱ Ka̱shile ka ciɗa ko yotsongu ka̱ci ka̱ ni ciɗa n utsura wu usuɓi u ni.
17 Nkyon mi ta̱ a kulina ba̱ri tsu ubuta̱ u kalina u le,
ka̱ta̱ muku mu nlala n lina a agali a aza a̱ uciyi.
18 Ili ya atakaci i ɗa a kubana wa aza na i o kurono unushi o kutono le ka̱ca̱pa̱ n kawin ko modoruko,
o kurono kawuya m mabana ma awin,
19 ele na i a kudana, <<Ya'an Ka̱shile ka ya'an gogo'o,
ya'an u dakaka ulinga u ni
ciya̱ ce ene u ɗa.
Ya'an kusheshe ku Vuza ciɗa va aza a Isaraila ku yawa ɗevu,
ka̱ta̱ ku lya'a kelime, ciya̱ ci yeve ku ɗa.>>
20 Ili ya atakaci i ɗa wa aza a na e ci ɗeke kawuya ili i singai,
kasingai tamkpamu e ɗeke yi kawuya,
aza a na o tsu bonoko ka̱yimbi kokpo kutashi,
kutashi tamkpmu kubono ka̱yimbi.
Aza a na o tsu bonoko okono o okpo uyo'o,
uyo'o tamkpamu u bono ili yo okono.
21 Ili ya atakaci i ɗa a kubana wa aza na i n ugboji a̱ a̱shi e le,
n kuyeve ku ka̱ci ke le feu.
22 Ili ya atakaci i ɗa a kubana wa aza a gbagba'in o oso'i a̱ ma̱ra̱,
koɓolo n aza a na e yevei kumbuku ma̱ra̱ mayin,
23 ele na a tsu isaka aza a unushi kadanshi n utsura u katsupu u na e kuneke le,
ka̱ta̱ a nanna ka singai ka vuza na wi n ka mayun.
24 Adama a nannai, tsu na melentsu ma akina ma tsu laɓana ci'iwa̱,
n tsu na kpamu mita̱ me ci leɓece a akina.
Nannai ɗa aralu e le a kushama
ka̱ta̱ a̱pa̱lu e le o ɗoɗo ali wunla̱i u ɗika tsu kubuta̱,
adama a na a iwan ta̱ wila̱ u Vuzavaguɗu Mala'imili
ɗa kpamu o goyoi kadanshi ka Vuza ciɗa va aza a Isaraila.
25 Adama a nannai wupa u Vuzavaguɗu wi ta̱ a̱ kukula̱ adama a uma a̱ ni,
kukiye ku ni ku ba̱rukpa̱ ta̱ ɗa ku lapai le.
Nsasan m gba̱ɗa̱i,
ɗa even a ikyamba o okpoi an ka̱viri a uye u wawa'a u likuci.
Ama ko n nannai dem, wupa u ni u kotso ba,
kukiye ku ni ku buwa ta̱ uba̱rukpi.
26 U ɗengusa̱i kakashi ku urotu adama a iɗika i na yi dada'in,
u ya'ankai aza a na i a uteku wa aduniyan izumgbi n yula̱.
Ele ta na a̱ ta̱wa̱i n ilaɗi m moloko.
27 Ko vuza te vi le wo'o ko u ta̱ɗa̱tsa̱ ba,
babu vuza na u gbaɗikai ko u latai,
babu kaɗambura ka̱ kuyun ka na ka̱ ɗa̱mba̱i
ko vunu vu kataka vu na vu kasai.
28 Aya'a e le i ta̱ lyalya'an,
utan u le gbende wi ta̱ ukatsuki,
ɗaka va adasukpatsu vo odoku e le wi ta̱ ugbami an katali ka̱ a̱ta̱nza̱ri,
anci a ekeke o odoku e le a kuwala an kabatalikpau.
29 Izumgbi i le ci izumgbi i kawu,
a̱ yura̱ tsu muku mi ikawu,
yura̱ tsu na a tsu kiyangu nnama n na a tsu takuma
ka̱ta̱ a lazaka babu vuza na u kisa le.
30 A kanna ka nanlo i ta̱ a kuya'an yura̱
tsu na mala ma tsu vutsukpa n yura̱.
Vuza wi inda baci a iɗika i ɗekpu,
wi ta̱ e kene ka̱yimbi n atakaci,
ko kutashi ki ta̱ o kubono ka̱yimbi adama e eleshu.